இ.போ.ச. பேருந்துகளுக்கு தொடரும் நெருக்கடி! தனியார் போக்குவரத்துச் சங்கம் மீது குற்றச்சாட்டு

இலங்கை போக்குவரத்துச் சபைக்குச் சொந்தமான பேருந்துகளுக்கு இடையூறு விளைவிக்கப்படுவதால், பல்வேறு சிக்கல்களை எதிர்கொண்டு வருவதாக பருத்தித்துறை போக்குவரத்துச் சாலை முகாமையாளர் தெரிவித்துள்ளார்.

வடமராட்சிக் கிழக்குப் பகுதியில் பல தடவைகள் தமது பேருந்துகள் வழிமறிக்கப்படுவதுடன், சாரதிகளும் அச்சுறுத்தப்படுவதாக அவர் குறிப்பிட்டுள்ளார்.

பல்வேறு நெருக்கடி

இதனால், பொதுமக்களுக்கான போக்குவரத்துச் சேவைகளை முன்னெடுப்பதில் பல்வேறு நெருக்கடிகளை எதிர்கொண்டு வருவதாகவும் தெரிவித்துள்ளார்.

அண்மைக்காலமாக இலங்கை போக்குவரத்துச் சபையினருக்கும் தனியார் போக்குவரத்துச் சங்கத்தினருக்கும் இடையில் பல்வேறு முரண்பாடுகள் இடம்பெற்று வந்துள்ளன.

இந்நிலையில், குறித்த பிரச்சினைகள் தொடர்பாக வடமராட்சிக் கிழக்கு பிரதேச ஒருங்கிணைப்புக் குழுக் கூட்டத்தில் அதன் தலைவர் தலையிட்டு தீர்வுகள் எட்டப்பட்டிருந்ததாகத் தெரிவிக்கப்படுகிறது.

 சாரதியுடன் முரண்பாடு

எனினும், இலங்கை போக்குவரத்துச் சபையின் பேருந்துகளுக்கு தொடர்ந்து இடையூறுகள் ஏற்படுத்தப்படுவதாக பருத்தித்துறை சாலை முகாமையாளர் குற்றஞ்சாட்டியுள்ளார்.

நேற்றைய தினமும் கேவில் பகுதியில் இருந்து பருத்தித்துறை நோக்கிப் பயணிக்கவிருந்த இலங்கை போக்குவரத்துச் சபைக்குச் சொந்தமான பேருந்தின் முன்பாக ஒருவர் தனது உந்துருளியை நிறுத்தி, பேருந்து சாரதியுடன் முரண்பட்டதாகக் கூறப்படுகிறது.

குறித்த சம்பவம் தொடர்பான காணொளியை பருத்தித்துறை சாலை அதிகாரிகள் எமது செய்திச் சேவைக்கு அனுப்பி வைத்துள்ளனர்.

அந்தக் காணொளியில், ஒருவர் பேருந்தில் ஏறி அதனை நிறுத்துவதுடன், சாரதியுடன் முரண்படும் காட்சிகளும் பதிவாகியுள்ளன. இவ்வாறான சம்பவங்களால் பொதுமக்களுக்கான போக்குவரத்துச் சேவைகள் பாதிக்கப்படக்கூடிய நிலை ஏற்பட்டுள்ளதாகத் தெரிவிக்கப்படுகிறது.

ஜனாதிபதி செயலக வளாகத்தில் தொடரும் பதற்றம்! நீதிமன்றம் பிறப்பித்த அதிரடி உத்தரவு