திருகோணமலையில் நூற்றுக்கணக்கான வீடுகள் கைவிடப்பட்ட நிலையில்! அரச நிதி துஷ்பிரயோகம் குறித்து விசாரணை - பிரதி அமைச்சர்

2015 - 2019 காலப்பகுதியில் ஆரம்பிக்கப்பட்ட வீடமைப்பு திட்டங்கள் முழுமையாக நிறைவு செய்யப்படாததால், திருகோணமலை மாவட்டத்தில் நூற்றுக்கணக்கான வீடுகள் கைவிடப்பட்ட நிலையில் காணப்படுவதாக பிரதி அமைச்சர் அருண் ஹேமச்சந்திர தெரிவித்துள்ளார்.

இத்திட்டங்களுக்காக ஒதுக்கப்பட்ட அரச நிதி துஷ்பிரயோகம் செய்யப்பட்டமை தொடர்பில் விசாரணைகள் மேற்கொள்ளப்பட்டு சட்ட நடவடிக்கைகளை முன்னெடுப்பதற்கான நடவடிக்கைகள் எடுக்கப்பட்டு வருவதாகவும் அவர் சுட்டிக்காட்டியுள்ளார்.

மூதூர் பிரதேசத்தில் குறைந்த வருமானம் கொண்ட வீடற்ற மூன்று குடும்பங்களுக்கு அரச நிதியின் மூலம் நிர்மாணிக்கப்பட்ட வீடுகளை நேற்று (10.10.2026) உத்தியோகபூர்வமாக கையளித்த பின்னர் ஊடகங்களுக்குக் கருத்துத் தெரிவிக்கும்போதே அவர் இவ்வாறு தெரிவித்துள்ளார்.

வீடமைப்புத் திட்டங்கள் ஆரம்பம்

மேலும் கூறுகையில், 2015 முதல் 2019 வரையான நல்லாட்சி அரசாங்கத்தின் காலப்பகுதியில் நாட்டின் பல்வேறு பகுதிகளிலும் புதிய வீடமைப்புத் திட்டங்கள் ஆரம்பிக்கப்பட்டன. இதற்காகப் பெருமளவிலான அரச நிதி செலவிடப்பட்ட போதிலும், பல இடங்களில் வீடமைப்புப் பணிகள் முழுமையாக நிறைவு செய்யப்படவில்லை.

சில இடங்களில் வீடுகளுக்கான அத்திவாரங்கள் மட்டுமே அமைக்கப்பட்டுள்ளன. வேறு சில இடங்களில் சுவர்கள் ஓரளவுக்கு நிர்மாணிக்கப்பட்ட பின்னர் பணிகள் இடைநிறுத்தப்பட்டுள்ளன. இதனால், பல வீடமைப்புத் திட்டங்கள் பயன்பாடற்ற நிலையில் காணப்படுகின்றன.

சில பயனாளிகள் தமது சொந்தப் பணத்தைச் செலவிட்டு வீடுகளை ஓரளவுக்குப் பூர்த்தி செய்து குடியிருப்பதற்குத் தயார்படுத்தியுள்ளனர். எனினும், பல பகுதிகளில் வீடுகள் முழுமையடையாததால், பயனாளிகள் பெரும் சிரமங்களை எதிர்கொண்டு வருகின்றனர். குறிப்பாக, திருகோணமலை மாவட்டத்தின் பல்வேறு பகுதிகளில் நூற்றுக்கணக்கான வீடுகள் முழுமையடையாமல் கைவிடப்பட்டுள்ளன.

வீடமைப்புத் திட்டங்களை ஆரம்பிப்பதாகக் கூறி பொதுமக்கள் ஏமாற்றப்பட்டுள்ளதுடன், இதற்காக ஒதுக்கப்பட்ட அரச நிதி உரிய முறையில் பயன்படுத்தப்பட்டதா என்ற கேள்வியும் எழுந்துள்ளது.

அரசியல் பழிவாங்கல் நடவடிக்கை

2019ஆம் ஆண்டுக்குப் பின்னரான அரசியல் மாற்றங்கள் மற்றும் அரசியல் பழிவாங்கல் நடவடிக்கைகளும் சில திட்டங்கள் தொடர்ந்து முன்னெடுக்கப்படாமல் போனமைக்குக் காரணமாக அமைந்தது.

இந்நிலையில், தேசிய மக்கள் சக்தி அரசாங்கம் கைவிடப்பட்ட வீடமைப்புத் திட்டங்கள் தொடர்பில் விரிவான ஆய்வுகளை மேற்கொண்டுள்ளதாகவும், அவற்றை மீள ஆரம்பித்து நிறைவு செய்வதற்கான நடவடிக்கைகள் முன்னெடுக்கப்பட்டு வருவதாகவும் அவர் குறிப்பிட்டுள்ளார்.

இதற்காக நிதி ஒதுக்கீடுகள் மேற்கொள்ளப்பட்டு வருவதுடன், திருகோணமலை மாவட்டத்திலும் கைவிடப்பட்ட வீடமைப்புத் திட்டங்களை மீள ஆரம்பிக்கும் பணிகள் முன்னெடுக்கப்பட்டுள்ளதாகத் தெரிவித்துள்ளார். 

மேலும், வீடமைப்புத் திட்டங்களுக்காக ஒதுக்கப்பட்ட அரச நிதி துஷ்பிரயோகம் செய்யப்பட்டுள்ளதா என்பது தொடர்பில் சம்பந்தப்பட்ட அமைச்சின் ஊடாக விசாரணைகள் மேற்கொள்ளப்பட்டு அறிக்கை சமர்ப்பிக்கப்பட்டுள்ளதாகவும், இதனடிப்படையில் மேலதிக சட்ட நடவடிக்கைகளை முன்னெடுப்பதற்குச் சம்பந்தப்பட்ட அமைச்சுகள் நடவடிக்கை எடுத்து வருவதாகவும் அவர் குறிப்பிட்டுள்ளார்.