ஐரோப்பா மீதான வரிகள் குறித்து ட்ரம்பின் அதிரடி அறிவிப்பு

அமெரிக்க ஜனாதிபதி டொனால்ட் ட்ரம்ப், ஐரோப்பிய ஒன்றியத்திலிருந்து (EU) இறக்குமதி செய்யப்படும் கார் மற்றும் லாரிகளுக்கான இறக்குமதி வரியை 25 சதவீதமாக உயர்த்துவதாக அறிவித்துள்ளார்.

இது சர்வதேச வர்த்தக உலகில் பெரும் பரபரப்பை ஏற்படுத்தியுள்ளது. தனது சமூக வலைதளமான 'ட்ரூத் சோஷியல்' (Truth Social) பக்கத்தில் ட்ரம்ப் வெள்ளிக்கிழமை விடுத்த அறிக்கையில் இதனை குறிப்பிட்டுள்ளார்.

ஐரோப்பிய ஒன்றியம் ஏற்கனவே ஒப்புக்கொண்ட வர்த்தக ஒப்பந்தத்தின்படி நடக்கவில்லை என்று அவர் குற்றம் சாட்டியுள்ளார்.

இருப்பினும், எந்த விதத்தில் அவர்கள் ஒப்பந்தத்தை மீறினார்கள் என்பது குறித்த விளக்கத்தை அவர் அளிக்கவில்லை.

தற்போது 15 சதவீதமாக உள்ள வரி, அடுத்த வாரம் முதல் 25 சதவீதமாக உயர்த்தப்பட உள்ளது. வெளிநாட்டு கார் உற்பத்தி நிறுவனங்கள் தங்களது ஆலைகளை அமெரிக்காவிற்கு மாற்ற வேண்டும் என்று ட்ரம்ப் வலியுறுத்தியுள்ளார்.

அமெரிக்காவில் உள்ள தொழிற்சாலைகளில் கார் மற்றும் லாரிகளை உற்பத்தி செய்தால், அவர்களுக்கு எந்த வரியும் விதிக்கப்படாது என்று அவர் தெளிவுபடுத்தியுள்ளார்.

தற்போது அமெரிக்காவில் சுமார் 100 பில்லியன் டாலர் மதிப்பிலான கார் தொழிற்சாலைகள் கட்டப்பட்டு வருவதாகவும் அவர் பெருமிதம் தெரிவித்துள்ளார்.

கடந்த ஆண்டு ஜூலை மாதம் ஸ்காட்லாந்தில் உள்ள ட்ரம்ப்பின் கோல்ஃப் மைதானத்தில் வைத்து எட்டப்பட்ட ஒப்பந்தத்தின் மூலம் ஐரோப்பிய பொருட்களுக்கு 15% வரி விதிக்கப்பட்டது.

கிரீன்லாந்து விவகாரத்தில் ஏற்பட்ட மோதல் மற்றும் ஐரோப்பிய நாடாளுமன்றத்தின் சில தடைகளால் இந்த ஒப்பந்தம் ஏற்கனவே சிக்கலில் இருந்தது.

கார் உற்பத்தி என்பது ஐரோப்பாவிற்கு (குறிப்பாக ஜெர்மனி மற்றும் பிரான்ஸ்) ஒரு முக்கியமான தொழில் என்பதால், ட்ரம்ப்பின் இந்த முடிவு ஐரோப்பிய பொருளாதாரத்தைப் பெரிதும் பாதிக்கும் என அஞ்சப்படுகிறது.

அண்மையில் அமெரிக்க உச்சநீதிமன்றம் ட்ரம்ப்பின் சில வரி விதிப்புகளைச் சட்டவிரோதம் என்று அறிவித்திருந்தது.

ஆனால், கார் மீதான இந்த வரி உயர்வு வேறு சட்ட நடைமுறைக்கு உட்பட்டது என்பதால், அந்தத் தீர்ப்பு இந்த முடிவைப் பாதிக்காது எனத் தெரிவிக்கப்படுகின்றது.