லங்காசிறி FM
திலீபனின் நினைவிடத்தில் பொலிஸாரால் அகற்றப்பட்ட ஒலிபெருக்கி.. கஜேந்திரகுமார் வெளியிட்ட தகவல்
தியாக தீபம் திலீபனின் நினைவிடத்தில் அனுமதியின்றி ஒலிபெருக்கி பயன்படுத்தப்பட்டது எனக் குற்றஞ்சாட்டி, அங்கிருந்த ஒலிபெருக்கிச் சாதனங்களை யாழ்ப்பாணம் பொலிஸார் பறிமுதல் செய்துள்ளனர்.
இந்நிலையில், இவ்விவகாரம் தொடர்பில் நாடாளுமன்ற உறுப்பினர் கஜேந்திரகுமார் பொன்னம்பலம் வெளியிட்டுள்ள முகப்புத்தக பதிவில், "இன்று பிற்பகல் யாழ்ப்பாணம் பொலிஸ் அத்தியட்சகரை தொலைபேசியில் தொடர்புகொண்டு அவருடன் பேசினேன்.
தியாகதீபம் திலீபனின் நினைவேந்தல் நிகழ்விற்காக ஏற்பாடு செய்யப்பட்டிருந்த நிகழ்வில் பயன்படுத்தப்பட்ட ஒலியமைப்பை, பொலிஸாரின் அனுமதி பெறப்படவில்லை என்ற காரணத்தினால் பொலிஸார் அகற்றியுள்ளதாக அவரிடம் தெரிவித்தேன்.
புலனாய்வுத் தகவல் அறிக்கை
நிகழ்வை ஏற்பாடு செய்த குழுவின் உறுப்பினர்கள், ஒலிபெருக்கி அமைப்பைப் பயன்படுத்துவதற்கான அனுமதியைக் கோரி எழுத்துமூலமான கோரிக்கையுடன் யாழ்ப்பாணம் பொலிஸாரிடம் சென்றபோது, தலைமையக ஆய்வாளர் அங்கு இல்லை என்றும், விண்ணப்பத்தை இன்று சமர்ப்பிக்குமாறும் கூறி, அந்தக் கோரிக்கையை ஏற்க பொலிஸார் மறுத்துள்ளனர்.
இன்று மீண்டும் ஏற்பாட்டாளர்கள் எழுத்துமூலமான கோரிக்கையுடன் பொலிஸாரிடம் சென்றபோதும், அதனை ஏற்க பொலிஸார் மறுத்துள்ளனர்.
இதையடுத்து பொலிஸ் அத்தியட்சகர், தலைமையக ஆய்வாளருடன் தாம் பேசுவதாகவும், ஏற்பாட்டாளர்களை மீண்டும் அனுமதி கோருமாறு அறிவுறுத்துவதாகவும் என்னிடம் தெரிவித்தார்.
சில நிமிடங்களுக்குப் பின்னர் யாழ்ப்பாணம் தலைமையக ஆய்வாளர், என்னைத் தொலைபேசியில் தொடர்புகொண்டு, ஒலிபெருக்கி அமைப்பைப் பயன்படுத்துவதற்கான அனுமதியைக் கோரி ஏற்பாட்டாளர்களை விண்ணப்பிக்குமாறு அவர்களிடம் தெரிவிக்கும்படி கேட்டுக்கொண்டார்.
எனினும், புலனாய்வுத் தகவல் அறிக்கை (Intelligence Report) பெறப்பட்ட பின்னரே அனுமதி வழங்கப்படும்” என்றும் அவர் தெரிவித்தார்.
