அனோஜனின் உயிரைக் காக்கப் பொதுமன்னிப்பு வழங்குமாறு வேண்டுகோள்

சவுதி அரேபியாவில் கைது செய்யப்பட்டு மரண தண்டனை அச்சுறுத்தலை எதிர்நோக்கியுள்ள அனோஜனுக்குப் பொதுமன்னிப்பு வழங்கி, அவரது உயிரைக் காப்பாற்றி கொடுக்குமாறு பெரியணிலாவணை ஸ்ரீ மகாவிஷ்ணு தேவாஸ்தானத்தின் பிரதம குரு சிவசரி பத்மநிலோஜன் குருக்கள் உருக்கமான மனிதாபிமான வேண்டுகோள் விடுத்துள்ளார்.

இந்த விவகாரம் தொடர்பாக அவர் ஆற்றியுள்ள விசேட உரையில் தெரிவிக்கப்பட்டுள்ளதாவது: எமது பிராந்தியத்தைச் சேர்ந்த அனோஜன் எனும் இளைஞன், வறுமை மற்றும் குடும்பச் சுமை காரணமாகவே சவுதி அரேபியாவுக்குத் தொழில் நிமித்தம் சென்றிருந்தார்.

அங்கு சமூக வலைத்தளத்தில் உணர்ச்சிவசப்பட்டு வெளியிட்ட கருத்துக்காக அவருக்கு ஏற்கனவே ஐந்து ஆண்டுகள் சிறைத்தண்டனையும் அபராதமும் விதிக்கப்பட்டிருந்தது.

மரண தண்டனை

இந்நிலையில், மேல்முறையீட்டின் மூலம் அவருக்கு மரண தண்டனை விதிக்கப்படுவதற்கான சாத்தியக்கூறுகள் இருப்பதாக வெளியாகும் செய்திகள் அவரது குடும்பத்தையும், முழுச் சமூகத்தையும் பேரதிர்ச்சியிலும் மீளாத் துயரிலும் ஆழ்த்தியுள்ளது.

உணர்ச்சிவசப்பட்டுச் செய்த தவறுக்காக ஒரு இளைஞனின் வாழ்க்கையையும், அவரது குடும்பத்தின் எதிர்காலத்தையும் அழிப்பது மிகுந்த வேதனைக்குரியதாகும்.முதலாவதாக, இச்சம்பவம் தொடர்பாக எனது சமூகம் மற்றும் சமயம் சார்பாக ஆழ்ந்த வருத்தத்தைப் பதிவு செய்து கொள்கின்றேன்.

தவறு செய்த ஒருவர் அதற்காக மன்னிப்புக் கோரியுள்ள நிலையில், அவருக்கு மன்னிப்பு வழங்குவதே மேலான பண்பாகும். தன்னை நோக்கி வந்த கடுமையான விமர்சனங்களையும், தாக்குதல்களையும் கூட மன்னித்த வரலாற்றுக்குச் சொந்தக்காரர் இஸ்லாமிய இறுதிக்கூதர் நபிகள் நாயகம் (ஸல்) அவர்கள் என்பதை நாங்கள் அறிவோம்.

வேண்டுகோள்

இஸ்லாம் என்பது சமாதானத்தையும் கருணையையும் வலியுறுத்தும் ஒரு மார்க்கமாகும்.யுத்த வடுக்களிலிருந்து மீண்டு, தமிழ் - முஸ்லிம் சமூகங்களுக்கிடையில் மீள்கட்டமைப்பு, சமாதானம் மற்றும் சகவாழ்வைக் கட்டியெழுப்ப நாம் முயலும் இக்காலகட்டத்தில், இவ்வாறான சம்பவங்கள் சமூக உறவுகளுக்குப் பெரும் பின்னடைவை ஏற்படுத்திவிடக் கூடாது.

எனவே, இலங்கையிலுள்ள அனைத்து இஸ்லாமியச் சொந்தங்களும், மதத் தலைவர்களும், ஆன்மீகப் பெரியோர்களும் தார்மீக உணர்வோடு இவ்விவகாரத்தில் தலையிட வேண்டும்.

சவுதி அரசாங்கத்திற்கும் இலங்கை அரசாங்கத்திற்கும் உரிய அழுத்தங்களை வழங்கி, பொதுமன்னிப்பின் அடிப்படையில் அந்த இளைஞனை விடுவித்து, தாய்நாட்டிற்கு அழைத்து வந்து அவரது குடும்பத்துடன் சேர்த்து வைக்கப் பங்களிப்புச் செய்ய வேண்டும் என ஒரு இந்து மதக் குருவாகக் தாழ்மையுடன் கேட்டுக்கொள்கின்றேன் என அவர் தனது உரையில் வலியுறுத்தியுள்ளார்.

ஷிரந்தி ராஜபக்ச தத்தெடுத்த பிள்ளைகள் எங்கே! வெளிநாடுகளுக்கு ஏற்றுமதி செய்யப்பட்ட மனித உறுப்புகள்

அநுரவுக்கு உதவிய விடுதலைப் புலிகள்! தனிப்பட்ட ரீதியில் அர்ச்சுனாவுக்கு கிடைத்த தகவல் என அறிவித்த மகிந்த தரப்பு