போதைப்பொருள் பாவனையை கட்டுப்படுத்த நடவடிக்கை எடுக்க வேண்டும்: வெருகல் பிரதேச செயலாளர்

போதைப் பொருள் பாவனையால் ஏற்படும் அநியாயங்களை இல்லாதொழிக்க அனைவரும் ஒன்றினைய வேண்டும் என வெருகல் பிரதேச செயலாளர் எம்.ஏ அனஸ் தெரிவித்துள்ளார்.

தமது ஆற்றல்களை வெளிப்படுத்தி முன்மாதிரியாகத் திகழும் மகளிரைப் பாராட்டி கௌரவித்து ஊக்கமளிக்கும் நிகழ்வு வெருகல் பிரதேச செயலகத்தின் ஒழுங்குபடுத்தலில் வெருகல் பிரதேச கலாச்சார மத்திய நிலையத்தில் இடம்பெற்றுள்ளது.

இந்நிகழ்வில் கலந்து கொண்டு உரையாற்றும் போதே அவர் மேற்கண்டவாறு தெரிவித்துள்ளார்.

நாட்டில் முக்கிய தடுப்பூசிகளுக்கு தட்டுப்பாடு

பெண்கள் சிறுவர்களுக்கு எதிரான வன்முறைகள்

மேலும் உரையாற்றிய அவர்,

“வெருகல் பிரதேசத்திலிருந்து பெண்கள் சிறுவர்களுக்கு எதிரான வன்முறைகள்  நிறுத்தப்பட வேண்டும். அதற்குப் பதிலாக முன்னேறத் துடிக்கின்ற எதிர்காலத் தலைவர்களான சிறுவர் சிறுமியரை எதிர்காலத்தின் கல்வியாளர்களாக அதிகாரிகளாக அலுவலர்களாக உருவாக்க வேண்டும்.

இதற்குத் தடையாக உள்ள அத்தனை காரணிகளையும் சமூகத்திலிருந்து ஒழிக்க வேண்டும். எல்லாக் காலமும் வேறு பிரதேசங்களிலிருந்து வந்து வெருகல் பிரதேசத்திற்குச் சேவை செய்யும் அதிகாரிகளை இந்த ஊர் தொடர்ந்தும் எதிர்பார்த்துக் கொண்டிருக்கும் நிலையை மாற்றியமைக்க வேண்டும்.

அப்படிப்பட்ட ஒரு நிலையை அடைந்து கொள்வதற்காக இப்பொழுதிருந்தே இந்தப் பிரதேச மக்கள் மும்முரமாக முயற்சிகளை மேற்கொள்ள வேண்டும்” என தெரிவித்துள்ளார்.

அத்துடன் இந்நிகழ்வில் பிரதேசப் பெண்களால் அப்பிரதேசத்திலுள்ள ஒட்டுமொத்தப் பிரச்சினைகள் தேவைகள் குறித்து பிரதேச செயலாளரிடம் மனு ஒன்றும் கையளிக்கப்பட்டுள்ளது.

அந்த மனுவில் “அதிகரித்துள்ள போதைப்பொருள் பாவனை, பிரதேச மக்களுக்கு மூவேளை உணவு உண்ண முடியாத வறுமை நிலை, போஷாக்குக் குறைபாடு, தொழிலிழப்பு, உணவுப் பொருட்களின் விலை அதிகரிப்பு, மின்சாரக் கட்டணம் நீர்க்கட்டணம் ஆகியவற்றைச் செலுத்த முடியாத நிலைமை, பெண் பிள்ளைகள் பாடசாலைக் கல்வியை பூர்த்தி செய்யாது இடை விலகல், இளவயதுத் திருமணம், வீட்டு வன்முறைகள் சிறுமிகளும் பெண்களும் வன்முறைகள் ” உள்ளிட்ட பல்வேறு காரணங்களால் பெண்கள் கடுமையாக உடல் உள ரீதியில் பாதிக்கப்பட்டுள்ளதாகத் தெரிவிக்கப்பட்டுள்ளது.

மேலும் இந்நிகழ்வில் பல்வேறு பின்தங்கிய சூழ்நிலைகளுக்கும் மத்தியில் வெருகல் பிரதேச செயலகப் பிரிவில் இருந்து படித்து முன்னேறி உயர் நிலையை அடைந்து கொண்ட மகளிரும் அயற் பிரதேசங்களில் இருந்து வெருகல் பிரதேசத்தில் கடமை புரியும் பதவியிலுள்ள பெண்களும் இன்னும் பல முன்னோடிப் பெண்களும் சிறந்த முன்மாதிரி ஆற்றல் மிக்க மகளிர்களாக மேடையில் கௌரவிக்கப்பட்டுள்ளனர்.

இந்நிகழ்வில் வெருகல் பிரதேச வைத்தியசாலையின் பொறுப்பு வைத்திய அத்தியட்சகர் சாமரி விஜேசிங்ஹ வெருகல் பிரதேச சபைச் செயலாளர் சுஜாதா வரதகுமார், வெருகல் நீர் வழங்கல் அதிகாரசபை பொறுப்பதிகாரி தயானந்தி நிறோஷா, பிரதேச மகளிர் அபிவிருத்தி உத்தியோகத்தர் என்.எஸ் பானு, உட்பட பிரதேச செயலக சிறுவர், பெண்கள் பிரிவு உத்தியோகத்தர்கள், மகளிர் சங்க உறுப்பினர்கள், சமுர்த்தி சமுதாய அடிப்படை அமைப்பு அங்கத்தவர்கள் ஆகியோரும் இளைஞர் அபிவிருத்தி அகம் நிறுவனத்தின் களப் பணியாளர்களான பொன்னுத்துரை சற்சிவானந்தம் ஜெயவீரசிங்கம் தவமுரளி பயனாளிகளான கிராம மட்ட கூட்டுறவு அபிவிருத்திச் சங்க உறுப்பினர்களும் கலந்து கொண்டனர். 

இலங்கையில் இருந்து விரைவில் இரண்டு உயர்மட்ட அரச பயணங்கள்

பப்புவா நியூ கினியாவில் சக்தி வாய்ந்த நிலநடுக்கம்