போர்ட் சிட்டி விசா வழங்கல் தொடர்பில் எழுந்துள்ள சர்ச்சை

அண்மையில் நடைபெற்ற அரசாங்க நிதி பற்றிய நாடாளுமன்றக் குழு கூட்டத்தின் போது, போர்ட் சிட்டி திட்டத்திற்குள் விசாக்கள் வழங்கப்படுவது மற்றும் அவற்றைக் கண்காணிப்பது தொடர்பான வெளிப்படைத்தன்மை மற்றும் பொறுப்புக்கூறல் குறித்து நாடாளுமன்ற உறுப்பினர்கள் கடுமையான கவலைகளை எழுப்பியுள்ளனர்.

நாடாளுமன்ற உறுப்பினர்கள் குழு, நாட்டிற்குள் நுழையும் நபர்கள் தங்களது ஆவணங்களை முறைப்படுத்துவதற்காக நிர்ணயிக்கப்பட்டுள்ள கட்டாய 30 நாள் ஒழுங்குமுறை நடைமுறைகளைச் சரியாகப் பின்பற்றுகிறார்களா என்பது தொடர்ச்சியாகக் கண்காணிக்கப்படுகிறதா எனக் கேள்வி எழுப்பியுள்ளது. 

வெளிப்படைத்தன்மை

இதற்குப் பதிலளித்த அதிகாரிகள், வருகை தரும் ஒவ்வொரு நபரையும் உடனுக்குடன் (Real-time) தனித்தனியாகச் சரிபார்ப்பதற்குப் பதிலாக, மாதாந்தக் காலமுறை அறிக்கைகள் (Periodic Monthly Reporting) மட்டுமே பெறப்படுவதாக ஒப்புக்கொண்டுள்ளனர்.

இந்த நிலையில்,தொடர்ச்சியான மற்றும் கடுமையான கண்காணிப்பு அமைப்பு இல்லாததை நாடாளுமன்ற உறுப்பினர்கள் விமர்சித்தனர்.

இவ்வாறு வருகை தந்த 14,000க்கும் மேற்பட்ட விசா வைத்திருப்பவர்கள் சட்டப்படி நடக்கிறார்களா என்பதற்கு அதிகாரிகள் எவ்வாறு உத்தரவாதம் அளிக்க முடியும் என்றும் அவர்கள் கேள்வி எழுப்பினர்.

அத்துடன், குறித்த முக்கிய நிறுவனத்திற்கு சட்டப் பணிப்பாளர் (Legal Director) என்ற பிரத்யேகப் பதவி இதுவரை நியமிக்கப்படாமல் இருப்பது போன்ற நிர்வாகக் குறைபாடுகளையும் உறுப்பினர்கள் சுட்டிக்காட்டினர்.

இத்தகைய குறைபாடுகள் முறையான முதலீடுகளைக் கொண்டுவருவதில் தாமதத்தையும் வெளிப்படைத்தன்மை யின்மையையும் ஏற்படுத்துவதாகவும் அவர்களால் குற்றம் சாட்டப்பட்டது. 

ஷிரந்தியின் போலி முகத்தை அம்பலப்படுத்திய அரசாங்கம் - முடிவுக்கு வந்த ஏமாற்று நாடகம்

ஞானசார தேரருக்கு ஆதரவாகப் பாதயாத்திரை: வெலிக்கடையில் பலத்த பாதுகாப்பு