சுவிட்சர்லாந்தில் சிவாஜிலிங்கம் மற்றும் மூத்த ஊடகவியலாளர் சபேஸ்வரனுக்கு அஞ்சலி
கனகலிங்கம் சிவாஜிலிங்கம் மற்றும் மறைந்த மூத்த ஊடகவியலாளர் ஆறுமுகராசா சபேஸ்வரன் ஆகியோருக்கான நினைவு வணக்க நிகழ்வு உணர்வுபூர்வமாக இடம்பெற்றுள்ளது.
குறித்த நிகழ்வு நேற்று (22.11.2026) சுவிட்சர்லாந்தின் லுற்சேர்ன் பகுதியில் நடைபெற்றுள்ளது.
சுவிஸ் தமிழ் ஊடக மையத்தின் ஏற்பாட்டில் நடைபெற்ற இந்நிகழ்வில், இரு ஆளுமைகளினதும் சமூகப் பங்களிப்புகள் மற்றும் பணிகள் நினைவுகூரப்பட்டு அஞ்சலி செலுத்தப்பட்டுள்ளது.
உணர்வுபூர்வ அஞ்சலி நிகழ்வு
சுவிஸ் தமிழ் ஊடக மையத்தின் பொருளாளர் இணுவையூர் மயூரனின் தொகுப்பில் நிகழ்வு ஆரம்பமானது. இதன் ஆரம்ப நிகழ்வாக, சிவாஜிலிங்கத்திற்கான நினைவுச் சுடரினைத் தற்காப்புக் கலை ஆசிரியர் விபுலானந்தன் கௌரிதாசன் ஏற்றி வைத்துள்ளார்.

தொடர்ந்து, மறைந்த மூத்த ஊடகவியலாளர் ஆறுமுகராசா சபேஸ்வரனுக்கான நினைவுச் சுடரினை இராமநாதன் பவான் ஏற்றி வைத்துள்ளார்.
மலர் வணக்க நிகழ்வினை சுவிட்சர்லாந்தின் செங்காளன் நகர நாடாளுமன்றத் தலைவர் துரைராஜா ஜெயக்குமார் ஆரம்பித்து வைத்ததுடன், நிகழ்வில் கலந்துகொண்ட ஏனையோரும் மலர் தூவி அஞ்சலி செலுத்தியுள்ளனர்.
இதன்போது, சிவாஜிலிங்கம் தொடர்பான நினைவுரையைச் சுவிஸ் தமிழ் ஊடக மையத்தின் செயலாளர் அசோக் ஆற்றியுள்ளார்.
ஆறுமுகராசா சபேஸ்வரனின் நினைவுகள் பகிர்வு
மேலும், சிவாஜிலிங்கத்தின் உதவியாளராகப் பணியாற்றிய ரவீந்திரன், அவருடனான தனது அனுபவங்களையும் நினைவுகளையும் பகிர்ந்துகொண்டுள்ளார்.

அத்துடன், லுற்சேர்ன் துர்க்கை அம்மன் ஆலயம் மற்றும் லுற்சேர்ன் ஆன்மீகப் பணியகம் ஆகியவற்றின் பிரதிநிதிகளும் ஏனையோரும் நினைவுரைகளை நிகழ்த்தியுள்ளனர்.
மறைந்த மூத்த ஊடகவியலாளர் ஆறுமுகராசா சபேஸ்வரன் தொடர்பான நினைவுரையைச் சுவிஸ் தமிழ் ஊடக மையத்தின் தலைவர் ஜெராட் ஆற்றியுள்ளார்.
இரு ஆளுமைகளின் சமூகப் பங்களிப்புகளையும் பணிகளையும் நினைவுகூரும் வகையில் நடைபெற்ற இந்நிகழ்வு, அவர்களுக்கு அஞ்சலி செலுத்தும் உணர்வுபூர்வமான நினைவுப் பகிர்வாக அமைந்துள்ளது.

