மட்டக்களப்பில் கடந்த 24 மணி நேரத்தில் 68 கோவிட் தொற்றாளர்கள் அடையாளம்

மட்டக்களப்பு மாவட்டத்தில் கடந்த 24 மணி நேரத்தில் 68 கோவிட் தொற்றாளர்கள் இனங்காணப்பட்டுள்ளதாக மட்டக்களப்பு மாவட்ட பிராந்திய சுகாதார சேவைகள் பணிப்பாளர் வைத்தியர் நாகலிங்கம் மயூரன் தெரிவித்துள்ளார்.

மட்டக்களப்பு மாவட்ட பிராந்திய சுகாதார சேவைகள் பணிப்பாளர் அலுவலகத்தில் இன்று நடைபெற்ற ஊடகவியலாளர் சந்திப்பிலேயே அவர் இதனைத் தெரிவித்துள்ளார்.

இதன்போது கருத்து தெரிவித்த அவர்,

மட்டக்களப்பு மாவட்டத்தில் கடந்த 24 மணி நேரத்தில் 68 கோவிட் தொற்றாளர்கள் இனங்காணப்பட்டுள்ளனர். மட்டக்களப்பு சுகாதார வைத்திய அதிகாரிகள் பிரிவில் 22 பேரும், செங்கலடி வைத்திய அதிகாரிகள் பிரிவில் 11 பேரும், வெல்லாவெளி சுகாதார வைத்திய அதிகாரிகள் பிரிவில் 10 பேர் உட்பட 68 பேர் கோவிட் தொற்றாளர்களாக இனங்காணப்பட்டுள்ளனர்.

மட்டக்களப்பு மாவட்டத்தில் 8275 கோவிட் தொற்றாளர்கள் இனங்காணப்பட்டுள்ளதுடன், 116 பேர் உயிரிழந்துள்ளதுடன் 755 பேர் தொடர்ந்தும் சிகிச்சைபெற்று வருகின்றனர். இறப்புகளில் 69 வீதமான இறப்பானது 60வயதுக்கும் மேற்பட்டவர்களாகவுள்ளனர்.

மூன்றாவது அலை காரணமாக 7292 பேர் தொற்றாளர்களாக இனங்காணப்பட்டுள்ளதுடன், 107 மரணங்களும் ஏற்பட்டுள்ளன. மட்டக்களப்பு மாவட்டத்தில் நேற்றைய தினம் 320221 தடுப்பூசிகள் ஏற்றப்பட்டுள்ளது. இதுவரையில் 142754 கோவிட் தடுப்பூசிகள் ஏற்றப்பட்டுள்ளன.

மட்டக்களப்பு மாவட்டத்தில் 30 வயதுக்கு மேற்பட்டவர்கள் 311000 பேர் உள்ளனர். இவர்களில் 46 வீதமானவர்களுக்கு இதுவரையில் தடுப்பூசி ஏற்றப்பட்டுள்ளது. முட்டக்களப்பு மாவட்டத்தில் உள்ள பிரதேச வைத்தியசாலைகள், ஆதார வைத்தியசாலைகளில் தடுப்பூசிகள் வழங்கப்பட்டு வருகின்றது.

அத்துடன் அப்பிரதேசத்தில் உள்ள பாடசாலைகள்,பொது இடங்களிலும் தடுப்பூசி ஏற்றப்பட்டு வருகின்றது. 30 வயதுக்கு மேற்பட்ட அனைவரும் தடுப்பூசிகளைப் பெற்றுக்கொள்ள முடியும். மேலும் ஒரு இலட்சம் தடுப்பூசிகள் மட்டக்களப்பு மாவட்டத்திற்குக் கிடைக்கப்பெறவுள்ளது. மட்டக்களப்பு மாவட்டத்தில் 12 ஆயிரம் ஆசிரியர்கள் உள்ளனர்.

பெரும்பாலான ஆசிரியர்கள் முதலாவது கோவிட் தடுப்பூசியைப் பெற்றுள்ளனர். இரண்டாவது தடுப்பூசி ஒரு மாதத்திற்குப் பின்னர் வழங்கப்படும். வெளிநாடு செல்லவுள்ளவர்கள் வேறு தடுப்பூசிகளைப் பெறவேண்டுமானால் ஒன்லைன் மூலம் விண்ணப்பம் செய்து அதனைப் பெற்றுக்கொள்ள முடியும் என தெரிவித்துள்ளார்.