கணேமுல்லை சஞ்சீவ கொலைவழக்கு! பெண் சட்டத்தரணி தொடர்பில் பொலிஸாரின் நிலைப்பாட்டில் திடீர் மாற்றம்

கணேமுல்லை சஞ்சீவ கொலை வழக்கில் குற்றம் சாட்டப்பட்டுள்ள பெண் சட்டத்தரணி தொடர்பில் பொலிஸார் முன்னைய கடுமையான நிலைப்பாட்டுக்குப் பதில் மென்மையான நிலைப்பாட்டுக்கு மாறியுள்ளனர்.

கொழும்பு நீதவான் நீதிமன்ற வளாகத்திற்குள் பாதாள உலகத்தலைவர் கணேமுல்ல சஞ்சீவ சுட்டுக் கொல்லப்படுவதற்கு உடந்தையாக இருந்ததாக குற்றம் சாட்டப்பட்டு விளக்கமறியலில் வைக்கப்பட்டுள்ள கடவத்தையைச் சேர்ந்த சட்டத்தரணி தமரா குமாரி அபேரத்ன, மகேஷ் ஒபேசேகர மற்றும் லக்ஷித ஸ்ரீ துலாஜ் ஆகிய சந்தேகநபர்களுக்கு எதிரான வழக்கு நேற்று(02.06.2026) கொழும்பு பிரதான மாஜிஸ்திரேட் நீதிமன்றத்தில் விசாரணைக்கு எடுத்துக்கொள்ளப்பட்டிருந்தது.

அரசாங்க ஊழியர்களுக்கு ஏற்பட்டுள்ள தாமதம்..! பெருந்தொகை பணத்தை இழந்த திணைக்களம்

முக்கிய எழுத்துப்பூர்வ சாட்சியங்களில் ஏற்பட்ட திடீர் மாற்றம் 

இதன்போது, இதுவரை காலமும் பயங்கரவாத தடைச்சட்டத்தின் கீழ் குறித்த பெண் சட்டத்தரணிக்கு எதிரான குற்றச்சாட்டுக்களை முன்வைத்து வந்த குற்றப்புலனாய்வுத்துறை, திடீரென அவருக்கு எதிராக பயங்கரவாதத் தடைச்சட்டத்தின் கீழ் இனி நடவடிக்கை எடுக்கப்படாது என்று நீதிமன்றத்தில் அறிவித்துள்ளது.

குற்றப் புலனாய்வுத் துறையால் நீதிமன்றத்தில் சமர்ப்பிக்கப்பட்ட முக்கிய எழுத்துப்பூர்வ சாட்சியங்களில் ஏற்பட்ட திடீர் மாற்றம் குறித்து தீவிர விசாரணை நடத்தி, விரிவான அறிக்கையை உடனடியாகத் தாக்கல் செய்யுமாறு கொழும்பு பிரதம நீதவான் அசங்க எஸ். போதரகம உத்தரவிட்டுள்ளார்.

பயங்கரவாதத் தடுப்புச் சட்டத்தின் கீழ், நூற்று எண்பத்திரண்டு(182) நாட்கள் தடுத்து வைக்கப்பட்டு விசாரிக்கப்பட்ட குறித்த பெண் சட்டத்தரணி, கெஹல்பத்தர பத்மே போன்ற பாரியளவிலான போதைப்பொருள் கடத்தல்காரர்கள் மற்றும் பாதாள உலக உறுப்பினர்களுடன் நேரடித் தொடர்புகளைக் கொண்டிருந்ததாக முன்னர் நீதிமன்றத்தில் தெரிவிக்கப்பட்டிருந்தது.

அத்துடன், சுமார் 100 கோடி ரூபாவுக்கும் அதிகமான சந்தேகத்திற்கிடமான தொகையை புழக்கத்தில் விட்டதாக குற்றப் புலனாய்வுத் துறை முன்னர் மூன்று முறை 'பி' அறிக்கைகள் மூலம் உறுதிப்படுத்தியிருந்தது.

போலி அடையாள அட்டைகளைப் பயன்படுத்தி எட்டு வங்கிக் கணக்குகளைப் பராமரித்து, இரண்டு ஆண்டுகளில் 24 கோடி ரூபாய் பணத்தை அவர் செலவழித்துள்ளார்.

தெளிவான ஆதாரங்கள் எழுத்துவடிவில் சமர்ப்பிப்பு

மேலும், கடந்த  2025 பிப்ரவரி 19 அன்று, கொலையாளிகள் தங்களை வழக்கறிஞர்களாக மாறுவேடமிட்டுக்கொள்ளத் தேவையான ஆடைகளையும், அவரது கையொப்பத்துடன் கூடிய போலி வழக்கறிஞர் அடையாள அட்டைகளையும், துப்பாக்கியை மறைக்கத் தேவையான புத்தகங்களையும் கூட அவர் வழங்கியதற்கான ஆறு தெளிவான ஆதாரங்களை கொழும்பு குற்றப்பிரிவு முன்னதாக எழுத்து வடிவில் நீதிமன்றத்தில் சமரப்பித்திருந்தது.

இருப்பினும், ஒட்டுமொத்த நீதித்துறை அமைப்பையும் ஆச்சரியப்படுத்தும் வகையில், இந்த சந்தேக நபர்கள் மீது பயங்கரவாதத் தடுப்புச் சட்டத்தின் கீழ் இனி நடவடிக்கை எடுக்கப்படாது என்று குற்றப்பிரிவு திடீரென நீதிமன்றத்தில் அறிவித்துள்ளது.

மூன்று முறை நீதிமன்றத்தில் சமர்ப்பிக்கப்பட்ட வலுவான ஆதாரங்கள் ஒரே இரவில் எப்படி மாறின? போலி அடையாள அட்டைகளும், கணக்குகளில் உள்ள கோடிக்கணக்கான ரூபாயும் இப்போது பொய்யா? என்று பிரதான நீதிபதி இதன்போது, குற்றப் புலனாய்வுப் பிரிவிடம் வெளிப்படையாகக் கேள்வி எழுப்பினார்.

இதனையடுத்து சந்தேக நபரான பெண் சட்டத்தரணிக்கு எதிராக சட்டவிரோத வழிகளில் வருமான மீட்டல் தடைச் சட்டத்தின் கீழ் மேலதிக விசாரணைகள் நடத்தப்படும் என்று குற்றப் புலனாய்வுத் துறை அளித்த வாய்மொழி வாக்குறுதிகளின் அடிப்படையில் மட்டும் முடிவுகளை எடுக்க முடியாது என்பதைச் சுட்டிக்காட்டிய நீதவான், குற்றவியல் நடைமுறைச் சட்டத்தின் பிரிவு 123 இன் படி, சாட்சியச் சுருக்க அறிக்கையை உடனடியாக மிகவிரைவாக சமர்ப்பிக்குமாறு உத்தரவிட்டுள்ளார்.

இந்நிலையில்,  வழக்குடன் சம்பந்தப்பட்ட மூன்று சந்தேக நபர்களும் 5ஆம் திகதி வரை விளக்கமறியலுக்கு அனுப்பபட்டுள்ளனர்.  

அதிகாலை ஏற்பட்ட அனர்த்தம்! ஆடைத்தொழிற்சாலையில் தீ விபத்தில் 22 பேர் வைத்தியசாலையில் அனுமதி

சென்னையில் பரபரப்பை ஏற்படுத்திய இரட்டைக்கொலை! இலங்கை பெண்ணுடன் சென்ற சிறுமியும் உயிரிழப்பு