2027 - வரவு செலவுத் திட்டம் ஜனாதிபதியால் சமர்ப்பிப்பு! அதிகரிக்கப்பட்டுள்ள கொடுப்பனவுகள்

‘சொந்தமாக ஓர் இடம் – அழகானதொரு வாழ்வு’ திட்டத்தின் கீழ் 70,000 வீடுகளை அமைப்பதற்குத் திட்டமிடப்பட்டுள்ளது. இதில் 2027 ஆம் ஆண்டில் 10,000 புதிய வீடுகளைக் கட்டுவதற்கு எதிர்பார்க்கப்படுகிறது.

இந்தத் திட்டத்தின் கீழ், ஒரு வீட்டிற்கு வழங்கப்படும் வீட்டுவசதி உதவித்தொகை 1 மில்லியன் ரூபாயிலிருந்து 1.5 மில்லியன் ரூபாயாக அதிகரிக்கப்படும்.

யுத்தத்தால் இடம்பெயர்ந்த சுமார் 13,000 குடும்பங்கள் இன்னும் மீள்குடியேற்றப்பட வேண்டியுள்ளன. இவர்களை இரண்டு ஆண்டுகளுக்குள் மீள்குடியேற்ற அரசாங்கம் இலக்கு நிர்ணயித்துள்ளது.

இதற்காக ஏற்கனவே ஒதுக்கப்பட்ட 6,000 மில்லியன் ரூபாயுடன், மேலதிகமாக 4,000 மில்லியன் ரூபாய் ஒதுக்கீடு செய்ய முன்மொழியப்பட்டுள்ளது.

குறைந்த வருமானம் ஈட்டுபவர்களுக்காக 70,000 வீடுகளை அமைக்கும் இலக்கின் ஒரு பகுதியாக, 2027-ஆம் ஆண்டில் 10,000 வீடுகளைக் கட்டுவதற்கு எதிர்பார்க்கப்படுகிறது.

ஒரு வீட்டிற்கான உதவித்தொகை 1 மில்லியன் ரூபாயிலிருந்து 1.5 மில்லியன் ரூபாயாக அதிகரிக்கப்படவுள்ளது; இதற்காக 15,000 மில்லியன் ரூபாய் ஒதுக்கீடு செய்ய முன்மொழியப்பட்டுள்ளது.

நீண்டகாலமாகச் சரியாகப் பராமரிக்கப்படாத தொடருந்து நிலையங்களைச் சீரமைக்கும் திட்டத்திற்காக, 2027 ஆம் ஆண்டில் 2,000 மில்லியன் ரூபாய் ஒதுக்கீடு செய்யப்பட்டுள்ளது.

நீண்டகாலமாகச் சரியாகப் பராமரிக்கப்படாத  தொடருந்து நிலையங்களைச் சீரமைக்கும் திட்டத்திற்காக, 2027 ஆம் ஆண்டில் 2,000 மில்லியன் ரூபாய் ஒதுக்கீடு செய்யப்பட்டுள்ளது.

முன்கூட்டிய எச்சரிக்கை மற்றும் அவசரகால மீட்பு நடவடிக்கைகளை வலுப்படுத்துவதற்காக, பேரிடர் காலங்களில் பயன்படுத்தப்படும் உபகரணங்களை கொள்முதல் செய்ய 500 மில்லியன் ரூபா நிதி ஒதுக்கப்பட்டுள்ளது.

கொத்மலை அணையில் தற்போது நடைமுறையில் உள்ள, அணையின் கதவுகள் திறக்கப்படும்போது எச்சரிக்கை ஒலியை எழுப்பும் முறையை மேலும் மேம்படுத்த வேண்டியது அவசியம்.

வெளிநாடுகளில் பணிபுரியும் தொழிலாளர்களுக்கு 5 மில்லியன் ரூபா வரையிலான சலுகை அடிப்படையிலான வீட்டுக்கடன் திட்டத்தை ஜனாதிபதி அறிவித்துள்ளார்.

