பொய்க் குற்றச்சாட்டுகள் மூலம் நாமலைத் தொடர்ந்து சிறையில் அடைக்க முயற்சி! அரசு மீது மொட்டுக் கட்சி குற்றச்சாட்டு

நாட்டில் உள்ள மக்கள் நாமல் ராஜபக்சவின் தலைமைத்துவத்தைச் சுற்றி மிகவும் வலுவாக அணிதிரண்டு வரும் இவ்வேளையில், தற்போதைய அரசு பொய்க் குற்றச்சாட்டுகளைச் சுமத்தியும் சட்டத்தைத் தவறாகப் பயன்படுத்தியும் அவரைச் சிறையில் தொடர்ந்து அடைத்து வைக்க முயற்சிக்கின்றது என்று ஸ்ரீலங்கா பொதுஜன பெரமுனவின் பொதுச்செயலாளர் சாகர காரியவசம் குற்றம் சாட்டியுள்ளார்.

பத்தரமுல்ல நெலும் மாவத்தையிலுள்ள ஸ்ரீலங்கா பொதுஜன பெரமுனவின் கட்சித் தலைமையகத்தில் நேற்று நடைபெற்ற ஊடகவியலாளர் சந்திப்பில் கருத்துத் தெரிவிக்கும்போதே அவர் மேற்கண்டவாறு குறிப்பிட்டார்.

அவர் அங்கு மேலும் தெரிவிக்கையில்,

"அரசின் பொய்களுக்கு எதிராக நாட்டின் மக்கள் நாமல் ராஜபக்சவின் தலைமைத்துவத்தைச் சுற்றித் திரண்டு வருவதால், தற்போதைய அரசு அவருக்குக் கடுமையாக அஞ்சுகின்றது.

நாங்கள் அஞ்சவில்லை

சட்டபூர்வமான விசாரணைகளுக்கோ அல்லது நியாயமான வழக்கு விசாரணைகளுக்கோ முகங்கொடுக்க நாங்கள் எப்போதுமே அஞ்சவில்லை.

எம்மில் எவருக்கு எதிராகக் குற்றச்சாட்டுகள் இருந்தாலும், அவற்றை நீதிமன்றத்தின் முன் கொண்டுவந்து நிரூபித்துத் தண்டனை வழங்கினால் சட்டத்துக்குத் தலைவணங்கத் தயார். ஆனால், இங்கு பொய்க் குற்றச்சாட்டுகள் மூலம் திட்டமிட்ட பழிவாங்கும் நடவடிக்கையே முன்னெடுக்கப்படுகின்றது.

காரல்டன் ரக்பி செவன்ஸ் போட்டிகளுக்காக கிரிஷ் நிறுவனம் வழங்கிய நிதி தொடர்பாக மீண்டும் புதிய வழக்குத் தாக்கல் செய்யப்பட்டுள்ளது.

இது குறித்த விசாரணைகள் ஏற்கனவே மேல் நீதிமன்றத்தில் நிலுவையில் உள்ள நிலையில், அது 2026 நவம்பர் 16 ஆம் திகதி விசாரணைக்கு எடுத்துக்கொள்ளப்படவுள்ளது.

இந்நிலையில், 2026 செப்டம்பர் 24 அன்று இலஞ்ச, ஊழல் ஒழிப்பு ஆணைக்குழு, கிரிஷ் நிறுவனத்தின் இலங்கை பிரதிநிதியாக இருந்த ஜானகி சிறிவர்தன என்பவரை, நாமல் ராஜபக்சவுக்கு 70 மில்லியன் ரூபா இலஞ்சம் கொடுத்தார் என்ற குற்றச்சாட்டில் கைது செய்து விளக்கமறியலில் வைத்துள்ளது.

ஏற்கனவே மேல் நீதிமன்றத்தில் உள்ள அதே 70 மில்லியன் ரூபா விவகாரத்தில், தற்போது இலஞ்ச, ஊழல் ஒழிப்பு ஆணைக்குழு 'லஞ்சம்' என்ற புதிய கோணத்தில் வழக்குப் பதிவு செய்துள்ளது.

நாட்டின் பிரதான சட்ட அதிகாரியான சட்டமா அதிபரின் தீர்மானத்தையும் மீறி, முற்றிலும் முரண்பாடான புதிய குற்றச்சாட்டைச் சுமத்துவது யாருடைய தேவைகளுக்காக? இது சட்டத்தை முற்றிலும் தவறாகப் பயன்படுத்துவதாகும்"  என குறிப்பிட்டுள்ளார்.

இந்த ஊடகவியலாளர்கள் சந்திப்பில் கருத்துத் தெரிவித்த முன்னாள் நாடாளுமன்ற உறுப்பினர் சஞ்சீவ எதிரிமான்ன,

"விசாரணை நிறுவனங்களின் பிரதான பதவிகளுக்கு நியமனங்களை மேற்கொள்ளும் அரசின் முறையை நாங்கள் கடுமையாக விமர்சித்தோம்.

இந்த அரசு நாட்டின் புலனாய்வு மற்றும் விசாரணை நிறுவனங்களை முற்றாக அரசமைப்புக்கு அப்பாற்பட்டு அரசியலாக்கியுள்ளது.

விசாரணை நிறுவனங்கள் நீதியை நிலைநாட்டும் கருவிகளாகச் செயற்படாமல், அரசியல் அதிகாரக் கருவிகளாக மாற்றப்பட்டுள்ளன.

இதனால்தான் குமார ஜயகொடிக்கு ஒரு சட்டமும், நாமல் ராஜபக்சவுக்கு வேறு ஒரு சட்டமும் நடைமுறைப்படுத்தப்படுகின்றது. புலனாய்வாளர்களின் இந்த இரட்டை நிலப்பாடானது எதிர்க்கட்சியைப் பாதிக்கப்போவதில்லை.

மாறாக, சட்டம் மீதான பொதுமக்களின் நம்பிக்கையையும், சமத்துவம் மற்றும் ஜனநாயக ஆட்சியின் சட்டப்பூர்வத் தன்மையையுமே சீர்குலைக்கும்" என குறிப்பிட்டுள்ளார்.   

50 ஆயிரம் ரூபா ஓய்வூதியம் பெறுபவரின் பரிதாப நிலை! யாசகம் பெறுபவரை தேடி வந்த சகோதரியின் மோசடித் திட்டம்

ஏகே 12 ரக துப்பாக்கிகளை பயன்படுத்தி ரஷ்யாவில் இலங்கை இராணுவத்திற்கு பயிற்சி