கல்வி நிர்வாகத் திறன் மேம்பாட்டுப் பயிற்சிக்காக இந்தியா சென்ற இலங்கை கல்வி அதிகாரிகள்

கல்வித் திட்டமிடல், முகாமைத்துவம் மற்றும் நிர்வாகத் திறன்களை மேம்படுத்தும் நோக்கில், 20 இலங்கை கல்வி நிர்வாக அதிகாரிகள் பயிற்சித் திட்டமொன்றில் பங்கேற்பதற்காக இந்தியா சென்றுள்ளனர்.

புதுடில்லியில் உள்ள இலங்கை உயர்ஸ்தானிகராலயம் வெளியிட்ட தகவலின்படி, இந்தக் குழுவில் மத்திய, மேல், ஊவா, சபரகமுவ, வடக்கு, வடமேல் மற்றும் தென் மாகாணங்களைப் பிரதிநிதித்துவப்படுத்தும் மாகாண மற்றும் வலயக் கல்விப் பணிப்பாளர்கள் உள்ளடங்குகின்றனர்.

இந்தியாவின் தேசிய கல்வித் திட்டமிடல் மற்றும் நிர்வாக நிறுவனம் ஏற்பாடு செய்துள்ள இப்பயிற்சித் திட்டம், ஒக்டோபர் 5ஆம் திகதி முதல் 16ஆம் திகதி வரை நடைபெறுகின்றது.

பொருளாதார வளர்ச்சி

இந்த விஜயத்தின் ஒரு பகுதியாக, இலங்கை அதிகாரிகள் குழுவினர் ஒக்டோபர் 7ஆம் திகதி புதுடில்லியில் உள்ள இலங்கை உயர்ஸ்தானிகரின் உத்தியோகபூர்வ இல்லத்தில் அவரைச் சந்தித்துள்ளனர்.

இதன்போது, இலங்கையின் பொருளாதார வளர்ச்சி மற்றும் அபிவிருத்திக்கு ஆதரவளிப்பதில் இந்தியா – இலங்கை கூட்டாண்மையின் முக்கியத்துவத்தை உயர்ஸ்தானிகர் வலியுறுத்தினார்.

குறிப்பாக, திறன் மேம்பாடு, தொழில்திறன் விருத்தி, முதலீடு, வர்த்தகம் மற்றும் சுற்றுலாத்துறை ஆகியவற்றின் ஊடாக இரு நாடுகளுக்கும் இடையிலான ஒத்துழைப்பை மேலும் வலுப்படுத்த வேண்டியதன் அவசியத்தையும் அவர் சுட்டிக்காட்டினார்.

கலாசார உறவுகள்

மேலும், இரு நாடுகளுக்கும் இடையே நீண்டகாலமாக நிலவி வரும் கலாசார உறவுகள் மற்றும் மக்கள் மட்டத்திலான தொடர்புகள், இருதரப்பு ஒத்துழைப்பை வலுப்படுத்துவதற்கான அடித்தளமாக அமைந்துள்ளதாகவும் அவர் குறிப்பிட்டார்.

இந்தப் பயிற்சித் திட்டத்தின் மூலம் இலங்கை கல்வி நிர்வாக அதிகாரிகளின் தொழில்சார் அறிவையும் திறன்களையும் மேம்படுத்துவதே நோக்கமாகும் என இலங்கை உயர்ஸ்தானிகராலயம் தெரிவித்துள்ளது.

மதுபோதையில் இருந்த சிவில் பாதுகாப்பு அதிகாரிகள் கைது

வெள்ளத்தில் அடித்துச் செல்லப்பட்ட மூன்று பிள்ளைகளின் தாய் மாயம்! ஊவா பரணகமவில் சோகம்