ஈரானுக்கு 300 பில்லியன் டொலரை அள்ளிக் கொடுக்கும் ட்ரம்ப்- வொஷிங்டனில் வெடித்த அரசியல் சர்ச்சை

அமெரிக்க - ஈரான் அமைதி ஒப்பந்தத்தில் உள்ள 300 பில்லியன் டொலர் நிதியுதவித் திட்டம் வொஷிங்டனில் பெரும் அரசியல் சர்ச்சையை ஏற்படுத்தியுள்ளது.

அமெரிக்காவிற்கும் ஈரானுக்கும் இடையே நடந்து வந்த போரை முடிவுக்குக் கொண்டு வருவதற்காக, அமெரிக்க ஜனாதிபதி டொனால்ட் ட்ரம்ப் மற்றும் ஈரான் அதிபர் மசூத் பெசெஷ்கியன் ஆகியோர் சுவிட்சர்லாந்தில் ஒரு புரிந்துணர்வு ஒப்பந்தத்தில் கையெழுத்திட்டுள்ளனர்.

இந்த ஒப்பந்தத்தின் ஒரு பகுதியாக, போரினால் பாதிக்கப்பட்ட ஈரானை மறுசீரமைப்பு செய்வதற்காக 300 பில்லியன் டொலர் மதிப்பிலான நிதித் திட்டம் ஒன்றை உருவாக்க அமெரிக்கா ஒப்புக்கொண்டுள்ளது.

தமிழினப் படுகொலைகளுக்கு சர்வதேச விசாரணை அவசியம்! கஜேந்திர குமார் எம்.பி

ஆனால், இந்த அறிவிப்பு தற்போதைய அமெரிக்க நாடாளுமன்ற உறுப்பினர்களிடையே, குறிப்பாக எதிர்க்கட்சியான ஜனநாயகக் கட்சியினரிடையே கடும் கொந்தளிப்பை ஏற்படுத்தியுள்ளது.

தவறான செய்தி

அமெரிக்காவில் பொருளாதார நெருக்கடி நிலவி வரும் இச்சூழலில், இவ்வளவு பெரிய தொகையை ஈரானுக்கு வழங்குவது முறையல்ல என்று அவர்கள் வாதிடுகின்றனர்.

இந்த விமர்சனங்களுக்குப் பதிலளித்துள்ள ஜனாதிபதி டொனால்ட் ட்ரம்ப் மற்றும் துணை ஜனாதிபதி ஜே.டி.வான்ஸ் ஆகியோர், இந்த 300 பில்லியன் டொலர் நிதியானது அமெரிக்க வரி செலுத்துவோரின் பணத்திலிருந்து வழங்கப்படாது என்று தெளிவுபடுத்தியுள்ளனர்.

இது ஒரு தவறான செய்தி என்று ட்ரம்ப் தனது சமூக ஊடகப் பக்கத்தில் மறுத்துள்ளார்.

ஈரானுக்கு அள்ளிக் கொடுக்கும் ட்ரம்ப்

மேலும், துணை ஜனாதிபதி வான்ஸ் செய்தியாளர்களிடம் பேசுகையில், இந்த நிதியை அமெரிக்கா நேரடியாக வழங்கப்போவதில்லை என்றும், வளைகுடா அரபு நாடுகள் மற்றும் ஈரானில் முதலீடு செய்ய விரும்பும் பிற சர்வதேச நாடுகளின் பங்களிப்புடன் மட்டுமே இது திரட்டப்படும் என்றும் கூறினார்.

ஈரான் தனது போர்க்குணமிக்க நடத்தையை முழுமையாக மாற்றிக்கொண்டால் மட்டுமே இந்த நிதி அவர்களுக்குக் கிடைக்கும் என்றும் அவர் நிபந்தனை விதித்துள்ளார். இருப்பினும், இந்த விவகாரத்தை ஜனநாயகக் கட்சியினர் தங்களுக்கு சாதகமான அரசியல் ஆயுதமாகப் பயன்படுத்தி வருகின்றனர்.

அமெரிக்காவில் வீடற்றோர் பிரச்சினை, புற்றுநோய் ஆராய்ச்சி மற்றும் குழந்தைகளுக்கான இலவசக் கல்வி போன்ற உள்நாட்டுத் தேவைகளுக்குப் பயன்படுத்த வேண்டிய பணத்தை ட்ரம்ப் ஈரானுக்கு அள்ளிக்கொடுக்கிறார் என்று செனட்டர் ஏமி குளோபுச்சார் உள்ளிட்ட தலைவர்கள் குற்றம் சாட்டியுள்ளனர்.

60 நாட்களுக்குள் இறுதி எச்சரிக்கை

அதேபோன்று, ட்ரம்பின் ஆதரவாளரான குடியரசுக் கட்சி செனட்டர் ரோஜர் விக்கர் என்பவரும், இந்தத் தொகை கடந்த 2015ஆம் ஆண்டு ஒபாமா ஆட்சிக்காலத்தில் ஈரானுக்குக் கொடுக்கப்பட்ட தொகையை விட பல மடங்கு அதிகம் என்று கவலை தெரிவித்துள்ளார்.

இந்த புதிய புரிந்துணர்வு ஒப்பந்தத்தின் மூலம் ஈரானின் எரிபொருள் துறை மீதான தடைகள் உடனடியாக நீக்கப்படவுள்ளன.

மேலும், முடக்கப்பட்ட ஈரானிய சொத்துக்களை விடுவிப்பது குறித்தும், இரு நாடுகளுக்கும் இடையே அடுத்த 60 நாட்களுக்குள் இறுதி பேச்சுவார்த்தை நடத்தி ஒரு தெளிவான திட்டத்தை உருவாக்கவும் இருதரப்பும் சம்மதித்துள்ளன.

இந்த அமைதி ஒப்பந்தத்திற்குப் பாகிஸ்தான் பிரதமர் ஷெபாஸ் ஷெரீப் மத்தியஸ்தராக இருந்து கையெழுத்திட்டுள்ளார் என்பதும் குறிப்பிடத்தக்கது.