கொட்டும் மழையிலும் தீபாவளிக் கொண்டாட்டத்திற்குத் தயாராகும் மலையக மக்கள்!

Diwali Sri Lanka Upcountry People Sri Lankan Tamils Sri Lanka Government Hatton

By Malaivanjan Nov 07, 2026 07:59 AM GMT

Malaivanjan

in சமூகம்

Report

தொடர்ச்சியாகப் பெய்துவரும் மழைக்கு மத்தியிலும், தீபத்திருநாளான தீபாவளிப் பண்டிகையை மகிழ்ச்சியுடன் கொண்டாடுவதற்காக மலையக மக்கள் தயாராகி வருவதாக எமது செய்தியாளர் தெரிவித்துள்ளார்.

தீபாவளியை முன்னிட்டு ஆடைகள் உள்ளிட்ட அத்தியாவசியப் பொருட்களைக் கொள்வனவு செய்வதற்காக பெருந்தோட்டப் பகுதிகளிலிருந்தும் நகர்ப்புறங்களிலிருந்தும் பெருமளவிலான மக்கள் மலையக நகரங்களை நோக்கி வருகை தந்துள்ளனர்.

குறிப்பாக, ஹட்டன் நகரில் இன்று(07.11.2026) காலை முதல் மக்கள் நடமாட்டம் அதிகரித்துக் காணப்பட்டதுடன், இதன் காரணமாக நகரின் பிரதான வீதிகளில் வாகன நெரிசலும் ஏற்பட்டிருந்தது.

கொட்டும் மழையிலும் தீபாவளிக் கொண்டாட்டத்திற்குத் தயாராகும் மலையக மக்கள்! | Hill Country People Preparing For Deepavali

இதற்கிடையில், பாதசாரிகளின் போக்குவரத்துக்கு இடையூறு ஏற்படும் வகையில் நடைபாதைகளில் வைக்கப்பட்டிருந்த வர்த்தகப் பொருட்களை ஹட்டன் - டிக்கோயா நகர சபை அதிகாரிகள் அகற்றுவதற்கும் நடவடிக்கை எடுத்திருந்தனர்.

கனமழையுடன் தீபாவளி கொண்டாட்டம்

எனினும், கடந்த வருட தீபாவளியுடன் ஒப்பிடுகையில், இம்முறை ஹட்டன் நகரில் பொருட்களைக் கொள்வனவு செய்வதற்காக வருகை தந்த மக்களின் எண்ணிக்கை குறைவாகக் காணப்படுவதாக வர்த்தகர்கள் தெரிவிக்கின்றனர். பொருட்களின் விலையேற்றம் மற்றும் நிலவும் சீரற்ற காலநிலை ஆகியன இதற்கான காரணங்களாக இருக்கலாம் எனப் பொதுமக்கள் கருத்துத் தெரிவிக்கின்றனர்.

மேலும், நகருக்கு வருகை தரும் மக்களின் பாதுகாப்பைக் கருத்திற்கொண்டு ஹட்டன் பொலிஸார் அதிகளவில் பாதுகாப்புக் கடமைகளில் ஈடுபடுத்தப்பட்டிருந்ததுடன், பொதுமக்களின் போக்குவரத்து வசதியைக் கருத்திற்கொண்டு பல விசேட பேருந்து சேவைகளும் முன்னெடுக்கப்பட்டிருந்தன.

கொட்டும் மழையையும் பொருட்படுத்தாது தீபாவளிக் கொண்டாட்டத்திற்காக மலையக மக்கள் தயாராகி வருகின்றமை குறிப்பிடத்தக்கது.