கொழும்பில் ஈரானிய தூதுவரின் இல்லத்திற்குள் பாய்ந்த ஆடம்பர கார் - பயங்கரவாத தாக்குதல் என சந்தேகம்

கொழும்பிலுள்ள ஈரான் தூதுவரின் உத்தியோகபூர்வ இல்லத்தின் மதிலை உடைத்துக் கொண்டு, அதன் வளாகத்திற்குள் நுழைந்த பென்ஸ் கார் தொடர்பில் சர்ச்சை நிலை ஏற்பட்டுள்ளது.

இந்த சம்பவம் ஒரு தீவிரவாத செயலா என்பது குறித்து விரிவான விசாரணைகள் நடத்தப்பட்டு வருவதாக கறுவாத்தோட்டம் பொலிஸார் நேற்று கொழும்பு தலைமை நீதவான் நீதிமன்றத்திற்கு தெரிவித்துள்ளனர்.

குறித்த விபத்தை ஏற்படுத்திய காரில் ஏதேனும் வெடிபொருட்கள் உள்ளதா என்பது குறித்து சோதிக்கப்பட்டுள்ளது.

தூதரகத்திற்குள் பாய்ந்த  கார்

அரச பகுப்பாய்வாளர், வெடிபொருள் செயலிழப்புப் பிரிவு மற்றும் பொலிஸ் மோப்ப நாய் பிரிவு ஆகியவற்றின் மூலம் மேலதிக விசாரணைகள் நடத்தப்பட்டு வருவதாக கறுவாத்தோட்டம் பொலிஸ் அதிகாரிகள், கொழும்பு மேலதிக மேஜஸ்திரேட் லஹிரு சில்வா முன்னிலையில் தெரிவித்துள்ளார்.

2026ஆம் ஆண்டு ஒக்டோபர் 31 ஆம் திகதி இந்த விபத்து இடம்பெற்றுள்ளது.

இந்த விபத்தை ஏற்படுத்திய காரின் சாரதியாக செயற்பட்ட 27 வயதான முகமது தார்ப் மன்சூர், காரில் பயணித்ததாகக் கூறப்படும் முகமது இன்ஹாம், மயூரான் கனகசுந்தரம் மற்றும் முகமது உஸ்மான் ஆகிய நான்கு சந்தேகநபர்களை கறுவாத்தோட்டம் பொலிஸார் கைது செய்து நீதிமன்றத்தில் முன்னிலைப்படுத்தப்பட்டனர்..

சந்தேகநபர்களின் குடும்ப உறவினர்கள் இந்த விபத்து தொடர்பாக இலங்கையிலுள்ள ஈரான் தூதுவரை சந்தித்துப் கலந்துரையாடியதாக வழக்கறிஞர்கள் ஊடாக நேற்று நீதிமன்றத்திற்குத் தெரிவித்தனர்.

தகவல்களை பரிசீலித்த மேலதிக நீதவான் நான்கு சந்தேகநபர்களையும் பிணையில் செல்ல உத்தரவிட்டுள்ளார்.

விசாரணையின் முன்னேற்றத்தை இந்த மாதம் 30 ஆம் திகதி அறிக்கை சமர்ப்பிக்குமாறு கறுவாத்தோட்டம் பொலிஸாருக்கு உத்தரவிட்டுள்ளார்.

you may like this