சுகாதார சேவை எப்போதும் ஓர் அத்தியாவசிய சேவையே! அமைச்சர் நளிந்த ஜயதிஸ்ஸ வலியுறுத்தல்

Sri Lanka Ministry of Health Sri Lanka Nalinda Jayatissa

By Rakesh Mar 15, 2026 03:05 AM GMT

Rakesh

in சமூகம்

Report

இலங்கையின் சுகாதார சேவையை வலுப்படுத்தும் நோக்கில், புதிய தாதியர் பயிற்சிக்காக 2918 பேரை இணைத்துக் கொள்ளும் உத்தியோகபூர்வ நிகழ்வு நேற்று (14.03.2026) அலரி மாளிகையில் நடைபெற்றது.

சுகாதார மற்றும் ஊடகத்துறை அமைச்சர் வைத்தியர் நளிந்த ஜயதிஸ்ஸ தலைமையில் இந்த நிகழ்வு இடம்பெற்றது.

2025ஆம் ஆண்டுக்குரிய, 2022ஆம் ஆண்டு தொகுதியைச் சேர்ந்த விண்ணப்பதாரர்களே இவ்வாறு தெரிவு செய்யப்பட்டுள்ளனர். இவர்கள் நாடளாவிய ரீதியில் உள்ள 15 தாதியர் பாடசாலைகளில் மூன்று ஆண்டு காலப் பயிற்சியினைப் பெறவுள்ளனர்.

எண்ணிக்கையை அதிகரிக்க நடவடிக்கை

நிகழ்வில் உரையாற்றிய அமைச்சர் வைத்தியர் நளிந்த ஜயதிஸ்ஸ, "ஆரம்பத்தில் 2625 பேரை மாத்திரமே இணைத்துக் கொள்ள அனுமதி இருந்தது. எனினும், உரிய நிறுவனங்களுடன் கலந்துரையாடி அந்த எண்ணிக்கையை 2918 ஆக அதிகரிக்க நடவடிக்கை எடுக்கப்பட்டது.

தெரிவு செய்யப்பட்டவர்கள் எதிர்வரும் 19 மற்றும் 20 ஆகிய திகதிகளில் தாதியர் பாடசாலைகளில் பதிவு செய்யப்படுவார்கள். ஏப்ரல் 6ஆம் திகதி இவர்களுக்கான பயிற்சிகள் உத்தியோகபூர்வமாக ஆரம்பமாகும். பயிற்சிகளை நிறைவு செய்யும் இவர்கள், 2029 ஏப்ரல் மாதம் இறுதித் தேர்வை எதிர்கொண்டு, அதே ஆண்டு ஜூன் மாதளவில் நிரந்தர சேவையில் இணைத்துக் கொள்ளப்படவுள்ளனர்.

தற்போது மத்திய அரசின் கீழ் 29749 பேரும், மாகாண சபைகளின் கீழ் 13804 பேரும் என மொத்தம் 43553 தாதியர்கள் சேவையில் ஈடுபட்டுள்ளனர். இது சுகாதார சேவையின் மொத்த ஆளணியில் 30 சதவீதமாகும். சுகாதார சேவை என்பது ஒரு புனிதமான சேவையாகும்.

அத்தியாவசிய சேவை

பொதுப் பாதுகாப்புச் சட்டத்தின் கீழ் வர்த்தமானி மூலம் அறிவிக்கப்பட்டாலும் இல்லாவிட்டாலும், இது எப்போதும் ஒரு அத்தியாவசிய சேவையே ஆகும். இந்தச் சேவையில் ஏற்படும் சிறு தடங்கலும் ஒட்டுமொத்த நாட்டையுமே பாதிக்கும் என்று அமைச்சர் சுட்டிக்காட்டினார்.

இந்நிகழ்வில் சுகாதார அமைச்சின் செயலாளர் விசேட வைத்திய நிபுணர் அனில் ஜாசிங்க, அமைச்சின் மேலதிக செயலாளர்கள், பிரதிப் பணிப்பாளர்கள் மற்றும் தாதியர் பாடசாலை அதிபர்கள் உள்ளிட்ட பல முக்கிய அதிகாரிகள் கலந்துகொண்டிருந்தனர்.