வரவு செலவுத் திட்டம் தொடர்பான அறிவிப்பு

வரவு செலவுத் திட்ட ஒதுக்கீட்டுச் சட்டமூலம் முதலாவது மதிப்பீட்டுக்காக செப்டெம்பர் 26ஆம் திகதி நாடாளுமன்றத்தில் சமர்ப்பிக்கத் திட்டமிடப்பட்டுள்ளதாக சபை முதல்வர் அமைச்சர் பிமல் ரத்நாயக்க தெரிவித்துள்ளார்.

மேலும் வரவு செலவுத் திட்ட விவாதங்கள் தொடர்பில் நேற்று(15.09.2025) நாடாளுமன்றத்தில் நடைபெற்ற செய்தியாளர் மாநாட்டில் அவர் உரையாற்றுகையில்,

“நிதி அமைச்சர் என்ற ரீதியில் ஜனாதிபதி அநுரகுமார திஸாநாயக்க 2025 நவம்பர் 7ஆம் திகதி வரவு செலவுத் திட்ட உரையை நாடாளுமன்றத்தில் நிகழ்த்துவார்.

அதனைத் தொடர்ந்து, நவம்பர் 8ஆம் திகதி முதல் நவம்பர் 14ஆம் திகதி வரை 6 நாட்கள் வரவு செலவுத் திட்ட இரண்டாவது வாசிப்பை நடத்துவதற்கும் தீர்மானிக்கப்பட்டுள்ளது. இதற்கமைய, நவம்பர் 14ஆம் திகதி பிற்பகல் 6.00 மணிக்கு இரண்டாவது வாசிப்பிற்கான வாக்கெடுப்பு நடத்தப்படும்.

புலிகளின் ஆயுதங்களைக் களவாடிய கோட்டாபய! தட்டிக் கேட்ட அநுரகுமார

ஜனாதிபதியின் வரவு செலவுத் திட்ட உரை

இதன் பின்னர் நவம்பர் 15ஆம் திகதி முதல் டிசம்பர் 5ஆம் திகதி வரை 17 நாட்கள் குழுநிலை விவாதத்தை நடத்துவதற்கும், டிசம்பர் 5ஆம் திகதி பி.ப 6.00 மணிக்கு மூன்றாவது வாசிப்பிற்கான வாக்கெடுப்பை நடத்துவதற்கும் இணக்கம் காணப்பட்டது.

இந்தக் காலப்பகுதியில் அரசாங்க விடுமுறைகள் மற்றும் ஞாயிற்றுக்கிழமைகள் தவிர சனிக்கிழமை உள்ளிட்ட ஏனைய அனைத்து நாட்களிலும் வரவு செலவுத்திட்ட விவாதம் நடைபெறும்.

குழுநிலை விவாதம் நடைபெறும் காலப்பகுதியில் திங்கட்கிழமைகளில் மு.ப 9.30 மணிக்கும், ஏனைய நாட்களில் மு.ப 9.00 மணிக்கும் நாடாளுமன்றத்தைக் கூட்டுவதற்குத் தீர்மானிக்கப்பட்டுள்ளது.

நிலையியற் கட்டளை

இதற்கு அமைய இக்காலப் பகுதியில் நிலையியற் கட்டளை 22 இல் குறிப்பிடப்பட்டுள்ள 1 முதல் 6 வரையான நாடாளுமன்ற அலுவல்களுக்கு மேலதிகமாக வாய்மூல விடைக்கான ஐந்து கேள்விகள் மற்றும் நிலையியற் கட்டளை 27(2) இன் கீழான கேள்வி ஒன்றுக்காகவும் நேரத்தை ஒதுக்குவதற்குத் தீர்மானிக்கப்பட்டுள்ளது.

இக்காலப் பகுதியில் பி.ப 6.00 மணிவரையும் வரவுசெலவுத்திட்ட விவாதத்தை நடத்துவதற்கும், வாக்கெடுப்பு நடத்தப்படும் தினங்கள் தவிர்ந்த ஏனைய தினங்களில் பி.ப 6.00 மணி முதல் 6.30 மணிவரையான காலப்பகுதியை ஆளும் கட்சி மற்றும் எதிர்க்கட்சிக்கு 50:50 என்ற அடிப்படையில் சபை ஒத்திவைப்பு நேரத்தின் போதான பிரேரணைகளுக்காக ஒதுக்குவதற்கும் தீர்மானிக்கப்பட்டுள்ளது” எனத் தெரிவித்துள்ளார்.

அரசாங்கத்திற்கு நெருக்கடியை கொடுத்துள்ள செம்மணி மனிதப் புதைகுழி!

நேபாளத்தில் ஹீரோவாக மாறிய இலங்கை அரசியல்வாதி! உயிர்களை காப்பாற்றி தானும் தப்பிய செந்தில்