ஞானசாரரின் காவி உடை குறித்த விசாரணை அமர்விலிருந்து தலைமை நீதிபதி விலகல்

சிறைத்தண்டனை விதிக்கப்பட்டதைத் தொடர்ந்து, கலகொடஅத்தே ஞானசார தேரர் சிறை ஆடையை அணிய வேண்டும் என சிறைச்சாலை அதிகாரிகள் எடுத்த தீர்மானத்தை எதிர்த்துத் தாக்கல் செய்யப்பட்ட மனுக்களை விசாரிக்கும் அமர்வில் இருந்து மேல்முறையீட்டு நீதிமன்றத் தலைமை நீதிபதி ரொஹான்த அபேசூரிய விலகியுள்ளார்.

சிறைச்சாலை அதிகாரிகளின் தீர்மானத்தை செல்லுபடியற்றதாக்குமாறு கோரி தாக்கல் செய்யப்பட்ட மனுக்கள் இன்று (14) பரிசீலனைக்கு எடுத்துக்கொள்ளப்பட்ட போதே இத்தீர்மானம் அறிவிக்கப்பட்டுள்ளது.

இதனையடுத்து, குறித்த மனுக்களை பரிசீலிப்பதற்காக மூன்று நீதிபதிகள் அடங்கிய புதிய அமர்வு ஒன்று நியமிக்கப்பட்டுள்ளது.

விசாரணை அமர்வு 

நீதிமன்ற அவமதிப்பு வழக்கில் ஞானசார தேரருக்கு விதிக்கப்பட்ட எஞ்சிய சிறைத்தண்டனையை நடைமுறைப்படுத்துமாறு சிறைச்சாலை அதிகாரிகளுக்கு நீதிமன்றம் உத்தரவிட்டதைத் தொடர்ந்து, அவர் சிறையில் அடைக்கப்பட்டமை தொடர்பிலேயே இம்மனுக்கள் தாக்கல் செய்யப்பட்டுள்ளன.

கடந்த 2019 ஆம் ஆண்டு மே மாதம் முன்னாள் ஜனாதிபதி மைத்திரிபால சிறிசேனவினால் ஞானசார தேரருக்கு வழங்கப்பட்ட ஜனாதிபதி பொதுமன்னிப்பை, உயர் நீதிமன்றம் இந்த ஆண்டு செப்டெம்பர் மாதம் இரத்து செய்தது.

அத்தீர்ப்பைத் தொடர்ந்து, அவரது எஞ்சிய சிறைத்தண்டனையை நடைமுறைப்படுத்துவதற்குத் தேவையான நடவடிக்கைகளை எடுக்குமாறு சிறைச்சாலைகள் ஆணையாளர் நாயகத்திற்கு மேல்முறையீட்டு நீதிமன்றம் உத்தரவிட்டது.

நீதிமன்ற அவமதிப்பு குற்றத்திற்காக ஞானசார தேரருக்கு ஆரம்பத்தில் ஆறு ஆண்டுகள் சிறைத்தண்டனை விதிக்கப்பட்டிருந்த போதிலும், 2019இல் ஜனாதிபதி பொதுமன்னிப்புப் பெறுவதற்கு முன்னர் அவர் சுமார் ஒன்பது மாதங்கள் மட்டுமே சிறைத்தண்டனை அனுபவித்திருந்தார் என்பது குறிப்பிடத்தக்கது. 

இரத்து செய்யப்பட்ட அனோஜனின் மரண தண்டனை.. அரசாங்கம் வெளியிட்டுள்ள தகவல்

ஷிரந்தி ராஜபக்ச தொடர்பில் எடுக்கப்பட்டுள்ள முக்கிய முடிவு - கசிந்துள்ள தகவல்