ரணிலுடன் பேசிய நிர்மலா! கைதான 22 இந்திய கடற்றொழிலாளர்களும் உடனே விடுதலை (Photos)

Indian fishermen Ranil Wickremesinghe India

By Rakesh Nov 19, 2023 12:21 AM GMT

Rakesh

in அரசியல்

Report

இந்திய மத்திய நிதி அமைச்சர் நிர்மலா சீதாராமனின் தலையீட்டின் பேரில், இலங்கை கடற்படையினரால் கைது செய்யப்பட்ட 22 இந்திய கடற்றொழிலாளர்கள், உடனடியாக நேற்று நள்ளிரவே அவர்களின் படகுகளுடன் விடுவிக்கப்பட்டு தமிழகத்துக்கு பத்திரமாக அனுப்பி வைக்கப்பட்டுள்ளனர்.

யாழ்ப்பாணம்-பருத்தித்துறை கடற்பரப்பில் இரண்டு படகுகளில் அத்துமீறி நுழைந்து, கடற்றொழிலில் ஈடுபட்ட குற்றத்துக்காக நேற்று மதியம் 22 இந்திய கடற்றொழிலாளர்கள் கைது செய்யப்பட்டுள்ளனர்.

ரணிலுடன் பேசிய நிர்மலா! கைதான 22 இந்திய கடற்றொழிலாளர்களும் உடனே விடுதலை (Photos) | 22 Indian Fishermen Freed

பெரும் அதிர்வலை

இதேவேளை நேற்று மாலை 5 மணிக்கு காங்கேசன்துறை துறைமுகத்துக்கு அவர்கள், அவர்களின் படகுகளுடன் கொண்டு வரப்பட்டுள்ளனர்.

இவ்வாறு இராமேஸ்வரம் கடற்றொழிலாளர்கள் 22 பேர் இலங்கை கடற்படையினரால் கைது செய்யப்பட்ட செய்தி இராமேஸ்வரத்தில் பெரும் அதிர்வலையை ஏற்படுத்தியிருந்தது.

இதேநேரம் இராமேஸ்வரத்துக்கு இரு நாள் பயணமாக இந்தியாவின் மத்திய நிதி அமைச்சர் நிர்மலா சீதாராமன் நேற்று சென்ற நிலையில், கடற்றொழிலாளர்கள் அமைப்புகளின் பிரதிநிதிகள் நிதி அமைச்சரை நேரில் சந்தித்து கைதான தமது உறவுகளை அவர்களின் படகுகளுடன் உடன் விடுவிக்க நடவடிக்கை எடுக்க வேண்டும் என கோரிக்கை விடுத்துள்ளனர்.

விடுதலை

கடற்றொழிலாளர்களின் கோரிக்கையின் பேரில் இலங்கை ஜனாதிபதி ரணில் விக்ரமசிங்கவை தொடர்பு கொண்ட இந்திய நிதி அமைச்சர், கடற்றொழிலாளர்களின் விடுதலை தொடர்பில் நடவடிக்கை எடுக்க கோரியுள்ளார்.

அதனையடுத்து 22 கடற்றொழிலாளர்களையும் கையோடு விடுவிக்க நடவடிக்கை எடுக்கப்பட்டுள்ளது.

அவர்களது படகுகளில் அவர்களை ஏற்றி அவர்களை இலங்கையின் கடல் எல்லை வரை இலங்கைக் கடற்படையினர் கூட்டிச் சென்றுள்ளனர். அங்கிருந்து இன்று அதிகாலை தமிழகத்துக்கு அவர்கள் அனுப்பி வைக்கப்பட்டுள்ளனர்.