மன்னார் பொது வைத்தியசாலையின் அவல நிலை: மூடப்படும் நிலையில் நோயாளர் விடுதிகள் (Photos)

மன்னார் பொது வைத்தியசாலையில் கழிவுகள் அகற்றப்படாதமையினால் மன்னார் பொது வைத்தியசாலைக்குறிய பிராந்திய சுகாதார கழிவகற்றல் நிலையம் சுகாதார சீர்கேட்டுக்கு உள்ளாகியுள்ளதாக மக்கள் விசனம் தெரிவித்துள்ளனர்.

மேன்முறையீட்டு நீதிமன்றத்தினால் கடந்த நவம்பர் மாதம் 23 ஆம் திகதி வழங்கப்பட்ட தீர்ப்பு காரணமாக மன்னார் நகர சபைக்கு சொந்தமான பாப்பாமோட்டை பகுதியில் அமைந்துள்ள திண்ம கழிவு முகாமைத்துவ நிலையம் தற்காலிகமாக மூடப்பட்டதுடன் நகர சபையினால் திண்மக் கழிவு மற்றும் மலக்கழிவு அகற்றல் செயற்பாடுகள் நிறுத்தப்பட்டுள்ளது.

இலங்கை கிரிக்கெட் அணி தலைமை பதவியில் மாற்றம்...!

சுகாதார சீர்கேடு

இந்த நிலையில் மன்னார் பொது வைத்தியசாலையில் பல நாட்களாக மருத்துவக்கழிவு, உணவுக்கழிவு மற்றும் மலக் கழிவுகள் அகற்றப்படாதமையினால் மன்னார் பொது வைத்தியசாலைக்குறிய பிராந்திய சுகாதார கழிவகற்றல் நிலையம் சுகாதார சீர்கேட்டுக்கு உள்ளாகியுள்ளதுடன் துர்நாற்றமும் வீசி வருவதாக தெரிவிக்கப்படுகின்றது.

அதே நேரம் நோயாளர் விடுதிகளில் உள்ள மலசல கூடங்கள் நிறைந்து வழிவதால் விடுதிகளை நோயாளிகள் பயன்படுத்த முடியாத நிலை காணப்படுவதுடன் மழை காரணமாக டெங்கு நோய் பரவும் அபாயமும் ஏற்பட்டுள்ளதாக கூறப்படுகின்றது.

தொடர்ச்சியாக கழிவகற்றல் செயற்பாடுகள் முன்னெடுக்கப்படாத பட்சத்தில் விடுதிகளை மூட வேண்டிய நிலை ஏற்படும் என்பதுடன் ஏற்கனவே சேகரிக்கப்பட்டு களஞ்சியப் படுத்தப்பட்ட குப்பைகளால் தொற்று நோய்கள் ஏற்பட வாய்ப்புள்ளதாக வைத்தியர்கள் தெரிவித்துள்ளனர்.

குறித்த விடயம் தொடர்பாக மன்னார் மாவட்ட பொது வைத்தியசாலை நிர்வாகத்தினால் வன்னி மாவட்ட நாடாளுமன்ற உறுப்பினர்களின் கவனத்திற்கு கொண்டு சென்ற நிலையில் எந்தவித நடவடிக்கையும் முன்னெடுக்கப்படவில்லை என மக்கள் குறிப்பிட்டுள்ளனர்.

இந்த நிலையில் வைத்தியசாலைக்கு நிரந்தர பணிப்பாளர் இல்லாமையும் பல்வேறு பிரச்சினைகளுக்கு காரணமாக அமைந்துள்ளதாக தெரிவிக்கப்படுகின்றது.

மக்கள் கோரிக்கை

மேலும் வைத்தியசாலை மாத்திரமின்றி பொது இடங்கள், வீடுகள், அலுவலகங்கள் உணவங்களிலும் குப்பைகள், அகற்றப்படாத நிலையே காணப்படுவதாக மக்கள் குற்றம் சுமத்தியுள்ளார்.

அத்துடன் குறித்த விடயம் தொடர்பில் நாடாளுமன்ற உறுப்பினர்கள், அரச அதிகாரிகள், ஆளுநர் விரைந்து நடவடிக்கை மேற்கொள்ள வேண்டும் என்பதுடன் தீர்வை வழங்க முடியாத பட்சத்தில் மாற்றுவழிகளையாவது மேற்கொண்டு தருமாறு மன்னார் மக்கள் கோரிக்கை விடுத்துள்ளனர்.

தொடரும் மழை : வவுனியாவில் பெருமளவானோர் பாதிப்பு

பாதுகாப்பு சபையில் கலந்துரையாடி பதிலளிக்கின்றேன்: பொலிஸ் பதிவு தொடர்பில் மனோவுக்கு ஜனாதிபதி உறுதி