இலங்கை கடற்பரப்பின் அருகில் உள்ள ஈரானியக் கப்பல்கள்! அமெரிக்க அழுத்தம் குறித்து அரச தரப்பு விளக்கம்

இலங்கையின் கடற்பரப்பிற்கு அருகில் நிலைகொண்டுள்ள ஈரானியக் கப்பல்கள் தொடர்பில் அமெரிக்காவிடம் இருந்து எந்தவொரு அழுத்தமும் பிரயோகிக்கப்ப்டவில்லை என்று அமைச்சர் விஜித ஹேரத் தெரிவித்துள்ளார்.

அதே நேரம் நாட்டின் இறையாண்மை மற்றும் அடையாளத்தைப் பாதுகாத்தே இலங்கை அரசாங்கம் தீர்மானங்களை எடுக்கின்றது என்றும், எந்தவொரு மனிதாபிமானத் தேவையின் போதும் பொருத்தமான முறையில் தலையிட அரசாங்கம் தயார் என்றும்  குறிப்பிட்டுள்ளார்.

நாட்டின் கடற்பரப்பிற்கு அருகில் நிறுத்தப்பட்டுள்ள ஈரானியக் கப்பல்கள் தொடர்பில் வெளியாகும் தகவல்கள் குறித்து விளக்கமளிக்கும் போதே அமைச்சர் இதனைத் தெரிவித்துள்ளார்.

உண்மைக்கு புறம்பான செய்தி

ஹோர்முஸ் நீரிணையில் நிலவும் நெருக்கடியான சூழ்நிலை காரணமாகக் கப்பல் போக்குவரத்து சிக்கலாகியுள்ளது. அதன் காரணமாக இலங்கையைத் தவிர மலேசியா மற்றும் இந்தோனேசியா போன்ற நாடுகளுக்கு அருகிலுள்ள சர்வதேசக் கடற்பரப்புகளிலும் இவ்வாறு கப்பல்கள் நிறுத்தப்பட்டுள்ளன.

இலங்கைக்கு அருகிலுள்ள சர்வதேசக் கடற்பரப்பில் சுமார் 47 கப்பல்கள் நிறுத்தப்பட்டுள்ளதுடன், அவை அண்மையில் வந்தவை அல்ல . நீண்டகாலமாகவே குறித்த சர்வதேசக் கடற்பரப்பில் நிறுத்தப்பட்டுள்ளன.

அந்தக் கப்பல்களில் 19 ஈரானியக் கப்பல்கள் அடங்குகின்ற போதிலும், அவை இலங்கையின் கடற்பரப்பிற்குள் நிறுத்தப்படவில்லை. மேலும், குறித்த கப்பல்களுக்கு உணவு அல்லது நீரை வழங்குவதைத் தடுக்குமாறு அமெரிக்கா இலங்கைக்கு அறிவித்துள்ளதாகப் பரவி வரும் செய்திகள் முற்றிலும் உண்மைக்கு புறம்பான செய்தியாகும்.

இலங்கை அரசாங்கத்திற்கு அவ்வாறான எந்தவொரு அழுத்தமோ, தலையீடோ அல்லது அறிவிப்போ அமெரிக்காவினால் விடுக்கப்படவில்லை.

புவிசார் அரசியல் முக்கியத்துவம்

எமது இறையாண்மை மற்றும் அடையாளத்தைப் பாதுகாத்தே நாங்கள் அனைத்துத் தீர்மானங்களையும் எடுக்கின்றோம். எனினும், மனிதநேயக் காரணங்களால் எமக்குத் தேவை ஏற்படும் பட்சத்தில் தேவையான தலையீட்டை நாங்களும் செய்வோம்.

அத்துடன் 'IRIS Bushehr' கப்பல் இன்னமும் திருகோணமலைத் துறைமுகத்தில் நிறுத்தப்பட்டுள்ளதுடன், அதிலுள்ள 13 கடற்படையினருக்குத் தேவையான உணவு, தங்குமிடம் மற்றும் பாதுகாப்பை வழங்கி அந்தக் கப்பலைப் பாதுகாப்பாகப் பராமரிக்க இலங்கை நடவடிக்கை எடுத்து வருகின்றது.

எனினும், அமெரிக்காவினால் தடைகள் விதிக்கப்பட்டுள்ள கப்பல்களுக்குப் பொருட்களைக் கொண்டு செல்வதையோ அல்லது விநியோகங்களை வழங்குவதையோ இலங்கை அரசாங்கம் மேற்கொள்ளவில்லை.

இலங்கை எப்போதும் சர்வதேசக் கடல்சார் சட்டத்திற்கு அமையவே செயற்படுகின்றது. இலங்கை அமைந்துள்ள புவிசார் அரசியல் முக்கியத்துவம் காரணமாக உலகின் பல்வேறு நாடுகளுக்கும் சொந்தமான பெருமளவிலான கப்பல்கள் தினமும் தீவிற்கு அருகில் பயணிப்பதால், ஒரு நாடாக இலங்கை தேவையான எந்தவொரு சந்தர்ப்பத்திலும் அக்கப்பல்களுக்கு ஆதரவையும் வழிகாட்டலையும் வழங்கக் கடமைப்பட்டுள்ளது என்றும் அமைச்சர் விஜித ஹேரத் தொடர்ந்தும் குறிப்பிட்டுள்ளார்.  

ரணிலின் சூழ்ச்சிக்குள் சிக்கியுள்ள மகிந்த குடும்பம் : பரிதாப நிலையில் ராஜபக்சர்கள்

இலங்கையில் வெளிநாட்டு முதலீட்டுகள் தொடர்பில் அமெரிக்க அறிக்கையிலுள்ள அதிர்ச்சி தகவல்கள்..