போதைப்பொருள் கடத்தல் சந்தேகம் - மேபீல்ட் சந்தியில் முச்சக்கர வண்டி சுற்றிவளைப்பு

தோட்டத்திற்குள் சந்தேகத்திற்கிடமாக சுற்றித்திரிந்த முச்சக்கர வண்டியை தோட்ட இளைஞர்கள் சுற்றிவளைத்ததால் மேபீல்ட் சந்தி பகுதியில் பரபரப்பு ஏற்பட்டுள்ளது.

இந்த நடவடிக்கை நேற்று(28.09.2026) இடம்பெற்றுள்ளதாக தெரிவிக்கப்பட்டுள்ளது.

மேபீல்ட் தோட்டப் பகுதியில் உள்ள தேயிலை மலையில் முச்சக்கர வண்டியொன்று நீண்ட நேரமாக சுற்றித்திரிந்ததாக தெரிவிக்கப்படுகின்றது.

முச்சக்கரவண்டியுடன் மடக்கி பிடித்த இளைஞர்கள்

இதனை அவதானித்த தோட்ட இளைஞர்கள், முச்சக்கர வண்டியை சுற்றிவளைத்து அதில் இருந்தவர்களிடம் விசாரணை மேற்கொண்டதுடன், சம்பவம் தொடர்பில் பொலிஸாருக்கும் தகவல் வழங்கியுள்ளனர்.

இந்த நிலையில் முச்சக்கர வண்டியில் வந்திருந்த இருவரில் ஒருவர் அங்கிருந்து தப்பிச் சென்றதாகவும் மற்றொருவரை இளைஞர்கள் தடுத்து வைத்திருந்ததாகவும் தெரிவிக்கப்படுகின்றது.

சம்பவத்தைத் தொடர்ந்து, மேபீல்ட் சந்தியில் பெருமளவான இளைஞர்கள் ஒன்றுகூடியதால் அங்கு பதற்றமான சூழ்நிலை ஏற்பட்டுள்ளது. கடந்த சில தினங்களாக குறித்த தேயிலை மலைப்பகுதியில் போதைப்பொருட்களுடன் சில இளைஞர்கள் பிடிபட்டதாகவும், அவர்களை பொலிஸாரிடம் ஒப்படைத்ததாகவும் அப்பகுதி இளைஞர்கள் தெரிவிக்கின்றனர்.

போதைப்பொருள் கடத்தல்

இந்நிலையில், இன்று சந்தேகத்திற்கிடமான முறையில் தேயிலை மலைப்பகுதியில் நீண்ட நேரமாக தொலைபேசியை பயன்படுத்தியபடி சுற்றித்திரிந்த நபர்களை அவதானித்ததாகவும் அவர்கள் போதைப்பொருள் கடத்தலுடன் தொடர்புடையவர்களாக இருக்கலாம் என்ற சந்தேகத்தில் அவர்களை பிடித்து பொலிஸாரிடம் ஒப்படைக்க முயன்றதாகவும் இளைஞர்கள் தெரிவித்துள்ளனர்.

எனினும் அவர்களில் ஒருவர் அங்கிருந்து தப்பிச் சென்றதைத் தொடர்ந்து, தடுத்து வைக்கப்பட்டிருந்த முச்சக்கர வண்டி சாரதியையும் முச்சக்கர வண்டியையும் பொலிஸார் வரும்வரை விடமாட்டோம் என இளைஞர்கள் தெரிவித்ததாக கூறப்படுகின்றது.

இதனையடுத்து, சம்பவ இடத்திற்கு வருகை தந்த திம்புல்லை - பத்தனை பொலிஸார் முச்சக்கர வண்டி சாரதியையும் முச்சக்கர வண்டியையும் பொலிஸ் நிலையத்திற்கு அழைத்துச் சென்றுள்ளனர்.

இதேவேளை மேபீல்ட் காமஸ்டன் மற்றும் ஸ்டோனிகிளிப் உள்ளிட்ட பகுதிகளுக்குச் செல்லும் பிரதான வீதியில் அண்மைக்காலமாக கஞ்சா மற்றும் அபின் போன்ற போதைப்பொருட்கள் கடத்தப்படுவதாக சந்தேகம் நிலவுவதாக அப்பகுதி இளைஞர்கள் குற்றம் சாட்டுகின்றனர்.

பொதுமக்களின் கோரிக்கை

தேயிலை மலைப்பகுதிகளுக்கு சிலர் தினமும் வருகை தந்து தொலைபேசி மூலம் இடங்களை அடையாளப்படுத்தி போதைப்பொருள் கடத்தலில் ஈடுபடுவதாகவும் அவர்கள் தெரிவிக்கின்றனர். இதனால் பாடசாலை மாணவர்கள் மற்றும் வேலைக்குச் செல்லும் பெண்கள் உள்ளிட்ட பொதுமக்கள் அச்சத்துடன் பயணிக்க வேண்டிய நிலை ஏற்பட்டுள்ளதாகவும் இளைஞர்கள் கூறுகின்றனர்.

இந்த நிலைமைக்கு பொலிஸார் உரிய நடவடிக்கை எடுத்து நிரந்தரத் தீர்வை பெற்றுத்தர வேண்டும் எனவும் நடவடிக்கை எடுக்கப்படாவிட்டால் தோட்ட மக்கள் ஒன்றிணைந்து போராட்டத்தில் ஈடுபட நேரிடும் எனவும் அவர்கள் எச்சரிக்கை விடுத்துள்ளனர்.

எவ்வாறாயினும், முச்சக்கர வண்டியில் பயணித்தவர்கள் போதைப்பொருள் கடத்தலில் ஈடுபட்டிருந்தார்களா என்பது இதுவரை உறுதிப்படுத்தப்படவில்லை. சம்பவம் தொடர்பான மேலதிக விசாரணைகளை பத்தனை பொலிஸார் மேற்கொண்டு வருகின்றனர்.

தியாக தீபன் விவகாரத்தில் மறைக்கப்பட்ட மதுசிகான் - உடைக்கப்படும் இரகசியங்கள்

யாழில் திலீபன் வெண்கல சிலை அகற்றம்: அரசியல் பிழைப்புக்கான நாடகம் - இளங்குமரன் குற்றச்சாட்டு