புதிய பயங்கரவாத எதிர்ப்புச் சட்டமூலம்: இலங்கைக்கு ஐ.நா. மனித உரிமைகள் பேரவை அழுத்தம்

இலங்கையின் சர்ச்சைக்குரிய பயங்கரவாதத் தடைச் சட்டத்துக்குப் பதிலாக, 2026 செப்டெம்பரில் வர்த்தமானியில் வெளியிடப்பட்ட "பயங்கரவாதத்திலிருந்து அரசைப் பாதுகாக்கும் சட்டமூலம்" தொடர்பாக, ஐக்கிய நாடுகள் மனித உரிமைகள் ஆணையாளர் அலுவலகம் தனது ஆரம்பகட்ட விரிவான மதிப்பீட்டையும் எச்சரிக்கைகளையும் வெளியிட்டுள்ளது.

முந்தைய வரைவுகளுடன் ஒப்பிடுகையில் இந்தப் புதிய சட்டமூலத்தில் சில நேர்மறையான மாற்றங்கள் இடம்பெற்றுள்ள போதிலும், இது சர்வதேச மனித உரிமைத் தரநிலைகளுக்கு முரணாக இருப்பதோடு, கடந்த கால மனித உரிமை மீறல்கள் மீண்டும் தொடர்வதற்கான ஆபத்தைக் கொண்டுள்ளது என்றும் ஐக்கிய நாடுகள் மனித உரிமைகள் ஆணையாளர் அலுவலகம் சுட்டிக்காட்டியுள்ளது.

இந்த அலுவலகம் வெளியிட்டுள்ள முக்கிய அவதானிப்புகள் மற்றும் பரிந்துரைகள் வருமாறு:-

1. நேர்மறையான மாற்றங்கள் முந்தைய 2025 டிசம்பர் வரைவுடன் ஒப்பிடுகையில், தற்போதைய புதிய சட்டமூலத்தில் சில முன்னேற்றங்கள் ஏற்பட்டுள்ளதை ஐ.நா. மனித உரிமைகள் அலுவலகம் அங்கீகரித்துள்ளது.

பயங்கரவாதம் என்பதற்கான வரையறையில் ஓரளவு தெளிவான மற்றும் குறிப்பிட்ட கூறுகள் சேர்க்கப்பட்டுள்ளன. பயங்கரவாதத்தின் நோக்க வரம்புக்குள் இருந்து "நாட்டின் இறையாண்மை மற்றும் பிராந்திய ஒருமைப்பாடு" தொடர்பான சில பகுதிகள் மற்றும் சில சாதாரண குற்றவியல் பிரிவுகள் நீக்கப்பட்டுள்ளன.

2. முக்கிய கவலைகள் மற்றும் எச்சரிக்கைகளில் முன்னேற்றங்கள் இருந்தபோதிலும், சட்டமூலத்தின் பல பிரிவுகள் சர்வதேச சட்டங்களின்படி தீவிர கவலைக்குரியதாக இருப்பதாக ஐ.நா. மனித உரிமைகள் அலுவலகம் எச்சரித்துள்ளது.

தடுத்து வைத்தல், தடைகள் விதித்தல், கட்டுப்பாடுகள் மற்றும் தடை செய்யப்பட்ட இடங்களை அறிவித்தல் ஆகியவற்றில் நிறைவேற்று அதிகாரிகளுக்கு பரந்த மற்றும் தன்னிச்சையான அதிகாரங்கள் வழங்கப்பட்டுள்ளன.

இத்தகைய அதிகாரங்கள் துஷ்பிரயோகம் செய்யப்படுவதைத் தடுக்க முறையான சட்ட மற்றும் சுயாதீன கண்காணிப்பு வழிமுறைகள் இல்லை. தன்னிச்சையான கைதுகள், சித்திரவதைகள், மற்றும் கட்டாயக் காணாமலாக்கப்படுதல் போன்ற மோசமான மனித உரிமை மீறல்களுக்கு எதிராக இந்த சட்டமூலம் போதுமான பாதுகாப்பை வழங்கவில்லை.

பிணை வழங்கும் அதிகாரம் மேல் நீதிமன்றத்துக்கு மாற்றப்பட்டிருப்பது மற்றும் ஆயுள் தண்டனைக்குரிய குற்றங்களுக்கு பிணை வழங்குவதில் விதிக்கப்பட்டுள்ள கடுமையான நிபந்தனைகள் குறித்து கவலை வெளிப்படுத்தப்பட்டுள்ளது.

இந்தச் சட்டமூலத்தின் 73ஆவது பிரிவின்படி, தற்போது நடைமுறையிலுள்ள பயங்கரவாதத் தடைச் சட்டத்தின் கீழ் நிலுவையில் உள்ள வழக்குகள், விசாரணைகள் மற்றும் கட்டுப்பாடுகள் தொடர்ந்து செல்லுபடியாகும் எனக் கூறப்பட்டுள்ளது. இதன் மூலம் பழைய சட்டத்தின் மோசமான கூறுகள் தடையின்றி நீடிக்க வாய்ப்புள்ளது என்றும் ஐக்கிய நாடுகள் மனித உரிமைகள் ஆணையாளர் அலுவலகம் எச்சரித்துள்ளது.

3. ஐ.நா. மனித உரிமைகள் அலுவலகத்தின் பரிந்துரைகள் இலங்கை அரசு இந்தச் சட்டமூலத்தைச் சட்டமாக்குவதற்கு முன்பாக, அதில் முழுமையான திருத்தங்களை மேற்கொள்ள வேண்டும். சுயாதீன நிறுவனங்கள், சிவில் சமூக அமைப்புகள், சட்ட வல்லுநர்கள் மற்றும் பாதிக்கப்பட்ட சமூகங்களை உள்ளடக்கிய ஒரு விரிவான கலந்தாலோசனை மற்றும் மறுஆய்வை அரசு முன்னெடுக்க வேண்டும்.

சித்திரவதைகளுக்கு எதிரான தெளிவான பாதுகாப்பு, கைது செய்யப்பட்ட ஆரம்பத்திலிருந்தே சட்டத்தரணிகளை ரகசியமாக அணுகும் உரிமை, மற்றும் மொழிபெயர்ப்பு வசதிகள் போன்ற அடிப்படை உரிமைகள் சட்டப்பூர்வமாக உறுதி செய்யப்பட வேண்டும். சட்டவிரோதக் கைதுகள் அல்லது தடுத்து வைப்புகளுக்கு உள்ளாகும் நபர்களுக்கு உரிய இழப்பீடு வழங்குவதற்கான வழிமுறைகள் உருவாக்கப்பட வேண்டும்.

சர்வதேச மனித உரிமைச் சட்டங்கள் மற்றும் சர்வதேச பயங்கரவாத எதிர்ப்புத் தரநிலைகளுக்கு இணங்கக்கூடிய ஒரு சட்டத்தை உருவாக்குவதற்கு, இலங்கை அரசுக்குத் தேவையான தொழில்நுட்ப உதவிகளையும் ஆலோசனைகளையும் வழங்கத் தயாராக இருப்பதாக ஐக்கிய நாடுகள் மனித உரிமைகள் ஆணையாளர் அலுவலகம் மீண்டும் உறுதிப்படுத்தியுள்ளது.

சூடுபிடித்துள்ள ஞானசார தேரர் விவகாரம் : ஜனாதிபதி வெளியிட்டுள்ள இணக்கம்

ஷிரந்தியை காப்பாற்ற சிங்கபூரில் இருந்து அவசரமாக வந்த மருத்துவ ஆவணம்