எனது இதயம் வலியால் நிரம்பியுள்ளது: மணிப்பூர் சம்பவம் தொடர்பில் பிரதமர் மோடி வேதனை

இந்திய மணிப்பூர் மாநிலத்தில் இரண்டு பழங்குடியின பெண்களின் ஆடைகளைக் களைத்து வீதியில் ஊர்வலமாக அழைத்துச் சென்ற கொடூரமான சம்பவம் தொடர்பில் பிரதமர் மோடி வேதனை தெரிவித்துள்ளார்.

“எனது இதயம் வலியால் நிரம்பியுள்ளது என்றும் இந்தச் சம்பவம் எந்த ஒரு நாகரிக சமூகத்துக்கான அவமானம்” எனவும் இன்றைய தினம் (20.07.2023) ஊடகங்களுக்குத் தனது வேதனையைப் பகிர்ந்துள்ளார்.

இனக் கலவரத்தால் பாதிக்கப்பட்டுள்ள இந்தியாவின் வடக்கு கிழக்கு மாநிலமான மணிப்பூரில், குகி பழங்குடியினத்தைச் சேர்ந்த இரண்டு பெண்களை, மைதேயி சமூகத்தைச் சேர்ந்த ஆண்களின் கும்பல் ஒன்று சேர்ந்து ஆடைகளைக் களைத்து வீதியில் ஊர்வலமாக அழைத்துச் சென்ற கொடூரமான காணொளி சமூக வலைத்தளங்களில் பகிரப்பட்டு அதிர்ச்சியை ஏற்படுத்தியுள்ளது.

நான் நாட்டுக்கு உறுதியளிக்கிறேன்

இந்தச் சம்பவம் குறித்துப் பேசிய பிரதமர் மோடி, "மணிப்பூரில் நடந்துள்ள சம்பவம் நாகரிக சமூகத்துக்கான அவமானம். இதற்காக நாடு வெட்கப்படுகிறது.

பெண்களுக்கு எதிரான குற்றங்கள் மீது நடவடிக்கை எடுக்க கடுமையான சட்டங்களை இயற்றும்படி நான் அனைத்து மாநில முதல்வர்களுக்கும் வேண்டுகோள் விடுக்கிறேன்.

இந்தச் சம்பவம் ராஜஸ்தான், சத்தீஸ்கர், மணிப்பூர் எங்கு வேண்டுமானாலும் நடந்திருக்கலாம், குற்றவாளிகள் நாட்டின் எந்தப் பகுதியில் இருந்தாலும் தப்பக் கூடாது. நான் நாட்டுக்கு உறுதியளிக்கிறேன்.

சட்டம் அதன் முழு பலத்துடன் தனது கடமையைச் செய்யும். மணிப்பூரின் மகள்களுக்கு நடந்தது மன்னிக்க முடியாதது" என்று பிரதமர் மோடி தெரிவித்துள்ளார்.

வன்முறை

மணிப்பூரில் மைதேயி சமூகத்தினருக்கும் குகி சமூகத்தினருக்கும் இடையே கடந்த மே 3ஆம் திகதி முதல் மோதல் ஏற்பட்டது. சுமார் 2 மாதங்களுக்கும் மேலாக நீடிக்கும் கலவரத்தில் இதுவரை 142 பேர் உயிரிழந்துள்ளனர். 500-க்கும் மேற்பட்டோர் காயமடைந்துள்ளனர்.

65,000 பேர் வீடுகளை இழந்து அகதிகளாகியுள்ளனர். இதுவரை 5,995 வழக்குகள் பதிவு செய்யப்பட்டுள்ளன.

இந்த நிலையில் இந்தக் கலவரம் தொடர்பாக பிரதமர் மோடி தற்போதுதான் பேசியுள்ளார் என்பது குறிப்பிடத்தக்கது.

மணிப்பூர் முதல்வர் என்.பிரேன் சிங் கூறியுள்ளதாவது, "நேற்று வெளியான வீடியோவில் மனிதாபிமானமற்ற முறையில், அவமரியாதை செய்யப்பட்ட இரண்டு பெண்களுக்காக எனது இதயம் கலங்குகிறது.

மரண தண்டனை

இந்தச் சம்பவம் குறித்து தானாக முன்வந்து வழக்கு பதிவு செய்யப்பட்ட பின்னர், அதிரடி நடவடிக்கையில் இறங்கிய மணிப்பூர் பொலிஸார் இன்று காலையில் முதல் கைது நடவடிக்கையில் ஈடுபட்டுள்ளனர்.

தற்போது முழுவீச்சில் விசாரணை நடந்து வருகிறது. குற்றவாளிகளுக்கு எதிராக மரண தண்டனை கிடைக்கும் வகையில் கடுமையான நடவடிக்கை எடுக்கப்படும் என்று உறுதி கூறுகிறேன்.

இதுபோன்ற கொடூரமான செயல்களுக்கு நமது சமூகத்தில் இடம் இல்லை என்பதை புரிந்து கொள்ளவேண்டும்" என்று தெரிவித்துள்ளார்.