இதில், முதல் 3 மில்லியன் ரூபா கடன் தொகைக்கு 10 சதவீத வட்டி மானியமும், எஞ்சிய 2 மில்லியன் ரூபா கடன் தொகைக்கு 5 சதவீத வட்டி மானியமும் வழங்கப்படும்.

குறைந்த வருமானம் கொண்ட குடும்பங்களுக்குத் தொடர்ந்து நிதி உதவியை வழங்குவதற்காக, 'அஸ்வெசும'   உள்ளிட்ட சமூகப் பாதுகாப்புத் திட்டங்களுக்காக 2027 ஆம் ஆண்டில் 230 பில்லியன் ரூபாயை அரசாங்கம் ஒதுக்கியுள்ளது.

சர்வதேசப் போட்டிகளில் தங்கப் பதக்கம் வெல்பவர்களுக்கான பாராட்டுப் பரிசாக, ஒலிம்பிக் தங்கப் பதக்கத்திற்கு 100 மில்லியன் ரூபாயும், உலக தடகள சாம்பியன்ஷிப் தங்கப் பதக்கத்திற்கு 100 மில்லியன் ரூபாயும் ஒதுக்கப்பட்டுள்ளது. 

பொதுநலவாய (Commonwealth) விளையாட்டுப் போட்டிகளில் தங்கப் பதக்கத்திற்கு 75 மில்லியன் ரூபாயும், ஆசிய விளையாட்டுப் போட்டிகளில் தங்கப் பதக்கத்திற்கு 50 மில்லியன் ரூபாயும், சார்க் (SAARC) விளையாட்டுப் போட்டிகளில் தங்கப் பதக்கத்திற்கு 15 மில்லியன் ரூபாய் வழங்குவதற்கு தீர்மானிக்கப்பட்டுள்ளது.  

இதற்கிணங்க, இப்போட்டிகளிலும் பிற சர்வதேசப் போட்டிகளிலும் வெள்ளி மற்றும் வெண்கலப் பதக்கங்களை வெல்பவர்களுக்கும் பாராட்டுப் பரிசுகளை வழங்க முன்மொழியப்பட்டுள்ளது.

பெருந்தோட்டத் தொழிலாளர்களுக்கு கடந்த ஆண்டு அறிமுகப்படுத்தப்பட்ட 200 ரூபாய் நாளாந்த ஊக்குவிப்புக் கொடுப்பனவு, 2027ஆம் ஆண்டும் தொடர்ந்து வழங்குவதற்கு ஏற்பாடுகள் செய்யப்பட்டுள்ளன.

2027ஆம் ஆண்டில் பெருந்தோட்டத் துறையின் அபிவிருத்திக்காக 13 பில்லியன் ரூபாய் ஒதுக்கப்பட்டுள்ளது. 

இலங்கையின் விவசாயத் துறைக்குத் தேவையான அடிப்படை இனப்பெருக்க கால்நடைகளை வெளிநாடுகளிலிருந்து இறக்குமதி செய்வதற்காக 1,500 மில்லியன் ரூபா ஒதுக்கீடு செய்யப்பட்டுள்ளது.

மில்கோ நிறுவனத்தின் படல்கம நிலையத்திற்கு 3,000 மில்லியன் ரூபா ஒதுக்கப்பட்டுள்ளது.

உணவுப் பாதுகாப்புக்காக ஏற்கனவே ஒதுக்கப்பட்டிருந்த 700 மில்லியன் ரூபாவுடன் மேலதிகமாக 300 மில்லியன் ரூபா ஒதுக்கப்பட்டுள்ளது.

இது, தெரிவுசெய்யப்பட்ட கூட்டுறவுச் சங்கங்கள் நெல் சந்தைப்படுத்தல் சபையிடமிருந்து நெல்லைக் கொள்வனவு செய்யவும், தமது செயல்பாடுகளை விரிவுபடுத்தவும், அரிசி பதப்படுத்துதலுக்குத் தேவையான இயந்திரங்களைக் கொள்வனவு செய்யவும் உதவும்.

