எப்ஸ்டீன் விவகாரத்தை கையில் எடுத்த ஹூதிகள்! சவுதியைச் சூழ்ந்த சர்ச்சை

யேமனில் செயல்படும் ஹூதி கிளர்ச்சியாளர்கள், அமெரிக்க பாலியல் குற்றவாளியான ஜெஃப்ரி எப்ஸ்டீன் தொடர்பான சர்ச்சைகளைப் பயன்படுத்தி சவுதி அரேபியாவுக்கு எதிராக சமூக வலைத்தளங்களில் பிரசாரத்தை முன்னெடுத்து வருவதாக நியூயோர்க் டைம்ஸ் செய்தி வெளியிட்டுள்ளது.

மக்காவில் உள்ள இஸ்லாமியர்களின் புனிதத் தலமான கஃபாவின் மீது போர்த்தப்பட்டிருந்த துணிகள், சவுதி அரச குடும்பத்துடன் தொடர்புடையவர்களால் எப்ஸ்டீனின் தனியார் தீவுக்கு அனுப்பப்பட்டதாக வெளியாகிய தகவல்களை ஹூதிகள் தமது பிரசாரத்தில் பயன்படுத்தி வருகின்றனர்.

நற்பெயருக்குக் களங்கம்

இதன் மூலம் சவுதி தலைமையின் நற்பெயருக்குக் களங்கம் ஏற்படுத்த அவர்கள் முயற்சிப்பதாகக் கூறப்படுகிறது.

மக்கா மற்றும் மதீனா பகுதிகளைக் குறிவைத்து ஹூதிகள் ட்ரோன் தாக்குதல் நடத்தியதாக சவுதி அரேபியா குற்றஞ்சாட்டியிருந்தது.

எனினும், இந்தக் குற்றச்சாட்டை ஹூதிகள் மறுத்துள்ளனர். இதற்குப் பதிலளித்த ஹூதி தலைவர் மஹ்தி அல்-மஷாத், கஃபாவின் துணிகளை எப்ஸ்டீனுக்கு வழங்கியவர்கள்தான் மக்காவைக் குறிவைப்பதாகக் குற்றஞ்சாட்டியுள்ளார்.

ஹூதிகளின் தகவல் தொடர்பு நடவடிக்கைகள் தற்போது தொலைக்காட்சி, இணையத்தளங்கள், வானொலி மற்றும் சமூக வலைத்தளங்களை உள்ளடக்கிய ஒழுங்கமைக்கப்பட்ட வலையமைப்பாக வளர்ந்துள்ளதாக யேமன் விவகார ஆய்வாளர் மொஹமட் அல்-பாஷா தெரிவித்துள்ளார்.

எப்ஸ்டீன் தொடர்பான ஆவணங்கள்

எப்ஸ்டீன் தொடர்பான ஆவணங்களைப் பயன்படுத்தி அமெரிக்கா, இஸ்ரேல் மற்றும் சவுதி தலைமைக்கு எதிரான கருத்துகளைப் பரப்புவதும் இந்த உத்தியின் ஒரு பகுதியாக இருப்பதாக ஆய்வாளர்கள் சுட்டிக்காட்டுகின்றனர்.

2015ஆம் ஆண்டு முதல் யேமன் அரசாங்கத்துக்கு ஆதரவாக சவுதி தலைமையிலான கூட்டணி மேற்கொண்ட இராணுவ நடவடிக்கைகள், அந்நாட்டில் கடுமையான மனிதாபிமான நெருக்கடி ஏற்படுவதற்குப் பங்களித்தன.

வன்முறை, பசி மற்றும் நோய்களால் நூறாயிரக்கணக்கானோர் உயிரிழந்ததாக மதிப்பிடப்பட்டுள்ளது. இந்த விவகாரங்களையும் ஹூதிகள் தமது பிரசாரங்களில் பயன்படுத்தி வருகின்றனர்.

மேலும், ஈரானுடன் தொடர்புடைய குழுக்களின் தகவல் பரப்பும் உத்திகளையும் அவர்கள் பின்பற்றுவதாக ஆய்வாளர்கள் தெரிவிக்கின்றனர்.

இதற்கிடையில், சவுதி ஆதரவு யேமன் அரசாங்கத்தின் தகவல் தொடர்பு நடவடிக்கைகளில் ஒருமித்த நிலைப்பாடு இல்லாதது, ஹூதிகளின் பிரசாரம் பரவுவதற்கு வாய்ப்பளிப்பதாகவும் கூறப்படுகிறது.

ஈரானில் யாருமே மிஞ்சவில்லை! ட்ரம்பின் அதிரடிப் பேச்சால் மீண்டும் பதற்றம்..