லங்காசிறி FM
திடீரென கடுமையாக்கப்பட்ட சட்ட நடவடிக்கைகள்: அவதிக்குள்ளாகும் பொதுமக்கள்
கடந்த காலங்களில் இலங்கையில் 50cc க்குக் குறைவான, குறிப்பாக 48cc கொள்ளளவு கொண்ட மோட்டார் சைக்கிள்களை வீதிகளில் செலுத்துவதற்கு எந்தவித மோட்டார் போக்குவரத்து திணைக்களப் பதிவுகளோ அல்லது விசேட ஆவணங்களோ சட்டப்படி தேவைப்பட்டிருக்கவில்லை.
இவற்றை விற்பனை செய்யும் வர்த்தக நிலைய உரிமையாளர்களால் வழங்கப்படும் சாதாரண கொள்வனவுக் கடிதம் (Shop Receipt/Invoice) மட்டுமே இத்தனை காலமும் இவ்வாறான வாகனங்களுக்குப் பயன்படுத்தப்பட்டு வந்தது.
இருப்பினும், இலங்கையில் தற்போது நடைமுறைப்படுத்தப்பட்டுள்ள புதிய மோட்டார் போக்குவரத்து சட்ட ஒழுங்குவிதிகளின்படி, 48cc மோட்டார் சைக்கிள்களுக்கும் ஏனைய வாகனங்களைப் போன்றே சுங்க ஆவணங்கள் (Customs Documents), TIN சான்றிதழ் உள்ளிட்ட அனைத்து முறையான ஆவணங்களும் சமர்ப்பிக்கப்பட்டு, மோட்டார் போக்குவரத்து திணைக்களத்தில் பதிவு செய்யப்படுவது கட்டாயமாக்கப்பட்டுள்ளது.
திடீர் மாற்றம்
இந்தத் திடீர் சட்ட மாற்றத்தின் காரணமாக, கடந்த காலங்களில் 48cc மோட்டார் சைக்கிள்களைக் கொள்வனவு செய்த பெருமளவிலான நடுத்தர மற்றும் சாதாரண பொதுமக்கள் தற்போது மிக மோசமாகப் பாதிக்கப்பட்டுள்ளனர்.
இவர்களிடம் வாகனத்தை வாங்கிய கடையின் கடிதத்தைத் தவிர, சுங்கத் திணைக்கள ஆவணங்களோ அல்லது ஏனைய சட்டப்பூர்வ பத்திரங்களோ எதுவும் இல்லை.
இதனால், தங்களது வாகனங்களை மோட்டார் போக்குவரத்து திணைக்களத்தில் பதிவு செய்ய முடியாத ஒரு முட்டுக்கட்டை நிலை பொதுமக்களுக்கு ஏற்பட்டுள்ளது.
தங்களின் அன்றாட வாழ்வாதாரத்திற்காகவும், சிறு வியாபாரங்களுக்காகவும், பிள்ளைகளின் கல்வித் தேவைகளுக்காகவும் இந்த 48cc வாகனங்களை நம்பியிருந்த பல குடும்பங்கள், இவற்றை வீதிக்கு இறக்க முடியாமல் தவித்து வருகின்றன. பொலிஸாரின் விசித்திர நடைமுறையும் விபத்து அபாயமும் இது குறித்து போக்குவரத்துப் பொலிஸாரிடம் வினவியபோது, அவர்கள் ஒரு விசித்திரமான, அதேவேளை ஆபத்தான நடைமுறையைத் தெரிவிக்கின்றனர்.
48cc வாகனங்களால் அவதிக்குள்ளாகும் பொதுமக்கள்
சாதாரண வீதிப் சோதனைகளின் போது பாதுகாப்புப் பொலிஸார் இந்த 48cc வாகனங்களின் ஆவணங்களை அவ்வளவாகக் கண்டிப்புடன் பார்ப்பதில்லை. ஆனால், துரதிர்ஷ்டவசமாக இந்த வாகனங்கள் ஏதேனும் விபத்துக்களுக்கு உள்ளானால், முறையான பதிவு ஆவணங்கள் மற்றும் காப்புறுதி (Insurance) இல்லாத காரணத்தினால், வாகனத்தை ஓட்டியவருக்கு எதிராக நீதிமன்றத்தில் வழக்குத் தாக்கல் செய்யப்படுவது சட்டப்படி கட்டாயமாகும் எனப் பொலிஸ் தரப்பு தெரிவித்துள்ளது.
இந்த நடைமுறையானது மக்களிடையே பெரும் அச்சத்தையும் குழப்பத்தையும் ஏற்படுத்தியுள்ளது. வீதியில் செல்லும்போது தடுக்காவிட்டாலும், எதிர்பாராத விதமாக ஒரு விபத்து நேர்ந்தால், முழுப் பழியும், சட்டப் பாதிப்பும் ஏழைப் பொதுமக்கள் மீதே விழும் நிலை காணப்படுகிறது.
முறையான ஆவணங்கள் இல்லை என்ற ஒரே காரணத்திற்காக, ஏற்கனவே கொள்வனவு செய்யப்பட்ட ஆயிரக்கணக்கான வாகனங்களை முடக்கி வைப்பது மக்களுக்குச் செய்யப்படும் அநீதியாகும் எனப் பாதிக்கப்பட்ட மக்கள் சுட்டிக்காட்டுகின்றனர். எனவே, போக்குவரத்து அமைச்சு மற்றும் மோட்டார் போக்குவரத்து திணைக்களம் (DMT) இணைந்து, கடந்த காலங்களில் கொள்வனவு செய்யப்பட்ட 48cc மோட்டார் சைக்கிள்களுக்கு மாத்திரம், ஒரு குறிப்பிட்ட சலுகைக் காலத்தை வழங்கி, கடையின் கொள்வனவுக் கடிதத்தை அடிப்படையாகக் கொண்டு அவற்றுக்குப் பொது மன்னிப்பின் கீழ் (Amnesty Period) பதிவுகளை மேற்கொள்வதற்கு விசேட வழிமுறையொன்றை உருவாக்க வேண்டும் எனப் பொதுமக்கள் கோரிக்கை விடுக்கின்றனர்.
பொறுப்பு துறப்பு!
இக்கட்டுரையானது பொது எழுத்தாளர் Yoosuf அவரால் எழுதப்பட்டு, 10 June, 2026 அன்று தமிழ்வின் இணையத்தளத்தில் வெளியிடப்பட்டது. இக்கட்டுரைக்கும் தமிழ்வின் தளத்திற்கும் எந்தத் தொடர்பும் இல்லை.
மானிப்பாய், Florida, United States, Southgate, United Kingdom
24 Sep, 2026
வறுத்தலைவிளான், யாழ்ப்பாணம், கோண்டாவில், கொழும்பு, அநுராதபுரம்
25 Sep, 2022
