கொழும்பில் சமூக பிறழ்வான முறையில் இயங்கிய விடுதிகள்: வியட்நாம் பெண்கள் கைது

Sri Lanka Police Colombo Crime Vietnam

By Sivaa Mayuri Nov 20, 2024 06:43 PM GMT

Sivaa Mayuri

in குற்றம்

Report

Courtesy: Sivaa Mayuri

வாடிக்கையாளர்களிடம் இருந்து 35,000 ரூபாய் முதல் 50,000 வரை கட்டணம் வசூலித்து, கொழும்பில் சமூக பிறழ்வான முறையில் இயங்கிய இரண்டு விடுதிகளை நடத்திய, வியட்நாமியப் பெண்கள் குழுவொன்று கைது செய்யப்பட்டுள்ளது.

இலங்கையின் குடிவரவு மற்றும் குடியகல்வுத் திணைக்களத்தினர் இந்த கைது நடவடிக்கையை இன்று (20) மேற்கொண்டுள்ளனர்.

இதன்படி, பம்பலப்பிட்டியில் உள்ள அடுக்குமாடி குடியிருப்பு மற்றும் வோர்ட் பிளேஸில் உள்ள வீடு ஆகியவற்றில் இருந்து, குடிவரவு திணைக்களத்தினர், ஏழு பெண்கள் உட்பட ஒன்பது வியட்நாம் நாட்டவர்களை கைது செய்தனர்.

இரகசிய தகவல்

சமூக ஊடகங்கள் ஊடாக மிகவும் இரகசியமான முறையில் நடத்தப்படும் விடுதியொன்றைப் பற்றி அறிந்து கொண்டு, பம்பலப்பிட்டியில் உள்ள இடத்துக்கு செல்ல இரகசிய திட்டத்தை பயன்படுத்தியதாக குடிவரவு குடியகழ்வு திணைக்களத்தின் அதிகாரி ஒருவர் தெரிவித்துள்ளார்.

கொழும்பில் சமூக பிறழ்வான முறையில் இயங்கிய விடுதிகள்: வியட்நாம் பெண்கள் கைது | Vietnamese Including Women Arrested Colombo

இந்தநிலையில், குறித்த வெளிநாட்டவர்களும் கடந்த செப்டெம்பர் மாதம் 30ஆம் திகதி சுற்றுலா விசாவில் இலங்கை வந்ததாகவும், நாட்டில் தங்கி சட்டவிரோத வியாபாரத்தை நடத்துவதற்கு மூன்று மாதங்களுக்கு தமது விசாவை நீடித்துக்கொண்டதாகவும் கூறப்படுகிறது.

குறித்த தவறான நடத்தையில் ஈடுபடும் விடுதியின் உரிமையாளரான மற்றொரு வியட்நாமிய நபர் துபாயில் இருந்து இயங்கி வந்ததும், கைது செய்யப்பட்ட வெளிநாட்டவர் குழுவினரும் துபாயிலிருந்து வந்தவர்கள் என்பதும் முதற்கட்ட விசாரணையில் இருந்து தெரியவந்துள்ளது.

கைது செய்யப்பட்ட வெளிநாட்டவர்கள் மேலதிக விசாரணைகளுக்காக வெலிசரவில் உள்ள திணைக்களத்தின் தடுப்பு முகாமுக்கு அனுப்பப்படுவார்கள் என்று அறிவிக்கப்பட்டுள்ளது.