லங்காசிறி FM
வீடமைப்பு அதிகார சபை மீது பாதாள உலகக்கும்பல் அச்சுறுத்தல்! கோப் குழு விசாரணையில் வெளிவந்த அதிர்ச்சி தகவல்
அரசியல் அழுத்தம், பாதாள உலக அச்சுறுத்தல்கள் மற்றும் சில ஊழல் அதிகாரிகளின் தன்னிச்சையான நடவடிக்கைகள் காரணமாக, தேசிய வீடமைப்பு அபிவிருத்தி அதிகார சபை கடந்த காலத்தில் பெரும் தொகையை இழந்துள்ளதாக பொது நிறுவனங்கள் மீதான நாடாளுமன்ற குழு (கோப்) கண்டறிந்துள்ளது.
கொழும்பின் மாளிகவத்தை பகுதியில் அமைந்துள்ள கடைகளின் குத்தகை ஒப்பந்தங்கள் புதுப்பிக்கப்படாதது மற்றும் வாகன நிறுத்துமிடங்களிலிருந்து வரி வசூலிப்பது குறித்து தேசிய வீடமைப்பு அபிவிருத்தி அதிகார சபையின் அதிகாரிகள் கோப் குழுவின் முன் வரவழைக்கப்பட்டு விசாரிக்கப்பட்டபோது இந்தத் தகவல் வெளிப்பட்டது.
கோப் குழு விசாரணை
அதன்போது, கோப் குழுவின் தலைவர் மருத்துவர் நிஷாந்த சமரவீர பல விடயங்களை கண்டறிந்துள்ளார்.
மாளிகவத்தை பகுதியில் அமைந்துள்ள 113 கடைகள், டிசம்பர் 31 ஆம் திகதி நிலவரப்படி 12 மில்லியன் ரூபாவுக்கும் அதிகமான வாடகை மீதியைச் செலுத்தவில்லை என்று அவர் சுட்டிக்காட்டினார்.
மேலும், 2 கடைகள் 100 ரூபாவுக்கும் குறைவான வாடகைக்கும், மற்ற 37 கடைகள் 100 முதல் 1,000 ரூபா வரையிலான வாடகைக்கும் விடப்பட்டுள்ளதாக அவர் கூறினார்.
மேலும் 38 கடைகள் 1,000 முதல் 5,000 ரூபா வரையிலான வாடகைக்கு விடப்பட்டுள்ளதாகவும், 52 கடைகளின் குத்தகை ஒப்பந்தக் காலம் முடிந்து 1 முதல் 35 ஆண்டுகள் வரை நீண்ட காலம் ஆகிவிட்டதாகவும் அவர் சுட்டிக்காட்டினார்.
இது ஒரு பெரும் குற்றம்
இதற்குப் பதிலளித்த தேசிய வீடமைப்பு அபிவிருத்தி அதிகார சபையின் உதவிப் பொது முகாமையாளர் அஜித் நந்தன குமார, குறித்த கடைகளின் வாடகைதாரர்கள் 1980-களில் ஒப்பந்தங்கள் செய்துகொண்டதாகத் தெரிவித்தார்.
இருப்பினும், சம்பந்தப்பட்ட ஒப்பந்தங்களை உடனடியாகத் திருத்திப் புதுப்பிக்குமாறு தற்போது அறிவுறுத்தல்கள் வழங்கப்பட்டுள்ளதாகவும் அவர் கூறினார். 'வீடமைப்பு அபிவிருத்தி அதிகார சபை வருடத்தின் 365 நாட்களும் நிலத்தை தானமாக வழங்கி வருகிறது.
இது ஒரு பெரும் குற்றம்...' என்று கோப் குழு விசாரணையில் கலந்துகொண்ட தேசிய மக்கள் சக்தி கட்சியின் நாடாளுமன்ற உறுப்பினர் அசித நிரோஷன குற்றம் சாட்டியுள்ளார்.
குத்தகை ஒப்பந்தங்களைப் புதுப்பிக்கத் தவறியதற்கான காரணங்களை விளக்கிய தேசிய வீடமைப்பு அபிவிருத்தி அதிகார சபையின் பணிப்பாளர் சபை உறுப்பினர் அனுராத கிரலவெல்ல, இதற்கான முழுப் பழியையும் அதிகாரிகள் மீது சுமத்த முடியாது என்று குறிப்பிட்டார்.
பாதாள உலகக்கும்பல் அச்சுறுத்தல்
இதற்கு மூன்று முக்கிய காரணங்கள் இருப்பதாக அவர் சுட்டிக்காட்டினார்.
அரசியல் அழுத்தங்கள், பாதாள உலகக் கும்பல்களின் அச்சுறுத்தல்கள் மற்றும் சில ஊழல் அதிகாரிகளின் நடவடிக்கைகள் ஆகியவையே அவை என அவர் கூறினார்.
இவ்வாறு மோசடியாகச் செயல்பட்ட சில ஊழல் அதிகாரிகளின் சேவைகளைத் தடை செய்வதற்கான நடவடிக்கைகள் ஏற்கனவே எடுக்கப்பட்டுள்ளதாக அனுராத கிரலவெல்ல மேலும் தெரிவித்துள்ளார்.
புங்குடுதீவு 3ம் வட்டாரம், கொட்டாஞ்சேனை, Vaughan Ontario, Canada
03 Oct, 2026
யாழ்ப்பாணம், நெடுந்தீவு, பண்டத்தரிப்பு, Goslar, Germany, Breda, Netherlands, Montreal, Canada
29 Sep, 2026
Tellipallai, கொழும்பு, யாழ்ப்பாணம், வவுனியா, Ontario, Canada
04 Oct, 2026
கரவெட்டி மேற்கு, Lewisham, United Kingdom
12 Sep, 2003
