அரசாங்க மருத்துவமனைகள் பாரிய நெருக்கடியில்

அரசாங்க மருத்துவமனைகளின் சிகிச்சை மற்றும் மருந்து வழங்கல் சேவைகள் எதிர்வரும் வாரங்களில் பெரும் நெருக்கடியை எதிர்கொள்ளவுள்ளது.

தற்போதைய ஓய்வூதிய சுற்றுநிருபத்தின் அடிப்படையில் 60 வயதை கடந்த பெருமளவான வைத்தியர்கள் இம்மாத இறுதியில் ஓய்வு பெறவுள்ளனர்.

மறுபுறத்தில், மருந்து தட்டுப்பாடு மற்றும் மருந்துகளை இறக்குமதி செய்வதற்குப் போதுமான நிதி ஒதுக்கப்படாமை காரணமாகவும் அரசாங்க மருத்துவமனைகளின் செயற்பாடுகள் கடும் நெருக்கடிக்கு உள்ளாகியுள்ளதாக தெரிவிக்கப்படுகின்றது.

மருத்துவர்களுக்கான வயது வரம்பு

மருத்துவர்களின் பணி வயது 60 ஆக வரையறுக்கப்பட்டுள்ளதால், இருநூறு விசேட மருத்துவ நிபுணர்கள், இருநூறு பொது மருத்துவர்கள், அரசாங்கத்தில் பதிவுசெய்யப்பட்டுள்ள மருத்துவர்கள் 250, 50 பல் மருத்துவர்கள் ஆகியோர் இம்மாதம் 30 ஆம் திகதி ஓய்வு பெற உள்ளனர்.

பதிவு செய்யப்பட்ட மருத்துவர்களில் 650 பேர் பிராந்திய மருத்துவமனைகளில் பணிபுரிந்து வருவதாகவும், இவர்களில் சுமார் 350 பேர் இம்மாதம் 30ஆம் திகதி ஓய்வு பெறவுள்ளமையினால் அந்த மருத்துவமனைகளை தொடர்ந்தும் இயக்குவது பெரும் நெருக்கடியாக மாறியுள்ளதாகவும் சுகாதாரத்துறை வட்டாரங்கள் தெரிவிக்கின்றன.

இவ்வாறான நெருக்கடிகளைக் கருத்திற் கொண்டு, மருத்துவர்களுக்கான வயது வரம்பை 63 ஆக நீட்டித்து இடையில் சுற்றறிக்கையொன்று வெளியிடப்பட்டது, பின்னர் அரசாங்கத்தின் பொதுவான கொள்கை முடிவின் அடிப்படையில் குறித்த சுற்றறிக்கை இரத்து செய்யப்பட்டது.

புதிய சுற்றறிக்கையை இரத்து செய்யவும், வயதை 63 ஆக உயர்த்தும் சுற்றறிக்கையை மீண்டும் நடைமுறைப்படுத்தவும் விசேட மருத்துவ நிபுணர்கள், பொதுமருத்துவர்கள், பல் மருத்துவர்கள் மற்றும் பதிவு செய்யப்பட்ட அரசாங்க மருத்துவர்கள் அடங்கிய குழு நீதிமன்றத்தில் மனுவொன்றைத் தாக்கல் செய்துள்ளது.

தற்போது அது நீதிமன்றத்தில் ஆராயப்பட்டு வருகின்றது.

வெளிநாடு 

இதேவேளை, பயிற்சியை நிறைவு செய்த சுமார் 1400 வைத்தியர்களுக்கு கடந்த ஏப்ரலில் பயிற்சியின் பின்னரான நியமனங்கள் வழங்கப்பட்டிருந்தது.

எனினும், சுமார் 300 வைத்தியர்களுக்கு நியமனக் கடிதங்கள் இதுவரை கிடைக்கவில்லை எனவும் அறியமுடிகின்றது.

குறித்த நியமனத்தை ஏற்காத பலர் வெளிநாடு சென்றுள்ளதாகவும் தெரியவருகிறது.

மருந்து தட்டுப்பாடு 

இதேவேளை, நாடு முழுவதிலும் உள்ள மருத்துவமனைகளில் பல்வேறு நோய்களுக்கான மருந்துகளுக்கு பெரும் தட்டுப்பாடு ஏற்பட்டுள்ளது.

அதன் காரணமாக தொடர்ச்சியாக கிளினிக்குகளுக்குச் சென்று, சிகிச்சை பெற்று வரும் பொதுமக்கள் பெரும் அவதிக்குள்ளாகியுள்ளனர்.

மருந்துகள் மற்றும் அறுவை சிகிச்சை உபகரணங்களின் பற்றாக்குறையால், இருதய அறுவை சிகிச்சைகளை கூட நிறுத்தப்பட்டுள்ளதாக நோயாளிகள் கூறுகின்றனர்.

மருத்துவர்களின் பற்றாக்குறை மற்றும் மருந்துப் பற்றாக்குறை தொடர்பில் சுகாதார அமைச்சின் செயலாளர் ஜனக ஸ்ரீ சந்திரகுப்தாவிடம் ஊடகங்கள் வினவியபோது அவரும் நிலைமை பெரும் நெருக்கடியில் இருப்பதை ஏற்றுக் கொண்டுள்ளார்.