தோட்ட முகாமையாளர்களின் அடாவடித்தனங்களை ஒடுக்க தொழிற்சங்கங்கள் ஒன்றிணைய வேண்டும்! கொட்டகலை பிரதேச சபை உறுப்பினர் விளாசல்

பெருந்தோட்டப் பகுதிகளில் தொழிலாளர்களுக்கு எதிரானதாகக் கூறப்படும் வன்முறைகள், ஒடுக்குமுறைகள், அழுத்தங்கள் மற்றும் வேலைப்பளுக்கள் நாளுக்கு நாள் அதிகரித்து வருவதாக தொழிலாளர் முன்னணியின் செயலாளரும், கொட்டகலை பிரதேச சபை உறுப்பினருமான புஸ்பா விஸ்வநாதன் தெரிவித்துள்ளார்.

இந்த நிலை காரணமாக தோட்டத் தொழிலாளர்கள் முன்னெப்போதும் இல்லாத வகையில் மன உளைச்சலுக்கும் பல்வேறு நெருக்கடிகளுக்கும் முகங்கொடுத்து வருவதாகவும் அவர் தெரிவித்துள்ளார்.

கொட்டகலையில் நேற்றைய தினம் (03.10.2026) நடைபெற்ற ஊடகவியலாளர் சந்திப்பில் வைத்தே அவர் இந்த விடயத்தை கூறியுள்ளார்.

விடுக்கப்பட்டுள்ள அழைப்பு

அவர் மேலும் தெரிவிக்கையில், தோட்டத் தொழிலாளர்களின் உரிமைகளைப் பாதுகாப்பதற்காக சகல தொழிற்சங்கங்களும் இன, மத மற்றும் கட்சி பேதங்களை கடந்து ஒன்றிணைந்து செயற்பட வேண்டும் என அவர் அழைப்பு விடுத்துள்ளார்.

தொழிலாளர்களுக்கு முன்னர் ஞாயிற்றுக்கிழமை விடுமுறை வழங்கப்பட்ட நிலையில், தற்போது வெள்ளிக்கிழமை மற்றும் சனிக்கிழமைகளிலும் வேலை வாய்ப்புகள் குறைக்கப்பட்டு வருவதாக அவர் குற்றஞ்சாட்டினார்.

அத்துடன் குறித்த நாட்களில் பணியாற்ற வேண்டுமாயின் கைகாசு அடிப்படையில் பணியாற்ற வேண்டும் என சில தோட்ட நிர்வாகங்கள் தொழிலாளர்களுக்கு அழுத்தம் கொடுப்பதாகவும் அவர் தெரிவித்தார்.

இதனால் தொழிலாளர்களுக்காக செலுத்தப்பட வேண்டிய EPF மற்றும் ETF உள்ளிட்ட சமூகப் பாதுகாப்பு பங்களிப்புகள் மற்றும் அரசாங்கத்தினால் அதிகரிக்கப்பட்ட 200 ரூபாய் கொடுப்பனவு ஆகியவற்றைத் தவிர்க்கும் நிலை ஏற்படுவதாகவும் அவர் குற்றஞ்சாட்டினார்.

அச்சத்துடன் பணியாற்றும் பணியாளர்கள்

மேலும் பல தோட்டங்கள் முறையாகப் பராமரிக்கப்படாமல் காடுகளாக மாறியுள்ள நிலையில் புலி, சிறுத்தை மற்றும் பாம்பு உள்ளிட்ட விலங்குகளின் நடமாட்டத்தால் தொழிலாளர்கள் அச்சத்துடன் பணியாற்ற வேண்டிய நிலை ஏற்பட்டுள்ளதாகவும் தெரிவித்துள்ளார்.

அதேவேளை தோட்டப் பகுதிகள் தனியாருக்கு பிரித்துக் கொடுக்கப்படுவதன் மூலம் தோட்டங்கள் துண்டாடப்பட்டு தொழிலாளர்களின் உரிமைகளும் வாழ்வாதாரமும் பாதிக்கப்படுவதாகவும் அவர் குற்றஞ்சாட்டினார்.

இவ்வாறான பிரச்சினைகள் ஒரு சில தோட்டங்களில் மாத்திரமன்றி பல தோட்டங்களில் பரவலாக இடம்பெற்று வருவதாகவும் அவர் தெரிவித்தார்.

எனவே தோட்டத் தொழிலாளர்களின் உரிமைகளைப் பாதுகாப்பதற்காக சகல தொழிற்சங்கங்களும் ஒன்றிணைந்து குரல் கொடுக்க வேண்டும் எனவும், அரசாங்கம் தொழிலாளர் பிரச்சினைகளில் அதிக கவனம் செலுத்த வேண்டும் எனவும் கோரியுள்ளார்.

மேலும் இவ்வாறான நடவடிக்கைகளுக்கு எதிராக எந்தவொரு தொழிற்சங்கமாவது முன்வந்து போராட்டத்தை முன்னெடுத்தால் தமது முழுமையான ஆதரவை வழங்கத் தயாராக இருப்பதாகவும் அவர் மேலும் சுட்டிக்காட்டியுள்ளார். 

தலைமறைவாகியிருந்த ஞானசார தேரர் கைது! நீதிமன்றில் முன்னிலைப்படுத்த நடவடிக்கை

இலங்கை கடற்பரப்பில் குவிந்துள்ள ஈரானிய கப்பல்கள்! இலங்கைக்கு மறைமுகமாக காத்திருக்கும் பாரிய சிக்கல்