ராஜபக்சக்கள் - ரணில் மீதான குற்றச்சாட்டுகள்.. அநுரவுக்க வழங்கப்பட்டுள்ள அறிவுரை

ராஜபக்ச குடும்பத்தினருக்கும், முன்னாள் ஜனாதிபதி ரணில் விக்ரமசிங்க உள்ளிட்ட அரசியல் தரப்பினருக்கும் எதிராக முன்வைக்கப்பட்டுள்ள குற்றச்சாட்டுகள் தொடர்பில் எவ்வித பாகுபாடுமின்றிச் சட்ட நடவடிக்கைகள் முன்னெடுக்கப்பட வேண்டும் என்று ஜனபலய அமைப்பின் செயற்குழு உறுப்பினர் விதர்ஷன கன்னங்கர வலியுறுத்தியுள்ளார்.

கொழும்பு, பொரளை என்.எம். பெரேரா நிலையத்தில் நேற்று (01) நடைபெற்ற விசேட ஊடகவியலாளர் சந்திப்பில் கலந்துகொண்டு கருத்துத் தெரிவிக்கையிலேயே அவர் மேற்கண்டவாறு குறிப்பிட்டார்.

அவர் மேலும் தெரிவிக்கையில், "நாமல் ராஜபக்ச மீதான எயார்பஸ் கொள்வனவு பணமோசடி குற்றச்சாட்டில் அவருக்குப் பிணை வழங்கப்பட்ட போதிலும், ஏனைய வழக்குகள் தொடர்ந்தும் முன்னெடுக்கப்படுவதால் அவர் மீதான அனைத்துக் குற்றச்சாட்டுகளும் முடிவுக்கு வந்துவிட்டதாகக் கருத முடியாது.

 உரிய விசாரணைகள்

அதேபோன்று, ஷிரந்தி ராஜபக்சவுடன் தொடர்புடைய நிதி முறைகேடுகள் குறித்து உரிய விசாரணைகள் நடத்தப்பட வேண்டும்.

முன்னாள் ஜனாதிபதி ரணில் விக்ரமசிங்க மற்றும் அவரைச் சுற்றியுள்ள அரசியல் குழுவினர் மீதான முறையற்ற பணப் பயன்பாடு, வெளிநாடுகளுக்குப் பணம் கொண்டு செல்லப்பட்டமை மற்றும் மத்திய வங்கி விவகாரத்துடன் தொடர்புடையவர்களைப் பாதுகாத்தமை போன்ற குற்றச்சாட்டுகள் தீவிரமாக விசாரிக்கப்பட வேண்டும். அரசியல் தரப்பின் அடிப்படையில் சட்டம் வேறுபட்ட முறையில் நடைமுறைப்படுத்தப்படக் கூடாது.

ராஜபக்ச குடும்பத்தினராக இருந்தாலும், ரணில் விக்ரமசிங்கவைச் சுற்றியுள்ள குழுவினராக இருந்தாலும் அல்லது வேறு எந்தத் தரப்பாக இருந்தாலும் குற்றச்சாட்டுகள் ஒரே அளவுகோலில் பரிசீலிக்கப்பட வேண்டும்.

ஒருவரைப் பாதுகாப்பதற்காகவும் மற்றொருவரைப் பழிவாங்குவதற்காகவும் சட்டம் பயன்படுத்தப்படக் கூடாது. குற்றச்சாட்டுகள் நிரூபிக்கப்பட்டால் சட்டப்படி நடவடிக்கை எடுக்கப்பட வேண்டும்.

நிரூபிக்கப்படாவிட்டால் சட்டரீதியாக விடுவிக்கப்பட வேண்டும். நாட்டின் பொருளாதார வீழ்ச்சி மற்றும் பொதுச் செல்வ இழப்புக்குப் பொறுப்புக்கூற வேண்டிய அனைவரும் விசாரணைக்கு உட்படுத்தப்பட்டு உண்மைகள் வெளிக்கொணரப்பட வேண்டும்." என்றார்.

நான்கு மணிநேர விசாரணை.. அடுத்து சிக்கப் போகும் மிக முக்கிய புள்ளி

திலீபன் சிலை விவகாரத்தில் உண்மையில் என்ன நடந்தது..! என்பிபி தரப்பின் முக்கிய விளக்கம்