காட்டு யானைகளால் நாசமாகும் விவசாய நிலங்கள் - தொடர் நஷ்டத்தை சந்திக்கும் மக்கள் அரசிடம் கோரிக்கை

அம்பாறை - நாவிதன்வெளி மற்றும் அதனை அண்டிய நற்பிட்டிமுனை, கிட்டங்கி ஆகிய பகுதிகளில் காட்டு யானைகளின் ஊடுருவல் நாளுக்கு நாள் அதிகரித்து வருவதனால் பொதுமக்களின் இயல்பு வாழ்க்கை கடுமையாகப் பாதிக்கப்பட்டுள்ளதாக தெரிவிக்கப்பட்டுள்ளது.

அத்துடன், இந்த பிரச்சினைக்கு அரசாங்கம் நிரந்தரத் தீர்வை உடனடியாக வழங்குமாறு அப்பகுதி மக்கள் கோரிக்கை விடுத்துள்ளனர்.

கடந்த சில தினங்களாக நாவிதன்வெளி பிரதேச செயலகத்திற்கு அண்மித்த பகுதிக்குள் நள்ளிரவில் புகுந்த காட்டு யானையொன்று, அங்குள்ள செல்வா மைதானத்தின் வேலிகளை முற்றாக அடித்து சேதப்படுத்தியுள்ளது. இதனால் அதிர்ச்சியடைந்த அப்பகுதி மக்கள் ஒன்றுகூடி பாரிய போராட்டத்திற்கு மத்தியிலேயே யானையைக் காட்டுப் பகுதிக்கு விரட்டியடித்துள்ளனர்.

காட்டு யானை தாக்கம் அதிகரிப்பு

கிராம மக்களால் விரட்டப்பட்ட குறித்த காட்டு யானை, நற்பிட்டிமுனை கிட்டங்கி பிள்ளையார் ஆலயத்திற்கு அருகாமையில் அதிகாலை வேளையில் வீதியைக் கடக்க முயன்றுள்ளது.

இதன்போது நற்பிட்டிமுனை சேனைக்குடியிருப்புப் பகுதியில் இருந்து மத்திய முகாம் பிரதேசத்தை நோக்கித் துவிச்சக்கர வண்டியில் தோட்டப் பணிக்காகச் சென்ற சிறுவன் மீது எதிர்பாராதவிதமாகத் தாக்குதல் நடத்தியுள்ளது. இந்த தாக்குதலில் காயமடைந்த சிறுவன் உடனடியாக மீட்கப்பட்டு மேலதிக சிகிச்சைக்காகக் கல்முனை வடக்கு ஆதார வைத்தியசாலையில் அனுமதிக்கப்பட்டுள்ளார்.

குறித்த சம்பவம் தொடர்பாகக் கல்முனைப் பொலிஸார் விசாரணைகளை மேற்கொண்டு வருகின்றனர். இதனிடையே, குடியிருப்புப் பகுதிக்குள் புகுந்த மற்றொரு காட்டு யானையை வனஜீவராசிகள் திணைக்கள அதிகாரிகள் உடனடியாகச் செயற்பட்டு எந்தவித அசம்பாவிதமும் இன்றிப் பாதுகாப்பாக மீண்டும் காட்டுப்பகுதிக்கு விரட்டியடித்துள்ளனர்.

மனித - யானை மோதலைத் தவிர்க்கும் வகையில் அதிகாரிகள் மேற்கொண்ட இந்த துரித நடவடிக்கை அப்பகுதி மக்களிடையே தற்காலிக நிம்மதியை ஏற்படுத்தியுள்ளது.

அரசாங்கத்திடம் விடுக்கப்பட்டுள்ள கோரிக்கை

அறுவடைப் பருவம் நிறைவடைந்ததைத் தொடர்ந்து வயல் நிலங்களில் எஞ்சியிருக்கும் வைக்கோலுக்குத் தீ வைக்கும் நடவடிக்கை அப்பகுதியில் அதிகரித்து வருகின்றது. இதனால் காற்று மாசுபாடு ஏற்படுவதுடன், மண்ணிலுள்ள நன்மை செய்யும் நுண்ணுயிரிகள் அழிந்து மண் வளம் முற்றாகச் சீரழியும் அபாயம் ஏற்பட்டுள்ளதாகச் சூழலியலாளர்களும் விவசாய நிபுணர்களும் எச்சரிக்கை விடுத்துள்ளனர்.

அத்துடன், புகையின் தாக்கம் மற்றும் காட்டுப் பகுதியில் ஏற்படும் உணவுத் தட்டுப்பாடு காரணமாகவே யானைகள் கிராமங்களை நோக்கிப் படை எடுப்பதாகவும், இதனால் மனித - யானை மோதல்கள் தீவிரமடைந்து வருவதாகவும் சுட்டிக்காட்டப்பட்டுள்ளது.

தொடர்ச்சியாக அதிகரித்து வரும் காட்டு யானைகளின் அச்சுறுத்தலினால் பொதுமக்களின் உயிர்களும் உடமைகளும் பெரும் அபாயத்தை எதிர்நோக்கியுள்ளதால், சம்பந்தப்பட்ட உயர் அதிகாரிகள் உடனடியாக தலையிட்டு யானை வேலிகளை அமைப்பதுடன் நிரந்தரத் தீர்வை பெற்றுத்தர வேண்டும் என கிராமவாசிகளும் விவசாயிகளும் வேண்டுகோள் விடுக்கின்றனர். 

கைது செய்யப்பட்ட ஷிரந்தி! பழியை புலம்பெயர் தமிழர்கள் மீது சுமத்தும் சரத் வீரசேகர

12 வயது சிறுவனுக்கு நேர்ந்த கொடூரம் - அரச அதிகாரிக்கு நீதிமன்றம் பிறப்பித்துள்ள உத்தரவு