பயிரிடப்படாத மற்றும் குறைந்த உற்பத்தித்திறன் கொண்ட நெல் நிலங்களை, விரிவான ஆய்வுக்கு உட்படுத்திய பின்னர், ஏனைய பயிர்களை (field crops) மற்றும் நிரந்தரப் பயிர்களை (permanent crops) பயிரிடுவதற்குப் பயன்படுத்த உரிமையாளர்களுக்கு அதிக நெகிழ்வுத்தன்மை வழங்கப்படும்.

இத்தகைய போதிய பயன்பாட்டில் இல்லாத நிலங்களில் விவசாயத்தை ஊக்குவிப்பதற்காக அரசாங்கம் 1.55 பில்லியன் ரூபாவை ஒதுக்கியுள்ளது.

190 மில்லியன் அமெரிக்க டொலர் கடனில் கட்டப்பட்டு, 2013 ஆம் ஆண்டு முதல் செயல்பாட்டுக்கு வந்த மத்தள சர்வதேச விமான நிலையம், இன்று (2026) வரை 70,000 மில்லியன் ரூபாய்க்கும் அதிகமான திரண்ட நஷ்டத்தைப் பதிவு செய்துள்ளதாக ஜனாதிபதி தெரிவித்தார்.

மேலும், இந்த நஷ்டம் ஆண்டுதோறும் அதிகரித்து வருகிறது.

எனவே, விமான நிலைய செயல்பாடுகள், தரவு மையங்கள், உணவு மற்றும் கேட்டரிங் சேவைகள், மற்றும் விமான பராமரிப்பு சேவைகள் ஆகிய துறைகளை சர்வதேச நிறுவனங்களுடன் இணைந்து மேம்படுத்துவதற்காக, 'ஆர்வ வெளிப்பாட்டு கோரிக்கைகள்' (EOI) கோரப்பட்டு, அந்த நடைமுறை நிறைவடைந்துள்ளது.

தேர்ந்தெடுக்கப்பட்ட நிறுவனங்களிடமிருந்து 'முன்மொழிவு கோரிக்கைகளை' (RFP) பெறுவதற்கான நடவடிக்கைகள் எடுக்கப்பட்டு வருகின்றன. அடுத்த ஓராண்டுக்குள் இதற்கான புதிய முதலீட்டாளர்களைத் தேர்ந்தெடுக்க எதிர்பார்க்கிறோம்.

இரத்மலானை சர்வதேச விமான நிலையமானது, விமானிகள் பயிற்சி, உள்நாட்டு விமான சேவை, வணிக ரீதியான விமான சேவை மற்றும் பிராந்திய விமான சேவை ஆகியவற்றுக்காக மேம்படுத்தப்படும் என்று ஜனாதிபதி தெரிவித்தார்.

விமானப் பாதுகாப்பை உறுதி செய்யும் வகையில், தற்போதுள்ள ஓடுபாதையைச் சீரமைக்கவும், அதன் நீளத்தை 1,400 மீட்டரிலிருந்து 1,771 மீட்டராக நீட்டிக்கவும் 6,000 மில்லியன் ரூபாய் மதிப்பிலான திட்டம், இலங்கை விமான நிலைய மற்றும் விமான சேவைகள் நிறுவனத்தின் (AASL) நிதியுதவியுடன் 2027-ஆம் ஆண்டு தொடங்கப்படும்.

திருகோணமலை துறைமுகத்தில் 'ட்ரின்கோ பெட்ரோலியம் டெர்மினல் (பிரைவேட்) லிமிடெட்' (Trinco Petroleum Terminal (Private) Limited) நிறுவனத்திற்குச் சொந்தமான 61 எரிபொருள் தாங்கிகளில் 29 தாங்கிகளை, பொது-தனியார் கூட்டாண்மை (PPP) அடிப்படையில் மேம்படுத்துவதற்கான முதலீட்டு முன்மொழிவுகள் 2027-ஆம் ஆண்டு கோரப்படவுள்ளதாக ஜனாதிபதி தெரிவித்தார்.

