லங்காசிறி FM
செப்பு ஏற்றுமதிக்கு தடை விதித்த கொங்கோ அரசு
கற்கள் மற்றும் சுத்திகரிக்கப்படாத கனிமப் பொருட்களின் ஏற்றுமதியைக் கட்டுப்படுத்தி, உள்நாட்டிலேயே அவற்றுக்கு மேலதிக மதிப்பைக் கூட்டும் முயற்சியை கொங்கோ ஜனநாயகக் குடியரசு முன்னெடுத்து வருகின்றது.
அத்துடன், செப்பு (Copper) மற்றும் கொபால்ட் (Cobalt) தாதுக்களின் ஏற்றுமதிக்கு கொங்கோ ஜனநாயகக் குடியரசு உடனடித் தடையும் விதித்துள்ளது.
அந்த நாட்டுச் சுரங்க அமைச்சு, வெளிநாட்டு வர்த்தக அமைச்சு மற்றும் பொருளாதார அமைச்சு என்பன இணைந்து வெளியிட்டுள்ள கூட்டு உத்தரவொன்றிலேயே இந்தத் தடைப் பிரகடனம் விடுக்கப்பட்டுள்ளது.
லண்டனில் செப்பின் விலை உயர்வு
உள்நாட்டுச் சுத்திகரிப்பு திறனை அதிகரிக்கும் நோக்கில் முன்னெடுக்கப்பட்டுள்ள இந்நடவடிக்கையின் காரணமாக, லண்டன் உலோகம் பரிவர்த்தனைச் சந்தையில் (LME) செப்பின் விலை மெட்ரிக் தொன் ஒன்றுக்கு 14,369 அமெரிக்க டொலர்கள் வரை கணிசமாக உயர்வைப் பதிவுசெய்துள்ளது.
எனினும், நாட்டின் பொருளாதாரத்திற்குத் தேவையாகக் கருதப்படும் சில முக்கிய மூலோபாய சூழ்நிலைகளின் கீழ், இந்த ஏற்றுமதித் தடையிலிருந்து ஒரு வருட காலத்திற்கு தற்காலிக விலக்கு அளிக்கப்படலாம் என்றும் அந்த உத்தரவில் சுட்டிக்காட்டப்பட்டுள்ளது.
சுத்திகரிக்கப்படாத தாதுக்களாக ஏற்றுமதி செய்வதை விட, அதிக மதிப்புக்கூட்டப்பட்ட உற்பத்திப் பொருட்களாகவே சர்வதேச சந்தைக்கு விற்பனை செய்யப்பட வேண்டும் என்பதில் அரசு உறுதியாக உள்ளதாகத் தெரிவிக்கப்படுகின்றது.
கொங்கோ ஏற்கனவே தனது நாட்டின் செப்பு உற்பத்தியில் பெரும்பாலானவற்றை உள்நாட்டிலேயே சுத்திகரிப்பு செய்து ஏற்றுமதி செய்து வருகின்றமையால், இந்தத் தடையால் பெரும்பாலான நிறுவனங்களுக்குப் பெரியளவில் பாதிப்புகள் ஏற்படாது என பொருளாதார வல்லுநர்கள் கணிப்பிட்டுள்ளனர்.
யாழ்ப்பாணம், வவுனியா, கனடா, Canada, Montreal, Canada
31 Aug, 2015
