மட்டக்களப்பில் துப்பாக்கி வைத்திருந்த நபருக்கு நீதிமன்றம் வழங்கிய தீர்ப்பு

மட்டக்களப்பில் சட்டவிரோதமாக ரி. 56 ரக துப்பாக்கி ஒன்றையும், அதன் 30 ரவைகளையும் தன் உடமையில் வைத்திருந்த குற்றச்சாட்டில் கைது செய்யப்பட்டு குற்றவாளியாக அடையாளம் காணப்பட்ட வாழைச்சேனை - பேத்தாளை பிரதேசத்தைச் சேர்ந்த ராஜா பாக்கியராஜா என்பவருக்கு மட்டக்களப்பு மேல் நீதிமன்ற நீதிபதி ரி.ஜே.பிரபாகரன் கடந்த வெள்ளிக்கிழமை (18.09.2026) ஆயுள் தண்டனை விதித்து தீர்ப்பளித்துள்ளார். 

வழக்கு தாக்கல்

கடந்த 2014 செப்டம்பர் 12ம் திகதி வாழைச்சேனை பொலிஸ் பிரிவிலுள்ள காவத்தமுனை பகுதியில் வைத்து சட்டவிரோதமாக ரி.56 ரக துப்பாக்கி அதன் 30 ரவைகளுடன் ராஜா பாக்கியராஜா அல்லது தேவமணி பாக்கியராஜா என்பவரை வாழைச்சேனை பொலிஸார் கைது செய்து அவருக்கு எதிராக சட்டவிரோதமாக ரி.56 ரக துப்பாக்கியை உடமையில் வைத்திருந்தமை மற்றும் உயிர் உள்ள 30 துப்பாக்கி தோட்டாக்களை வைத்திருந்த இரு குற்றச்சாட்டின் கீழ் மட்டக்களப்பு மேல் நீதிமன்றில் வழக்கு தாக்கல் செய்தனர்.

இதனையடுத்து குறித்த வழக்கு விசாரணை தொடர்ந்து இடம்பெற்று வந்த நிலையில் வழக்கின் எதிராளி சார்பில் சட்டத்தரணி பிரகாஷ் முன்னிலையானதுடன் வழக்காளியான பொலிஸ் சார்பில் அரச சட்டவாதி எஸ்.அனுஷன் முன்னிலையாகி வாதாடி வந்தனர்.

தீர்ப்பு

இந்த நிலையில் குறித்த நபர் குற்றவாளியாக கடந்த மாதம் 24.08.2026 மன்றில் இனங்காணப்பட்டு கடந்த வெள்ளிக்கிழமை 18ஆம் திகதி தண்டனை வழங்கும் தீர்ப்பு என நீதிபதி அறிவித்தார்.

இதன் பிரகாரம் இந்த வழக்கின் தண்டனைக்கான தீர்ப்பாக முதலாவது குற்றமான சட்டவிரோதமாக ரி.56 ரக துப்பாக்கி உடமையில் வைத்திருந்த குற்றத்துக்கு ஆயுள் தண்டனையும், இரண்டாவது குற்றமான உயிர் உள்ள 30 தோட்டாக்களை வைத்திருந்த குற்றத்திற்காக 25000 ரூபா அபராதமாக செலுத்துமாறும் அதனை செலுத்த தவறினால் 3 மாத கால சாதாரண சிறை தண்டனை என நேற்று மேல் நீதிமன்ற நீதிபதி ரி.ஜே. பிரபாகரன் தீர்ப்பளித்தார். 

அனோஜன் விவகாரம் தொடர்பில் அவரது சட்டத்தரணி கூறியுள்ள விடயம்! எழுத்துமூல தீர்ப்பு குறித்து வெளியிடப்பட்ட தகவல்

நாடு முழுவதும் மோசமடையும் வானிலை! சில பாடசாலைகளுக்கு விடுமுறை அறிவிப்பு