இந்த நிறுவனம் இலங்கை பெற்றோலியக் கூட்டுத்தாபனம் மற்றும் லங்கா ஐஓசி (Lanka IOC) ஆகியவற்றின் கூட்டு முயற்சியால் நிறுவப்பட்டது.

கிராமப்புறங்களில் தொழில்முயற்சிகளை ஊக்குவிப்பதற்காக சமுர்த்தி வங்கிகள் ஊடாக 5,000 மில்லியன் ரூபாய் பெறுமதியான கடன் திட்டமொன்றை அரசாங்கம் முன்மொழிந்துள்ளது.

இதன்படி, 4 சதவீத சலுகை வட்டி வீதத்தில் கடன்கள் வழங்கப்படவுள்ளன. எஞ்சிய வட்டிச் செலவை திறைசேரி பொறுப்பேற்கும்.

இந்தக் கடன் வசதியைப் பெற்றுக்கொள்ளும் தொழில்முயற்சியாளர்கள் குறைந்தபட்சம் அஸ்வெசும நலன்புரித் திட்டத்தின் ஐந்து பயனாளிகளுக்காவது வேலைவாய்ப்பு வழங்கியிருக்க வேண்டும்.

கொழும்பு வடக்கு துறைமுகத்தை அபிவிருத்தி செய்வதற்காக தற்போது முன்னெடுக்கப்பட்டு வரும் சாத்தியக்கூறு ஆய்வு அடுத்த ஆண்டு முதல் அரையாண்டில் நிறைவடையும் என எதிர்பார்க்கப்படுகின்றது.

உள்நாட்டு தங்குமிடச் சுற்றுலாத் துறையின் (Home-stay Tourism) அபிவிருத்திக்கு ஆதரவளிப்பதற்காக 7.5 பில்லியன் ரூபாய் ஒதுக்கப்படவுள்ளது.

இதன்படி, தங்குமிட வசதிகளை ஆரம்பிக்க அல்லது விரிவுபடுத்த தகுதியுடைய தொழில்முயற்சியாளர்களுக்கு வருடாந்தம் 3 சதவீத வட்டி வீதத்தில் அதிகபட்சம் 2 மில்லியன் ரூபாய் வரை சலுகைக் கடன்கள் வழங்கப்படவுள்ளன.

பெண் தலைமைத்துவக் குடும்பங்களுக்கு சலுகை அடிப்படையிலான கடன் வசதிகளை வழங்குவதற்காக 12.5 பில்லியன் ரூபா பெறுமதியான திட்டமொன்று நடைமுறைப்படுத்தப்படவுள்ளது.

இதன்படி, சமுர்த்தி வங்கிகள் ஊடாக அதிகபட்சம் 1 மில்லியன் ரூபாய் வரை கடன் தொகை வழங்கப்படும்.

இந்தக் கடன்களுககு வருடாந்தம் 3 சதவீத வட்டி அறவிடப்படுவதுடன், குழுக் கடன் அடிப்படையில் கடன் வசதிகள் வழங்கப்படவுள்ளன. 

கண்டி பல்முனை போக்குவரத்து மையத்திற்குச் செல்லும் அணுகு பாதையிலும், அலவ்வ மற்றும் முத்தேட்டுக்கல ஆகிய இடங்களில் தொடருந்து பாதைகளுக்குக் குறுக்காகவும் மேம்பாலங்கள் அமைக்கப்படும்.

தனியார் துறையில் டிஜிட்டல் ஸ்டார்ட்அப்கள் (digital startups) மற்றும் புதிய டிஜிட்டல் முயற்சிகளுக்கான நிதியுதவியை அரசாங்கம் பலப்படுத்தும்; இதற்காக 10 பில்லியன் ரூபாய்கள் ஒதுக்கீடு செய்யப்பட்டுள்ளன.

2027 ஆம் ஆண்டில் டிஜிட்டல் மாற்றத்திற்காக மொத்தம் 28.5 பில்லியன் ரூபாய்கள் ஒதுக்கப்பட்டுள்ளன. இது இலங்கையின் வரலாற்றில் டிஜிட்டல் துறைக்கு ஒதுக்கப்பட்ட மிகப்பெரிய தொகையாகும்.

