லங்காசிறி FM
ஆடம்பரங்கள் தேவையில்லை என ஆட்சி பீடம் ஏறியவர்களுக்கு இவ்வளவு பாதுகாப்பு எதற்கு..! ஹர்ஷண ராஜகருணா கேள்வி
கடந்த காலத்தில் தாங்கள் ஆட்சிக்கு வரும்போது கூடுதல் பாதுகாப்புகளோ அல்லது ஆடம்பர முறைகளோ தேவையில்லை எனக் கூறி அதிகாரத்தைக் கைப்பற்றியவர்கள், இன்று பதவியேற்ற பின்னர் உச்சக்கட்ட பாதுகாப்பையும் வாகனங்களையும் பெற்றுக்கொள்கின்றனர் என ஐக்கிய மக்கள் சக்தியின் நாடாளுமன்ற உறுப்பினர் ஹர்ஷண ராஜகருணா விமர்சனம் வெளியிட்டுள்ளார்.
ஜனாதிபதியின் கம்பஹா மாவட்ட விஜயத்தின்போது, பொதுமக்களின் அனுமதிபெற்ற துப்பாக்கிகளைப் பொலிஸில் ஒப்படைக்குமாறு பிறப்பிக்கப்பட்ட சர்ச்சைக்குரிய உத்தரவு நாட்டின் வரலாற்றில் எந்த காலத்திலும் இல்லாத விசித்திரமான செயல் என்றும் அவர் சுட்டிக்காட்டியுள்ளார்.
கொழும்பில் நேற்று(27.09.2026) இடம்பெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே அவர் மேற்கண்டவாறு குறிப்பிட்டுள்ளார்.
துப்பாக்கிகள் பொலிஸாரிடம் ஒப்படைப்பு
அவர் மேலும் தெரிவிக்கையில்,
ஜனாதிபதியின் கம்பஹா மாவட்டத்துக்கான விஜயத்தையொட்டி, அந்தப் பகுதியில் சட்ட ரீதியான அனுமதிப்பத்திரத்துடன் துப்பாக்கிகளை வைத்துள்ள அனைத்து நபர்களும் அந்தத் துப்பாக்கிகளை ஜனாதிபதியின் வருகை மற்றும் கூட்டம் நிறைவடையும் வரை பொலிஸாரிடம் ஒப்படைக்குமாறு அறிவிக்கப்பட்டுள்ளது.
நாட்டில் கடந்த காலங்களில் நிலவிய கடுமையான பயங்கரவாதக் காலப் பகுதிகளில் அல்லது இக்கட்டான சூழ்நிலைகளின்போது கூட இவ்வாறானதொரு நடைமுறை பின்பற்றப்பட்டதில்லை. நாட்டின் வரலாற்றில் எக்காலத்திலும் இல்லாதவாறு இவ்வாறானதொரு விசித்திரமான சம்பவம் பதிவாகியுள்ளது.
ஆடம்பரங்கள் தேவையில்லை எனக் கூறிவிட்டு இன்று உச்சக்கட்ட பாதுகாப்பைப் பெற்றுக்கொள்வதோடு, ஜனாதிபதி வருகையின்போது மாவட்டம் முழுவதும் உள்ள அனுமதிபெற்ற துப்பாக்கிகளையும் கையகப்படுத்திப் பொதுமக்களுக்குப் புதிய மற்றும் கடுமையான அசௌகரியங்களை வழங்குவது முற்றிலும் நகைப்புக்கிடமானதும் ஏற்றுக்கொள்ள முடியாததுமாகும்.
பாதிக்கப்படப்போகும் சாதாரண மக்கள்
நாட்டில் நிறைவேற்றப்பட்டுள்ள 22ஆவது அரசமைப்புத் திருத்தச் சட்டம் காரணமாக, எதிர்காலத்தில் அதன் அனைத்துக் கஷ்டங்களையும் பாதகமான விளைவுகளையும் அனுபவிக்கப் போவது இந்த நாட்டின் சாதாரண பொதுமக்கள் தான்.
இந்தத் திருத்தச் சட்டத்தின் ஊடாக நீதிமன்ற அமைப்புகள் அரசியல் மயமாக்கப்படும் அல்லது ஒருசார்பான நிலைமைக்குத் தள்ளப்படும் அபாயம் ஏற்கனவே ஆரம்பித்துவிட்டது. நாடாளுமன்றத்துக்குள்ளும், அதற்கு வெளியேயும், நீதிமன்றங்களிலுமாக எதிர்க்கட்சியின் தரப்பிலிருந்து இந்தத் திருத்தச் சட்டத்துக்கு எதிராகச் செய்யக்கூடிய அத்தனை சட்டரீதியான மற்றும் அரசியல்ரீதியான போராட்டங்களையும் நாங்கள் முன்னெடுத்தோம்.
இருப்பினும், தற்போதைய அரசுக்கு நாடாளுமன்றத்தில் மூன்றில் இரண்டு பெரும்பான்மைப் பலம் காணப்படுவதால், எதிர்க்கட்சியின் ஒப்புதல் இல்லாமலேயே தங்களுக்குத் தேவையான எந்தவொரு திருத்தத்தையும் அல்லது சட்டத்தையும் எவ்விதத் தடையுமின்றி நிறைவேற்றிக் கொள்ளக்கூடிய முழுமையான அதிகாரம் கிடைத்துள்ளது.
இந்தச் சட்டத்தின் மூலமாக ஏற்படக்கூடிய அத்தனை எதிர்மறையான தாக்கங்களையும் விளைவுகளையும் எதிர்காலத்தில் நாட்டு மக்கள் எதிர்கொள்ள நேரிடும் என்றார்.
மானிப்பாய், Florida, United States, Southgate, United Kingdom
24 Sep, 2026
வறுத்தலைவிளான், யாழ்ப்பாணம், கோண்டாவில், கொழும்பு, அநுராதபுரம்
25 Sep, 2022
