ராஜபக்ச குடும்பத்தினருக்கு மரண தண்டனை வழங்கப்பட்டாலும் பரவாயில்லை! ஆனால்.. - அஜித் மன்னப்பெரும சாடல்

ராஜபக்ச குடும்பத்தினரோ அல்லது வேறு யாராக இருந்தாலும் குற்றங்கள் செய்திருந்தால் சட்டத்தின்படி அவர்களுக்கு மரண தண்டனை வழங்கப்பட்டாலும் பரவாயில்லை, ஆனால் தற்போது முன்னெடுக்கப்படும் நடவடிக்கைகள் முறையான விசாரணைகளின்றி அரசியல் பழிவாங்கும் நோக்கில் மட்டுமே அமைந்துள்ளன என முன்னாள் நாடாளுமன்ற உறுப்பினர் அஜித் மன்னப்பெரும தெரிவித்துள்ளார். 

கொழும்பில் நேற்று (14.10.2026) நடைபெற்ற நிகழ்வொன்றின் பின்னர் ஊடகவியலாளர்கள் எழுப்பிய கேள்விகளுக்குப் பதிலளிக்கும் போதே அவர் இந்த விடயத்தை கூறியுள்ளார்.

ஊழல் குற்றச்சாட்டுகள் குறித்த விசாரணை

அவர் மேலும் தெரிவிக்கையில், தற்போதைய அரசு சட்டத்தை ஒரு கருவியாகப் பயன்படுத்தித் தனது அதிகாரத்தைத் தக்கவைத்துக் கொள்ள முயற்சிக்கின்றது. பெரிய அளவிலான ஊழல் குற்றச்சாட்டுகள் குறித்த விசாரணைகள் மந்த நிலையில் உள்ள அதேவேளை, அரசியல் பழிவாங்கும் நடவடிக்கைகளுக்கே முன்னுரிமை அளிக்கப்படுகின்றது.

ஞானசார தேரர் மதத்துக்காகவும் நாட்டுக்காகவும் குரல் கொடுத்த போதே நீதிமன்ற அவமதிப்பு வழக்கில் தண்டனை பெற்றார். அப்போதைய ஜனாதிபதி மைத்திரிபால சிறிசேன அவருக்குப் பொதுமன்னிப்பு வழங்கிய நிலையில், தற்போது அவர் மீண்டும் சிறையில் அடைக்கப்பட்டு அவரது துறவற ஆடை களையப்பட்டமையானது மதத்தின் மீதான பற்றையும் சமூக மதிப்பீடுகளையும் சிதைக்கும் செயலாகும்.

ஒழுக்கமற்ற சமூகம்

அறிஞர்களுக்கும் மதத் தலைவர்களுக்கும் வழங்கப்பட வேண்டிய மரியாதை இதன் மூலம் திட்டமிட்டு அழிக்கப்பட்டு, ஒழுக்கமற்ற சமூகம் உருவாக்கப்படுகின்றது. பௌத்த மதத்தைப் பாதுகாப்பது அவசியமானதுடன், எதிர்காலத்தில் ஏனைய மதங்களுக்கும் இத்தகைய நிலை ஏற்படலாம் என்பதால் எச்சரிக்கையாக இருக்க வேண்டும்.

தவறிழைத்தவர்கள் எவராக இருப்பினும் சட்டத்தின் முன் தண்டிக்கப்படுவதில் ஆட்சேபனை இல்லை. விசாரணைகளின்றி முன்னெடுக்கப்படும் பழிவாங்கல் நடவடிக்கைகளையே நாம் எதிர்க்கின்றோம் என்றார்.

ஞானசாரருக்கான பேரணியில் வைத்து தாக்கப்பட்ட நபர்.. அம்பலமான பிக்குவின் நாடகம்

இன்று ஷிரந்தி தொடர்பில் சமர்ப்பிக்கப்படவுள்ள முக்கிய ஆவணம்