மொட்டுத் தரப்புக்குள் ஏற்பட்ட உள்ளக மோதல்.. ஒருவரையொருவர் மாறி மாறி தாக்கிக் கொண்ட உறுப்பினர்கள்

Nuwara Eliya SLPP Sri Lanka Podujana Peramuna

By Sajithra Oct 19, 2026 07:20 AM GMT

Sajithra

in அரசியல்

Report

நுவரெலியா மாவட்டத்தின் திஸ்பனை பகுதியில், இலங்கை பொதுஜன பெரமுனவின் இரு அமைப்பாளர்களுக்கு இடையே நேற்று (18) பிற்பகல் கடுமையான மோதல் ஏற்பட்டுள்ளது.

கட்சியின் அதிகார வரம்பு மற்றும் அமைப்புச் செயல்பாடுகள் தொடர்பான கருத்து வேறுபாடுகளே இந்த மோதலுக்குக் காரணம் என தெரிவிக்கப்படுகின்றது.

உள்ளூர் அரசியல் வட்டாரங்களில் பெரும் பரபரப்பை ஏற்படுத்தியுள்ள இந்தச் சம்பவத்தில், கட்சியின் நுவரெலியா மாவட்ட அமைப்பாளர் நிமல் பியதிஸ்ஸ மற்றும் கொத்மலை தொகுதி அமைப்பாளர் பராக்கிரம தசநாயக்க ஆகியோர் ஈடுபட்டுள்ளதாக தெரிவிக்கப்படுகின்றது.

கைகலப்பு

இந்தச் சம்பவம் குறித்து கருத்து தெரிவித்த கொத்மலை தொகுதி அமைப்பாளர் பராக்கிரம தசநாயக்க, தனது அதிகார வரம்பிற்கு உட்பட்ட திஸ்பனை பகுதியில், தனக்கு எவ்வித முன்னறிவிப்பும் இன்றி நிமல் பியதிஸ்ஸ கட்சி கூட்டம் ஒன்றை ஏற்பாடு செய்ததே மோதலுக்குக் காரணம் என்று தெரிவித்துள்ளார்.

மொட்டுத் தரப்புக்குள் ஏற்பட்ட உள்ளக மோதல்.. ஒருவரையொருவர் மாறி மாறி தாக்கிக் கொண்ட உறுப்பினர்கள் | Slpp Members Fight In Tispane Nuwara Eliya

ஒரே மாவட்டத்தைச் சேர்ந்த அமைப்பாளர்கள் என்றாலும், மற்றொரு அமைப்பாளரின் தொகுதிக்குள் இத்தகைய கூட்டங்களை நடத்துவது சிக்கலானது என்பதால், இது குறித்து விளக்கம் கேட்கவே தான் அந்த இடத்திற்குச் சென்றதாக அவர் கூறியுள்ளார்.

இருவருக்கும் இடையே ஏற்பட்ட வாக்குவாதம் கைகலப்பாக மாறியதாகவும், அதன் பிறகு நிமல் பியதிஸ்ஸ அங்கிருந்து வெளியேறியதால் கூட்டம் நடைபெறவில்லை என்றும் தசநாயக்க தெரிவித்துள்ளார்.

இந்தச் சம்பவம் மற்றும் நிமல் பியதிஸ்ஸவின் செயல்பாடு குறித்து கட்சியின் பொதுச் செயலாளரிடம் முறையிடப் போவதாகவும் அவர் கூறியுள்ளார். இருப்பினும், நுவரெலியா மாவட்ட அமைப்பாளர் நிமல் பியதிஸ்ஸ, இந்தச் சம்பவம் குறித்து முற்றிலும் மாறுபட்ட விளக்கத்தை அளித்துள்ளார்.

அடுத்த மாதம் நடைபெறவுள்ள நுவரெலியா மாவட்ட மாநாட்டிற்கான ஏற்பாடுகளின் ஒரு பகுதியாக, மாவட்டம் முழுவதும் தொடர் கூட்டங்களை நடத்தி வருவதாக அவர் குறிப்பிட்டுள்ளார்.