திடீர் காய்ச்சல் - கடுமையான தலைவலி உள்ளவர்களுக்கான அவசர அறிவிப்பு! உடன் மருத்துவமனைக்கு செல்லுமாறு அறிவுறுத்தல்

தற்பொழுது மழை காலம் தொடங்கியுள்ளதால், விவசாயிகள் மற்றும் பொதுமக்கள் எலிக்காய்ச்சல் தொடர்பில் அதிக எச்சரிக்கையுடன் இருக்க வேண்டும் என கிளிநொச்சி மாவட்ட தொற்று நோயியல் வைத்தியர் மாசிலாமணி ஜெயராசா தெரிவித்துள்ளார்.

ஊடக சந்திப்பில் வைத்து அவர் எலிக்காய்ச்சல் தொடர்பில் விளக்கமளித்துள்ளார்.

தொற்று நோய்

மேலும் தெரிவிக்கையில், எலிக்காய்ச்சல் லெப்டோஸ்பைரா என்னும் பாக்டீரியாவால் மனிதர்கள் மற்றும் விலங்குகளுக்கு (மாடுகள், நாய்கள் போன்றவை) வரக்கூடிய ஒரு தொற்று நோயாகும்.

மாசுபட்ட நீர், சேறு அல்லது மண்ணில் உள்ள கிருமிகள் தோலில் உள்ள காயங்கள், சிராய்ப்புகள் மற்றும் கண், மூக்கு, வாய் சவ்வுகள் வழியாக உடலுக்குள் நுழைகின்றன.

எனவே விவசாயிகள் மற்றும் வெள்ளநீரில் நடப்பவர்கள் அதிக ஆபத்துக்குள்ளாகின்றனர். திடீர் காய்ச்சல், கடுமையான தலைவலி, தசைவலி (குறிப்பாக கால் மற்றும் இடுப்புப் பகுதிகளில்), கண்கள் சிவத்தல், வாந்தி மற்றும் உடல் சோர்வு ஆகியவை இதன் முக்கிய அறிகுறிகளாகும்.

ஆபத்தான அறிகுறிகள்

இந்த நிலையில் சிறுநீர் குறைவடைதல், மஞ்சள் காமாலை, மூச்சுத்திணறல், இரத்த கசிவு போன்ற ஆபத்தான அறிகுறிகள் தென்பட்டால் உடனடியாக மருத்துவமனைக்குச் செல்ல வேண்டும்.

வயல் மற்றும் சேற்றில் வேலை செய்வோர் உரிய பாதுகாப்பு காலணிகளை அணிவதுடன், தேவையற்ற வெள்ளநீர் தொடர்பைத் தவிர்க்க வேண்டும். எலிகளின் பெருக்கத்தைக் கட்டுப்படுத்துவதும், பாதுகாப்பான குடிநீரைப் பயன்படுத்துவதும் அவசியமாகும். தேசிய வழிகாட்டலின்படி, ஆபத்து உள்ளவர்கள் மருத்துவ ஆலோசனையுடன் தடுப்பு மாத்திரைகளை பெற்றுக்கொள்ளலாம்.

மழை காலங்களில் காய்ச்சலை அலட்சியப்படுத்தாமல், உரிய நேரத்தில் மருத்துவ ஆலோசனையைப் பெறுவதன் மூலம் எலிக்காய்ச்சலில் இருந்து முழுமையாகப் பாதுகாத்துக்கொள்ள முடியும். பொதுமக்கள் அனைவரும் உங்களது இந்த அறிவுறுத்தல்களைப் பின்பற்றி பாதுகாப்பாக இருக்க வேண்டும் என தெரிவித்துள்ளார். 

இலங்கையில் அதிரடியாக கைது செய்யப்பட்ட வெளிநாட்டு கும்பல்! சிக்கிய பாரிய மோசடி

சற்றுமுன்னர் நீதிமன்றத்தில் முன்னிலைப்படுத்தப்பட்ட நாமல்! பிணை கோரிக்கை தொடர்பில் பிறப்பிக்கப்படவுள்ள உத்தரவு