தனியார் பல்கலைக்கழகங்களில் உயர்கல்வியைத் தொடரும் மாணவர்களுக்கு அரச வங்கிகள் ஊடாக வட்டியில்லாக் கடன்களைப் பெற்றுக்கொள்ளும் வசதி தொடர்ந்து வழங்கப்படும்.

இந்தத் திட்டத்தின் கீழ் மாணவர்களுக்கு தற்போது வழங்கப்படும் மாதாந்தக் கொடுப்பனவு 6,250 ரூபாவிலிருந்து 2027ஆம் ஆண்டு ஏப்ரல் மாதம் முதல் 10,000 ரூபாவாக அதிகரிக்கப்படவுள்ளது.

வவுனியா பல்கலைக்கழகத்தின் பணியாளர்களுக்கான தங்குமிட வசதிகளை நிர்மாணிக்கும் 2,050 மில்லியன் ரூபாய் பெறுமதியான திட்டம் 2027ஆம் ஆண்டு ஆரம்பிக்கப்படவுள்ளது.

டித்வா சூறாவளியால் பாதிக்கப்பட்ட பல்கலைக்கழகங்களைப் புனரமைப்பதற்காக 2027ஆம் ஆண்டில் மேலும் 750 மில்லியன் ரூபாய் ஒதுக்கப்பட்டுள்ளது. இதில் பேராதனைப் பல்கலைக்கழகமும் உள்ளடங்குகிறது.

ஆசிரியர் பயிற்சி மற்றும் பிரிவேனா மாணவர்களுக்கான கொடுப்பனவு அதிகரிப்பு.

 2027ஆம் ஆண்டு ஏப்ரல் மாதம் முதல், தேசிய கல்வி நிறுவகத்தில் ஆசிரியர் பயிற்சியைப் பெற்றுவரும் மாணவர்களுக்கான மாதாந்தக் கொடுப்பனவு 10,500 ரூபாவிலிருந்து 20,000 ரூபாவாக அதிகரிக்கப்படவுள்ளது.

பிரிவேனா கல்வி நிறுவனங்களில் கல்வி பயிலும் பிக்குமார்களுக்கான நாளாந்தக் கொடுப்பனவு 5 ரூபாவிலிருந்து 50 ரூபாவாகவும் அதிகரிக்கப்படவுள்ளது.

தகைமையுடைய அறநெறிப் பாடசாலை ஆசிரியர்களுக்கு வருடத்திற்கு ஒருமுறை வழங்கப்படும் கொடுப்பனவு 7,500 ரூபாவிலிருந்து 12,500 ரூபாவாக அதிகரிக்கப்படவுள்ளது.

அரசாங்கத்தின் டிஜிட்டல் மாற்றத் திட்டத்தின் ஒரு பகுதியாக, நாடளாவிய ரீதியில் தெரிவுசெய்யப்பட்ட 750,000 மாணவர்களுக்கு பிராட்பேண்ட் இணைய வசதிகள் வழங்கப்படவுள்ளது.

பொதுச் சேவைகளை டிஜிட்டல் மயமாக்குவதற்கான திட்ட வரைபடத்தை நடைமுறைப்படுத்தும் நோக்கில், திறைசேரியின் 100 சதவீத உரிமையைக் கொண்ட GoVTech நிறுவனம் ஏற்கனவே தனது செயற்பாடுகளை ஆரம்பித்துள்ளது.

தனிப்பட்ட தரவுப் பாதுகாப்புச் சட்டம் திருத்தப்பட்டுள்ளதுடன், தரவுப் பாதுகாப்பு அதிகாரசபையும் செயற்பாட்டுக்கு கொண்டுவரப்பட்டுள்ளது.

டிஜிட்டல் பொருளாதார அதிகாரசபை மற்றும் டிஜிட்டல் பொருளாதாரப் பேரவையை நிறுவுவதற்கான சட்டமூலம் 2027ஆம் ஆண்டின் முதல் காலாண்டில் நாடாளுமன்றத்தில் சமர்ப்பிக்கப்படவுள்ளது.

