அவுஸ்திரேலியாவில் இலங்கை இளைஞனின் ஆபத்தான செயல் - பலர் வைத்தியசாலையில் அனுமதி

அவுஸ்திரேலியாவின் நியூகாஸ்ல் பகுதியில் ரக்பி லீக் ரசிகர்களின் கூட்டத்திற்குள் கார் புகுந்ததில் மூன்று 3 சிறுவர்கள் உட்பட 10 பேர் காயமடைந்துள்ளனர்.

இந்த சம்பவத்தைத் தொடர்ந்து, இலங்கையை பின்புலமாக கொண்ட 18 வயது இளைஞன் கைது செய்யப்பட்டு அவர் மீது குற்றச்சாட்டுகள் பதிவு செய்யப்பட்டுள்ளன.

சந்தேக நபர் இந்திக்க சமரசிங்க என அடையாளம் காணப்பட்டுள்ளார். சந்தேகநபர் மீது பல குற்றச்சாட்டுகள் சுமத்தப்பட்டுள்ளன.

இளைஞனின் ஆபத்தான செயல்

இதில் ஆபத்தான முறையில் வாகனம் ஓட்டி கடுமையான காயத்தை ஏற்படுத்தியமை மற்றும் தவறான நடத்தையால் காயத்தை ஏற்படுத்தியமை ஆகிய மூன்று குற்றச்சாட்டுகள் அடங்கும்.

மிகவும் தீவிரமான ஆபத்தான முறையில் வாகனம் ஓட்டியது என்ற குற்றச்சாட்டுக்கு அதிகபட்சமாக ஏழு ஆண்டுகள் சிறைத்தண்டனை விதிக்கப்பட வாய்ப்புள்ளதாக தெரிவிக்கப்படுகிறது.

சமரசிங்க ஒக்டோபர் 15ஆம் திகதியன்று மீண்டும் நீதிமன்றத்தில் முன்னிலைப்படுத்தப்படவுள்ளார்.

சனிக்கிழமையன்று காலை சுமார் 9.30 மணியளவில் நியூகாஸ்ல் லிங்க் வீதியில்உள்ள Transfield Avenue பகுதியில் இந்தச் சம்பவம் நடந்தது.

அங்கு நியூகாஸில் நைட்ஸ் அணியின் ஆதரவாளர்கள் ஆயிரக்கணக்கானோர், தங்கள் நகரத்தின் NRL அணியினரை வழியனுப்பி வைப்பதற்காகக் கூடியிருந்தனர்.

இதன் போது வாகனத்தின் மீதான கட்டுப்பாட்டை இழந்த ஓட்டுநர், பல ஆதரவாளர்கள் மீது மோதியதாக பொலிஸார் தெரிவித்துள்ளனர்.

கட்டாய பரிசோதனை

2 முதல் 67 வயதுக்குட்பட்ட 10 பேர் காயமடைந்தனர். அவர்கள் சம்பவ இடத்திலேயே முதலுதவி சிகிச்சையைப் பெற்ற பிறகு ஜான் ஹண்டர் மருத்துவமனைக்குக் கொண்டு செல்லப்பட்டனர்.

சம்பவ இடத்திலேயே ஓட்டுநர் கைது செய்யப்பட்டு, கட்டாயப் பரிசோதனைக்காக அழைத்துச் செல்லப்பட்டார்.

இச்சம்பவம் திட்டமிட்டு நடத்தப்பட்டதாகக் கருதப்படவில்லை என்று பொலிஸார் தெரிவித்துள்ளனர்.

விபத்து ஏற்படுவதற்கு முன்பு வாகனம் முறையற்ற விதத்தில் ஓட்டப்பட்டதாகவும், அங்கிருந்த கூட்டத்தினர் அவர்கள் மீது ஆவேசமாகத் திரும்பியதைத் தொடர்ந்து ஓட்டுநரையும் இரண்டு பயணிகளையும் பொலிஸார் அங்கிருந்து வெளியேற்ற வேண்டியிருந்ததாகவும் உதவி ஆணையர் டேவிட் வாடெல் கூறினார்.

கொண்டாட்டங்களில் ஈடுபட்டிருந்தவர்களில் அந்த ஓட்டுநரும் ஒருவராகத் தோன்றியதாகவும், அவர் வாகனத்தின் மீதான கட்டுப்பாட்டை இழந்திருக்கலாம் என்றும் நியூகாஸில் நகர மேயர் கேவின் மோரிஸ் தெரிவித்தார்.