பயங்கரவாதத் தடைச் சட்டத் திருத்தத்தின் மூலம் இராணுவத்துக்குப் பொலிஸாரின் அதிகாரங்கள்! மொட்டு தரப்பு கடும் கண்டனம்

வடக்கு, கிழக்கு மக்களின் முக்கிய கோரிக்கைகளில் ஒன்றான அவசரகாலச் சட்டத்தின் பயன்பாட்டைக் குறைப்பதற்கு மாறாக, பயங்கரவாதத் தடைச் சட்டத்தில் மேற்கொள்ளப்படவுள்ள திருத்தத்தின் மூலம் பொதுமக்கள் தொடர்பான நடவடிக்கைகளில் இராணுவத்துக்குப் பொலிஸாருக்கு ஒத்த அதிகாரங்கள் வழங்கப்படுகின்றன என்று ஸ்ரீலங்கா பொதுஜன பெரமுனவின் முன்னாள் நாடாளுமன்ற உறுப்பினரும் சட்டத்தரணியுமான பிரேம்நாத் சி. தொலவத்த சுட்டிக்காட்டினார்.

இது தொடர்பில் ஊடகங்களிடம் அவர் மேலும் கருத்துத் தெரிவிக்கையில்,

பயங்கரவாதத் தடைச் சட்டம்

"பயங்கரவாதத் தடைச் சட்டம் கடந்த இரண்டு, மூன்று தசாப்தங்களாகவும், குறிப்பாக போர்க் காலத்திலும் அதிகளவில் பயன்படுத்தப்பட்டது. போர் நிறைவடைந்த பின்னர், இந்தச் சட்டத்துக்குப் பதிலாக வேறு சட்டமொன்றைக் கொண்டுவர வேண்டும் என்ற கருத்துகள் முன்வைக்கப்பட்டன.

தற்போதைய அரசும் எதிர்க்கட்சியில் இருந்தபோது பயங்கரவாதத் தடைச் சட்டத்தைக் கடுமையாக விமர்சித்து, அதனை நீக்க வேண்டும் என்று தெரிவித்திருந்தது. ஆனால் தற்போது அந்தச் சட்டத்தை நீக்குவதற்குப் பதிலாக அதில் திருத்தங்களை மேற்கொள்கின்றது.

இந்தப் பயங்கரவாதத் தடைச் சட்டத் திருத்தத்தின் மூலம், பொலிஸாருக்கு வழங்கப்பட்டுள்ள சில அதிகாரங்களை இராணுவத்துக்கும் வழங்கும் நிலை உருவாகின்றது.

சாதாரண சூழ்நிலையில் பொதுமக்களுடன் தொடர்புபடுதல், அவர்களைச் சோதனையிடுதல், அவர்கள் எங்கிருந்து வருகின்றனர், எங்கு செல்கின்றனர் என்பதைக் கண்காணித்தல் போன்ற நடவடிக்கைகளில் இராணுவம் ஈடுபடக்கூடிய நிலை ஏற்படும்.

அவசரகாலச் சட்டம் நடைமுறை

வடக்கு, கிழக்கு மக்களின் முக்கிய கோரிக்கைகளில் ஒன்றாக பொதுமக்கள் தொடர்பான நடவடிக்கைகளில் இராணுவத்தின் ஈடுபாட்டைக் குறைப்பதும், அவசரகாலச் சட்டத்தின் பயன்பாட்டைக் குறைப்பதும் உள்ளது.

ஆனால், பயங்கரவாதத் தடைச் சட்டத்தில் மேற்கொள்ளப்படும் இந்தத் திருத்தத்தின் மூலம் அதற்கு மாறான நிலைமையே உருவாக்கப்படுகின்றது. அவசரகாலச் சட்டம் நடைமுறையில் இல்லாத நிலையிலும் இராணுவத்துக்கு இவ்வாறான அதிகாரங்கள் வழங்கப்பட்டால், அது அவசரகாலச் சட்டம் அமுலில் இருப்பதைப் போன்றதொரு சூழ்நிலையை ஏற்படுத்தக்கூடும்.

இதனால் மக்களின் அடிப்படை உரிமைகள் மற்றும் போராட்டம் நடத்துவதற்கான உரிமை கடுமையாகப் பாதிக்கப்படக்கூடிய ஆபத்து உருவாகும்.

இந்தச் சட்டமூலம் நாடாளுமன்றத்துக்குச் சமர்ப்பிக்கப்படும் போது, அதனை உயர்நீதிமன்றத்தில் சவாலுக்கு உட்படுத்தத் தேவையான நடவடிக்கைகள் எடுக்கப்படும். இந்த விவகாரம் தொடர்பில் சர்வதேச சமூகமும் தீவிர கவனம் செலுத்த வேண்டும் என குறிப்பிட்டார்.

பொய்க் குற்றச்சாட்டுகள் மூலம் நாமலைத் தொடர்ந்து சிறையில் அடைக்க முயற்சி! அரசு மீது மொட்டுக் கட்சி குற்றச்சாட்டு

22 ஆவது திருத்தச் சட்டம் ஜனநாயக முறைப்படியே நிறைவேற்றம்! குற்றச்சாட்டுகளுக்கு அமைச்சர் நளிந்த பதிலடி