சட்டவிரோத கடற்றொழிலைக் கட்டுப்படுத்த 15 மாவட்டங்களில் விசேட குழுக்கள்

Fishing Sri Lanka Fisherman

By Bavan Sep 30, 2026 09:25 PM GMT

Bavan

in சமூகம்

Report

சட்டவிரோத கடற்றொழில் நடவடிக்கைகளைக் கட்டுப்படுத்தவும், மீன்பிடிப் படகுகளைப் பயன்படுத்தி மேற்கொள்ளப்படும் ஏனைய சட்டவிரோதச் செயல்களைத் தடுக்கவும் 15 பிரதான கடற்றொழில் மாவட்டங்களில் விசேட மாவட்ட மட்டக் குழுக்களை அமைப்பது தொடர்பான முன்னேற்ற மீளாய்வுக் கலந்துரையாடல் நடைபெற்றது.

கடற்றொழில், நீரியல் மற்றும் கடல் வளங்கள் அமைச்சர் இராமலிங்கம் சந்திரசேகர், பாதுகாப்புப் பிரதி அமைச்சர் மேஜர் ஜெனரல் அருண ஜயசேகர (ஓய்வு) மற்றும் கடற்றொழில் பிரதி அமைச்சர் ரத்ன கமகே ஆகியோரின் தலைமையில் இக்கலந்துரையாடல் நடைபெற்றது.

ஏற்கனவே, நடைபெற்ற கலந்துரையாடல்களில் எடுக்கப்பட்ட தீர்மானங்களுக்கு அமைவாக, நாட்டின் கடல் வளங்களைப் பாதுகாப்பதுடன், சட்டவிரோத மீன்பிடி நடவடிக்கைகளைக் கட்டுப்படுத்தும் நோக்கில் கடந்த ஆகஸ்ட் மாதம் 15 பிரதான கடற்றொழில் மாவட்டங்களை உள்ளடக்கிய விசேட குழுக்களை அமைப்பதற்குத் தீர்மானிக்கப்பட்டிருந்தது.

அடுத்தகட்ட நடவடிக்கைகள்

இதன் முன்னேற்றம் மற்றும் குழுக்களைச் செயற்படுத்துவதற்கான அடுத்தகட்ட நடவடிக்கைகள் குறித்து இக்கலந்துரையாடலில் விரிவாக ஆராயப்பட்டது.

சட்டவிரோத கடற்றொழிலைக் கட்டுப்படுத்த 15 மாவட்டங்களில் விசேட குழுக்கள் | Teams 15 Fisheries Districts Curb Illegal Fishing

இதற்கமைய, கொழும்பு, நீர்கொழும்பு, மட்டக்களப்பு, திருகோணமலை, கிளிநொச்சி, யாழ்ப்பாணம், சிலாபம், அம்பாறை, முல்லைத்தீவு, புத்தளம், காலி, மாத்தறை, தங்காலை, களுத்துறை மற்றும் மன்னார் ஆகிய 15 மாவட்டங்களை மையப்படுத்தி விசேட குழுக்களை அமைப்பது தொடர்பான நடவடிக்கைகள் முன்னெடுக்கப்பட்டன.