சட்டத்தின் ஊடாக டிஜிட்டல் பொருளாதார அதிகாரசபையொன்றை நிறுவ அரசாங்கம் திட்டமிட்டுள்ளது.

தெரிவுசெய்யப்பட்ட பாடசாலை மாணவர்களிடையே டிஜிட்டல் கல்வியறிவை மேம்படுத்துவதற்காக பிராட்பேண்ட் இணைய வசதிக்கான வவுச்சர்கள் மூலம் 2026ஆம் ஆண்டில் நிதி ஒதுக்கப்பட்டுள்ளது.

2027ஆம் ஆண்டிலும் இதற்கான மேலதிக நிதி ஒதுக்கீடுகள் மேற்கொள்ளப்படவுள்ளன.

டிஜிட்டல் வர்த்தகங்கள் மற்றும் தொழில்முயற்சிகளின் வளர்ச்சிக்கு ஆதரவளிக்கும் வகையில் டிஜிட்டல் தொழில்முயற்சி நிதியமொன்றை உருவாக்குவதற்காக 10,000 மில்லியன் ரூபாய் ஒதுக்கப்பட்டுள்ளது.

மன்னார் படுகையில் கடலுக்கு அடியில் அமைந்துள்ள நான்கு வலயங்களில் எண்ணெய் மற்றும் இயற்கை எரிவாயு ஆய்வு மற்றும் உற்பத்தி நடவடிக்கைகளை முன்னெடுப்பதற்காக இலங்கை பெற்றோலிய அபிவிருத்தி அதிகாரசபையினால் கேள்விப்பத்திரங்கள் கோரப்பட்டுள்ளன.

இதற்கான கேள்விப்பத்திரங்களைச் சமர்ப்பிப்பதற்கான இறுதித் திகதி 2027ஆம் ஆண்டு பெப்ரவரி 2ஆம் திகதியாகும்.

நாட்டின் எண்ணெய் மற்றும் இயற்கை எரிவாயு உற்பத்தியை அதிகரிக்கும் நோக்கில், கேள்விப்பத்திரங்கள் பரிசீலிக்கப்பட்ட பின்னர் குறித்த வலயங்கள் விரைவாக வழங்கப்படும்.

டிஜிட்டல் பொருளாதாரச் சட்டமொன்று உருவாக்கப்படுவதுடன், 2027ஆம் ஆண்டில் இணையப் பாதுகாப்பு அதிகாரசபையொன்றும் நிறுவப்படவுள்ளது.

மேலும், டிஜிட்டல் கொள்வனவுகளுக்கான புதிய கொள்முதல் நடைமுறையும் அறிமுகப்படுத்தப்படவுள்ளது.

செயற்கை நுண்ணறிவுத் திறன்களை வலுப்படுத்துதல், செயற்கை நுண்ணறிவுத் தொழில்நுட்பத்தின் பொறுப்பான பயன்பாட்டை ஊக்குவித்தல் ஆகிய நோக்கங்களுடன், விஜேராம மாவத்தையில் செயற்கை நுண்ணறிவு சிறப்பு மையமொன்று (AI Excellence Centre) நிறுவப்படவுள்ளது.

அரசாங்கப் பிரதிநிதிகள், நிபுணர்கள் மற்றும் கல்வித்துறையினரை ஒரே இடத்தில் ஒன்றிணைத்து இத்துறையின் ஆற்றலை மேம்படுத்துவதே இதன் நோக்கமாகும்.

 நுரைச்சோலை மின் உற்பத்தி நிலையத்தில் 30 மெகாவோட் கொள்ளளவு கொண்ட மின்கல மின்சாரச் சேமிப்புக் கட்டமைப்பொன்ற நிறவப்படவுள்ளது.

ஏரிகளில் மிதக்கும் சூரிய மின்சக்தி உற்பத்திக் கட்டமைப்புக்களை நிறுவி 500 மெகாவோட் மின்சாரத்தை உற்பத்தி செய்வதற்கும் திட்டமிடப்பட்டுள்ளது.  

