வங்கி கணக்குகளை சரிபார்க்கவும்! அஸ்வெசும பட்டியலில் தகுதிபெற்ற பயனாளிகளுக்கு முக்கிய அறிவுறுத்தல்
புதிய மற்றும் இரண்டாம் கட்ட பயனாளிகளுக்கான நவம்பர் மாத அஸ்வெசும உதவித்தொகையை நவம்பர் 27 ஆம் திகதி வழங்க எதிர்பார்ப்பதாக நலன்புரி நன்மைகள் சபை அறிவித்துள்ளது.
இது தொடர்பில் நலன்புரி நன்மைகள் சபை வெளியிட்டுள்ள அறிக்கையில்,
பட்டியலில் தகுதி பெற்றுள்ள பயனாளிகள்
புதிதாக வெளியிடப்பட்ட தகுதி பட்டியலில் பெயர்கள் இடம்பெற்றுள்ள பயனாளிகள், நவம்பர் 15 திகதியுடன் மேல்முறையீடுகள் மற்றும் ஆட்சேபனைகள் காலம் முடிவடைந்ததை தொடர்ந்து, இன்று (17) முதல் தங்கள் வங்கிக் கணக்குகளை சரிபார்க்க தொடங்கலாம்.

அதன்படி, புதிதாக தேர்ந்தெடுக்கப்பட்ட அஸ்வெசும பயனாளிகள் தங்கள் உதவித்தொகையைப் பெறுவதற்கு, அரச வங்கியில் பிரத்யேக கணக்கை திறக்க வேண்டும்.
இந்த கணக்குகளை திறக்கத் தேவையான பரிந்துரை கடிதங்கள், அந்தந்த பிரதேச செயலகங்களில் உள்ள நலன்புரி நன்மைகள் சபையின் பிரிவுகள் மூலம் இன்று முதல் வழங்கப்படும் என்றும் கூறியுள்ளது.
ஒரு கணக்கைத் திறந்த பிறகு, பயனாளிகள் தங்கள் வங்கி விவரங்களை பதிவேட்டில் புதுப்பிக்க, தங்கள் பிரதேச செயலகத்திற்கு செல்ல வேண்டும்.
வங்கிக்கணக்குகள் தொடர்பான தகவல்கள்
அனைத்து பயனாளிகளும் தங்களின் வங்கிக்கணக்குகள் தொடர்பான தகவல்களைச் சரிபார்ப்பதற்குச் சம்மதம் தெரிவித்து, ஒரு பிரமாணப் பத்திரத்தைச் சமர்ப்பிக்க வேண்டும் என்றும் மேலும் அறிவித்துள்ளது.

இது, சம்பந்தப்பட்ட பிரதேச செயலகம், தேவைப்படும்போதெல்லாம் பயனாளிகளின் வங்கிக் கணக்குத் தகவல்களை அந்தந்த வங்கிகள் மூலம் சரிபார்க்க வழிவகுக்கும். தேவையான பிரமாண பத்திரப் படிவங்களை பிரதேச செயலகங்களில் உள்ள நலத்திட்ட உதவிகள் தகவல் பிரிவுகளிலிருந்து பெற்றுக்கொள்ளலாம்.
இருப்பினும், ஏற்கனவே செயல்பாட்டில் உள்ள அஸ்வெசும வங்கிக் கணக்கு வைத்திருக்கும் பயனாளிகள் புதிய கணக்கைத் திறக்க வேண்டிய அவசியமில்லை.
தகுதியுள்ள பயனாளிகள் தங்களின் நலத்திட்ட உதவித்தொகையைப் பெறுவதை எளிதாக்குவதற்காக, தேவையான வங்கி மற்றும் சரிபார்ப்பு நடைமுறைகளை நிறைவு செய்யுமாறும் நலன்புரி நன்மைகள் சபை வலியுறுத்தியுள்ளது.