கொழும்பு மாவட்டத்திற்கு மேலதிகமாக ஓரு நாடாளுமன்ற ஆசனம்

கொழும்பு மாவட்டத்திற்கு மேலதிகமாக ஓரு நாடாளுமன்ற ஆசனம் சேர்க்கப்பட்டுள்ளதாக தேர்தல் ஆணைக்குழு அறிவித்துள்ளது.

தேர்தல் மாவட்ட ஆசன ஒதுக்கீட்டின்படி, கொழும்பு தேர்தல் மாவட்டத்திற்கான நாடாளுமன்ற ஆசனங்களின் எண்ணிக்கை ஒன்றாக அதிகரித்துள்ளதுடன், பதுளை மாவட்டத்திற்கான ஆசனம் ஒன்று குறைக்கப்பட்டுள்ளது.

நவம்பர் 3ஆம் திகதி தேர்தல் ஆணைக்குழு வெளியிட்ட ஊடக அறிக்கையில், 2024 பொதுத் தேர்தலில் 18 ஆக இருந்த கொழும்பு மாவட்டத்திற்கான நாடாளுமன்ற ஆசன ஒதுக்கீடு 19 ஆக உயர்த்தப்பட்டுள்ளதாகத் தெரிவிக்கப்பட்டுள்ளது.

அதேவேளை, பதுளை மாவட்டத்திற்கான ஆசன ஒதுக்கீடு ஒன்பதிலிருந்து எட்டாகக் குறைக்கப்பட்டுள்ளது.

எஞ்சிய 20 தேர்தல் மாவட்டங்களுக்குமான ஆசன ஒதுக்கீடுகளில் 2024 நாடாளுமன்றத் தேர்தலுடன் ஒப்பிடுகையில் எவ்வித மாற்றமும் செய்யப்படவில்லை.

தேர்தல் ஆணைக்குழுவின் தரவுகளின்படி, 2026 ஆம் ஆண்டின் முதன்மை வாக்காளர் பதிவேடு மற்றும் முதலாவது மேலதிக பதிவேட்டின் கீழ் இலங்கையில் மொத்தம் 17,534,397 பதிவு செய்யப்பட்ட வாக்காளர்கள் உள்ளனர்.

நாடாளுமன்றப் பிரதிநிதித்துவத்தில் கம்பஹா மற்றும் கொழும்பு ஆகிய மாவட்டங்கள் தலா 19 ஆசனங்களுடன் முதலிடத்தில் உள்ளன.

இவற்றைத் தொடர்ந்து குருணாகல் 15 ஆசனங்களையும், கண்டி 12 ஆசனங்களையும், களுத்துறை மற்றும் இரத்தினபுரி ஆகிய மாவட்டங்கள் தலா 11 ஆசனங்களையும் கொண்டுள்ளன.

அரசியலமைப்பின் 98(8) ஆம் பிரிவின் கீழ் இந்த ஆசன ஒதுக்கீடுகள் தீர்மானிக்கப்பட்டு, ஒக்டோபர் 19ஆம் திகதியிட்ட 2511/02 ஆம் இலக்க அதிவிசேட வர்த்தமானி அறிவித்தல் மூலம் பிரசுரிக்கப்பட்டுள்ளதாக ஆணைக்குழு தெரிவித்துள்ளது.

இலங்கையின் தேர்தல் முறையின் கீழ், நாட்டின் 22 தேர்தல் மாவட்டங்களில் இருந்து 196 நாடாளுமன்ற உறுப்பினர்கள் தேர்ந்தெடுக்கப்படுவதுடன், தேசியப் பட்டியலின் மூலம் 29 உறுப்பினர்கள் நியமிக்கப்பட்டு, நாடாளுமன்ற ஆசனங்களின் மொத்த எண்ணிக்கை 225 ஆக அமைகின்றது.

இந்த மாற்றியமைக்கப்பட்ட ஆசன ஒதுக்கீடு தற்போதைய நாடாளுமன்றத்தின் அமைப்பில் எவ்வித தாக்கத்தையும் ஏற்படுத்தாது என்றும், உரிய வாக்காளர் பதிவேட்டின் கீழ் நடாத்தப்படும் எதிர்கால நாடாளுமன்றத் தேர்தலிலேயே மாவட்டப் பிரதிநிதித்துவத்தை தீர்மானிக்கும் என்றும் தெரிவிக்கப்பட்டுள்ளது.