எரிபொருள் விநியோகத்தை 45 நாட்களுக்குப் போதுமான அளவில் உறுதிப்படுத்தும் வகையில் எரிபொருள் சேமிப்புத் திறன் அதிகரிக்கப்படவுள்ளது.

முத்துராஜவெலையிலிருந்து பண்டாரநாயக்க சர்வதேச விமான நிலையம் (BIA) வரை விமான எரிபொருள் குழாய்த் தொகுதியை அமைப்பதற்கும், 92,000 மெற்றிக் தொன் கொள்ளளவு கொண்ட எரிபொருள் சேமிப்பு வசதிகளை அபிவிருத்தி செய்வதற்கும் 22.34 பில்லியன் ரூபாய் ஒதுக்கப்பட்டுள்ளதாக ஜனாதிபதி தெரிவித்துள்ளார்.

கொலன்னாவையில் இருந்து துறைமுகம் வரையிலான எரிபொருள் குழாய்த் திட்டத்திற்காக 16,332 மில்லியன் ரூபாய் பெறுமதியான கேள்விபத்திரங்கள் கோரப்பட்டுள்ளன.

இந்தத் திட்டத்தின் மூலம் எரிபொருளை இறக்கும் காலத்தைத் தற்போதுள்ள 96 மணித்தியாலங்களில் இருந்து 48 மணித்தியாலங்களாக குறைக்க எதிர்பார்க்கப்படுகின்றது.

18 மாதங்களுக்குள் நிறைவு செய்ய எதிர்பார்க்கப்படும் இந்தத் திட்டத்தின் மூலம் கப்பல்களுக்குச் செலுத்தப்படும் தாமதக் கட்டணங்களையும் குறைக்க முடியும்.

தற்போது எரிபொருள் இறக்குமதி செய்வதில் ஏற்படும் ஒவ்வொரு நாள் தாமதத்திற்கும் கப்பல் நிறுவனங்களுக்கு சுமார் 3 இலட்சம் அமெரிக்க டொலர்களை இலங்கை செலுத்த வேண்டியுள்ளது. 

மாதாந்தம் 180 அலகுகளுககு மேல் மின்சாரத்தைப் பயன்படுத்தும் 3 இலட்சம் மின் பாவனையாளர்களுககு இலவசமாக ஸ்மார்ட் மின் மாணிகள் வழங்கப்படவுள்ளன.

அதேவேளை, 120 அலகுகளுக்கு மேல் மின்சாரத்தைப் பயன்படுத்தும் இலங்கை மின்சார தனியார் நிறுவனத்தின்(LECO) அனைத்து மின் பாவனையாளர்களுக்கும் ஸ்மார்ட் மின்மானிகள் வழங்கப்படவுள்ளன. 

அண்மையில் ஏற்பட்டதைப் போன்ற நாடளாவிய மின்தடைச் சம்பவங்கள் மீண்டும் ஏற்படுவதைத் தடுக்கும் வகையில், தேசிய மின்சாரக் கட்டமைப்பை மேம்படுத்தவும் அதன் வலுவையும் மீள்திறனையும் அதிகரிக்கவும் அரசாங்கம் 26.5 பில்லியன் ரூபாயை ஒதுக்கியுள்ளது.

வீடுகளில் கூரை சூரிய மின்சக்தி கட்டமைப்புகளுடன் மின்கல சேமிப்பு முறைமைகளைப் பொருத்துவோருக்கு நிவாரணம் வழங்க அரசாங்கம் முன்மொழிந்துள்ளது.

இதன்படி, ஒரு கிலோவாட் மின்கல சேமிப்புத் திறனுக்கு 25,000 ரூபாய் வழங்கப்படும். அதிகபட்சமாக 10 கிலோவாட் திறன் கொண்ட கட்டமைப்புகளுக்கு 250,000 ரூபாய் வரை நிதியுதவி வழங்கப்படும்.

இந்தத் திட்டத்திற்காக 3,500 மில்லியன் ரூபாய் ஒதுக்கீடு செய்ய முன்மொழியப்பட்டுள்ளது.