வங்காள விரிகுடாவில் அதிதீவிர புயலாக வலுப்பெற்ற அர்னாப்! இலங்கைக்கு சிவப்பு எச்சரிக்கை

புதிய இணைப்பு

மேற்கு - மத்திய வங்காள விரிகுடா பிராந்தியத்தில் நிலவிய “அர்னாப்” (Arnab) சூறாவளி மேலும் வலுவடைந்து 'மிகத் தீவிர புயலாக' மாற்றமடைந்துள்ளது.

இன்று (27) அதிகாலை 02.30 மணியளவில் வட அகலாங்கு 15.9° மற்றும் கிழக்கு நெட்டாங்கு 85.4° க்கு அருகில், அதாவது காங்கேசன்துறையிலிருந்து சுமார் 890 கி.மீ வடகிழக்கு திசையில் இந்த தீவிர புயலாக மையக்கொண்டிருந்ததாக வளிமண்டலவியல் திணைக்களம் தெரிவித்துள்ளது.

இது இன்று பி.ப. 05.30 மணி வரை மேற்கு - வடமேற்கு திசையை நோக்கி நகரக்கூடிய சாத்தியக்கூறுகள் அதிகமாக இருப்பதுடன், அதன்பின்னர் வடமேற்கு திசையை நோக்கி நகர்ந்து நாளை முற்பகல் 11.30 மணியளவில் ஆந்திரப் பிரதேச கடற்கரையினூடாக இந்தியக் கரையை கடக்கும் என எதிர்பார்க்கப்படுகிறது.

இன்று (27) மேல், சபரகமுவ, தென் மற்றும் வடமேல் மாகாணங்களிலும் நுவரெலியா மாவட்டத்திலும் 75 மில்லிமீற்றருக்கும் அதிகமான மழைவீழ்ச்சி பதிவாகக்கூடும் எனவும் திணைக்களம் முன்னறிவித்துள்ளது.

புயலின் நேரடி தாக்கம் இலங்கைக்கு இல்லை என்றபோதிலும்,  சபரகமுவ, தென் மற்றும் வடமேல் மாகாணங்களிலும் நுவரெலியா மாவட்டத்திலும் 75 மில்லிமீற்றருக்கும் அதிகமான மழைவீழ்ச்சி பதிவாகக்கூடும் எனவும் வளிமண்டலவியல் திணைக்களம் தெரிவித்துள்ளது.

முதலாம் இணைப்பு

வங்காள விரிகுடாவில் உருவான 'அர்னாப்' சூறாவளி தீவிர புயலாக வலுவடைந்து வருவதால் இலங்கையைச் சூழவுள்ள ஆழ்கடல் மற்றும் கரையை அண்டிய பகுதிகளுக்கு வளிமண்டலவியல் திணைக்களத்தின் இயற்கை அனர்த்தங்கள் தொடர்பான முன்னெச்சரிக்கை மையத்தால் 'சிவப்பு எச்சரிக்கை' விடுக்கப்பட்டுள்ளது.

நேற்றுப்(26) பிற்பகல் 2.30 மணியளவில் காங்கேசன்துறையில் இருந்து வடகிழக்கே சுமார் 1,050 கிலோமீற்றர் தொலைவில் மையம் கொண்டிருந்த இந்தச் சூறாவளி, மேலும் தீவிரமடைந்து இன்று தீவிர புயலாக வலுவடையும் என எதிர்பார்க்கப்படுகின்றது.

அபாயகரமான கடற்பகுதிகள்

அதன்பின்னர், இது நாளை முற்பகல் 11.30 மணியளவில் இந்தியாவின் ஆந்திரப் பிரதேசக் கரைப்பகுதியைக் கடந்து செல்லும் என்று வளிமண்டலவியல் திணைக்களம் கணித்துள்ளது.

குறிப்பிட்ட அபாயகரமான கடற்பகுதிகளில் காற்றின் வேகம் அவ்வப்போது மணிக்கு 80 முதல் 100 கிலோமீற்றர் வரை அதிகரிக்கக்கூடுவதுடன், பலத்த இடிமின்னலுடன் கூடிய மழை பெய்யக்கூடும்.

கடற்பகுதிகளில் அலைகள் 3.0 முதல் 4.0 மீற்றர் வரை உயரக்கூடுவதுடன், கடல் மிகவும் கொந்தளிப்பாகக் காணப்படும்.

வட அகலாங்கு 10ஏ - 20ஏ மற்றும் கிழக்கு நெட்டாங்கு 80ஏ - 95ஏ இற்கு இடைப்பட்ட கடற்பகுதிகளில் மீன்பிடி மற்றும் கடற்பயணங்களில் ஈடுபடும் சமூகத்தினர், மறு அறிவித்தல் வரை அத்தகைய நடவடிக்கைகளில் ஈடுபடுவதைத் முற்றாகத் தவிர்த்து, உடனடியாகப் பாதுகாப்பான இடங்களைச் சென்றடையுமாறு அறிவுறுத்தப்படுகின்றார்கள்.

சிவப்பு எச்சரிக்கை

கொழும்பு முதல் காலி, மாத்தறை, அம்பாந்தோட்டை, பொத்துவில், மட்டக்களப்பு ஊடாக முல்லைத்தீவு வரையிலான கடற்பகுதிகளில் காற்றின் வேகம் அவ்வப்போது மணிக்கு 60 முதல் 65 கிலோமீற்றர் வரை அதிகரிக்கக்கூடும் என்பதால் அப்பகுதிகள் கொந்தளிப்பாக இருக்கும்.

புத்தளம் முதல் கொழும்பு, காலி மற்றும் மாத்தறை ஊடாக பொத்துவில் வரையிலான கரையை அண்டிய கடற்பகுதிகளில் அலைகள் 2.0 முதல் 2.5 மீற்றர் வரை உயரக்கூடும்.

இடிமின்னலுடன் கூடிய மழை பெய்யும் வேளைகளில் வீசும் காற்றின் வேகம் தற்காலிகமாக மணிக்கு 60 முதல் 70 கிலோமீற்றர் வரை அதிகரிக்கக்கூடும் என்று வளிமண்டலவியல் திணைக்களம் மேலும் எச்சரித்துள்ளது.

இயற்கையின் கோரத் தாண்டவம்! இதுவரையில் 12 உயிர்கள் பலி

யாழில் கொட்டித்தீர்த்த கனமழை! நயினாதீவில் அதிகூடிய மழைவீழ்ச்சி பதிவு