மட்டக்களப்பில் பெண் ஒருவர் கொலை வழக்கு : 3 பேருக்கும் விளக்கமறியல் நீடிப்பு

மட்டக்களப்பில் பெரும் பரபரப்பை ஏற்படுத்திய பெண்கள் கடத்தப்பட்டு தங்க ஆபரணங்களை கொள்ளையிட்டு கிணற்றில் வீசி எறிந்து கொலை செய்த சம்பவம் தொடர்பாக விளக்கமறியலில் வைக்கப்பட்டிருந்த கணவன் மனைவி மற்றும் கணவனின் சகோதரன் உட்பட 3 பேருக்கும் விளக்கமறியல் நீடிக்கப்பட்டுள்ளது.

குறித்த வழக்கானது நேற்றுமுன்தினம்(28.09.2026) விசாரணைக்கு எடுத்துக் கொள்ளப்பட்டபோதே எதிர்வரும் 12 ஆம் திகதிவரை விளக்கமறியலில் வைக்குமாறு மட்டக்களப்பு நீதவான் நீதிமன்ற நீதவான் உத்தரவிட்டுள்ளார்.

சம்பவத்தில் கைது செய்யப்பட்டவர்கள்

கடந்த மார்ச் மாதம் 20ஆம் திகதி கொக்கட்டிச்சோலை நெல்லிக்காட்டு வயல் பிரதேசத்தில் பாழடைந்த கிணற்றில் இருந்து வவுணதீவு கொத்தியாவல பிரதேசத்தைச் சேர்ந்த 26 வயது இளம் தாய் ஒருவர் மற்றும் 3 வயது 4 மாதம் கொண்ட சிறுமி ஒருவர் உயிருடனும் மீட்கப்பட்டனர்.

மேலும் ஏற்கனவே காணாமல் போனதாகக் கருதப்பட்ட மற்றொரு பெண் ஒருவர் சடலமாக கிணற்றில் இருந்து மீட்கப்பட்டார்.

இச்சம்பவம் தொடர்பாக மாவட்ட சிரேஷ்ட பொலிஸ் அத்தியட்சகர் லலித் லீலாரெத்தினவின் நேரடி கண்காணிப்பில் கிழக்கு மாகாண பெரும் குற்றத் தடுப்பு பிரிவு பொறுப்பதிகாரி தெய்வநாயகம் மேனன் தலைமையிலான பொலிஸ் குழுவினர் அதிரடி விசாரணை முன்னெடுத்தனர்.

இதன்போது மனநிலை பாதிக்கப்பட்டவர்களுக்கு நித்திரைக்கு வழங்கும் மாத்திரைகளை பழச்சாற்றில் கொடுத்து கடத்தி கொலை செய்து கொள்ளையிட்டு வந்த சூத்திரதாரிகளான காஞ்சிரம்குடா பகுதியைச் சேர்ந்த கொள்ளை குழுவினரான வெற்றிவேல் சதீஸ்வரன் அவருடைய 26 வயதுடைய மனைவி சோமசுந்தரம் சர்லியா மற்றும் கணவனின் சகோதரனான 22 வயதுடைய வெற்றிவேல் தனோஜன் ஆகிய ஒரே குடும்பத்தைச் சேர்ந்த 3 பேரும் மற்றும் கொள்ளையடிக்கப்பட்ட தங்க ஆபரணங்களை கொள்வனவு செய்த ஊறணி, திருகோணமலை, வீதிகளைச் சேர்ந்த இரு நகைக்கடை உரிமையாளர்கள் இருவர் உட்பட 5 பேரை  பொலிஸார் கைது செய்தனர். 

இச்சம்பவத்தில் கைது செய்யப்பட்டவர்கள் கடந்த 22ஆம் திகதி மட்டக்களப்பு நீதவான் நீதிமன்றில் முன்னிலைப்படுத்தப்பட்டதையடுத்து அவர்களை தொடர்ந்து விளக்கமறியலில் வைக்கப்பட்ட நிலையில் கொள்ளையர்களிடம் இருந்து தங்க ஆபரணங்களை கொள்வனவு செய்த இரு கடை உரிமையாளர்கள்; மயக்க மருந்து ஸ்பிரேயர் வைத்திருந்த ஆட்டோ சாரதி மற்றும் (பாமசி) உரிமையாளர் உட்பட 4 பேரையும் நீதிமன்ற பிணையில் வெளிவந்ததுடன் கொள்ளையர்களான ஒரே குடும்பத்தைச் சேர்ந்த 3 பேரும் தொடர்ந்து விளக்கமறியல் வைக்கப்பட்டனர். 

வழக்கு விசாரணை

இதில் கைது செய்யப்பட்ட ஒரே குடும்பத்தைச் சேர்ந்த 3 பேருக்கு எதிராக கிழக்கு மாகாண பெரும் குற்றத் தடுப்பு பிரிவு 3 குற்றச்சாட்டின் கீழ் முதலாவது குற்றமான மட்டக்களப்பு பிரதான பஸ் தரிப்பு நிலையத்தில் பெண் ஒருவருக்கு மயக்க மாத்திரை கலந்து யூஸ் கொடுத்து அவரின் தங்க ஆபரணங்களை கொள்ளையிட்ட கணவன் மனைவிக்கும்

இரண்டாவது குற்றமான பழுகாமத்தில் பெண் ஒருவருக்கு மயக்க மாத்திரை கலந்து யூஸ் கொடுத்து கடத்தி சென்று தங்க ஆபரணங்களை கொள்ளையிட்டு அவரை கொக்கட்டிச்சோலை செல்லிக்காடு வயல் பிரதேசத்தில் உள்ள கிணறு ஒன்றில் வீசி கொலை செய்த கணவன் மனைவிக்கும்.

மூன்றாவது குற்றமான வவுணதீவு பிரதேசத்தைச் சேர்ந்த இளம் தாய் அவரது 3 வயது 4 மாதம் கொண்ட குழந்தைக்கு மயக்க மாத்திரை கலந்த யூஸ் வழங்கி முச்சக்கரவண்டியில் கடத்தி சென்று தங்க ஆபரணங்களை கொள்ளையிட்டு இளம் தாயை ஏற்கனவே பெண் ஒருவரை கடத்தி கொள்ளையிட்டு கிணற்றில் வீசி கொலை செய்த அதே கிணற்றில் அவரை வீசியதுடன் அவரது குழந்தையை சதுப்பு நிலப்பகுதியில் தனியாக விட்டு சென்ற கணவன் மனைவி மற்றும் கணவனின் சகோதரனுக்கு எதிராக பொலிஸார் வழக்கு தாக்கல் செய்தனர்.

இதன் பிரகாரம் குறித்த வழக்கு விசாரணைக்காக கடந்த 28ஆம் திகதி திங்கட்கிழமை திறந்த நீமிமன்றில் எடுத்துக் கொள்ளப்பட்டதையடுத்து நீதவான் 3 பேரையும் 12ஆம் திகதிவரை விளக்கமறியல் வைக்குமாறும் உத்தரவிட்டு வழக்கை ஒத்திவைத்தார்.

குடும்பத்துடன் சென்ற வர்த்தகர் கொடூரமாக தாக்கப்பட்டு கடத்தல் - மனைவி காயம் - தப்பிய மகள்கள்

இலங்கை மத்திய வங்கியின் நாணயக்கொள்கை மாற்றம் தொடர்பில் முக்கிய தீர்மானம்