சூடுபிடிக்கும் காவி உடை களையப்பட்ட விவகாரம் - அடுத்த கட்ட நடவடிக்கைகளுக்கு தயாராகும் மகா சங்கத்தினர்

Galagoda Aththe Gnanasara Thero Prisons in Sri Lanka

By Mayuri Oct 07, 2026 01:24 PM GMT

Mayuri

in சமூகம்

Report

கலகொட அத்தே ஞானசார தேரர் நீதிமன்றத்தில் முன்னிலைப்படுத்தப்பட்ட போது அவரது துறவிக்குரிய காவி உடை (சீவரம்) அகற்றப்பட்டு, சாதாரண உடை அணியுமாறு கட்டாயப்படுத்தப்பட்டமை ஒரு பாரதூரமான செயல் என அஸ்கிரிய பீடத்தின் தலைமைச் செயலாளர் வணக்கத்திற்குரிய மெடகம தம்மானந்த தேரர் தெரிவித்துள்ளார்.

ஊடகங்களுக்கு இன்றைய தினம் (07) விசேட அறிக்கையொன்றை வெளியிட்டு அவர் இந்த விடயத்தை கூறியுள்ளார்.

நீதிமன்ற தீர்ப்பில் எந்த ஆட்சேபனையும் இல்லை

மேலும் தெரிவிக்கையில், ஞானசார தேரர் எதிர்கொண்டுள்ள நிலைமை குறித்து மகா சங்கத்தினர் ஆலோசித்து, அடுத்தகட்ட நடவடிக்கைகள் குறித்து முடிவெடுப்பார்கள். வணக்கத்திற்குரிய ஞானசார தேரர் தொடர்பான நீதிமன்ற தீர்ப்பில் எங்களுக்கு எந்த ஆட்சேபனையும் இல்லை; அந்த தீர்ப்பை நாங்கள் மதிக்கிறோம்.

இருப்பினும், சிறைச்சாலைகள் கட்டளைச் சட்டத்தை ஆராயும்போது, சிறைவாசத்திற்குப் பிறகு மீண்டும் நீதிமன்றத்திற்குக் கொண்டுவரப்பட்டபோது அவரது துறவிக்குரிய ஆடைகள் அகற்றப்பட்டு சாதாரண உடையில் முன்னிலைப்படுத்தப்பட்டமை சட்ட மீறலாகவே எங்களுக்குத் தோன்றுகிறது. சிறைச்சாலைகள் கட்டளைச் சட்டத்தின்படி, அவர் தனது வழக்கமான ஆடையிலேயே நீதிமன்றத்தில் முன்னிலைப் படுத்தப்பட்டிருக்க வேண்டும். இது மிகவும் தீவிரமான ஒரு விடயமாகும்.

சூடுபிடிக்கும் காவி உடை களையப்பட்ட விவகாரம் - அடுத்த கட்ட நடவடிக்கைகளுக்கு தயாராகும் மகா சங்கத்தினர் | Ganasara Tero Dress Incident

நமது சட்ட அமைப்பு பாரம்பரியமாக மதகுருமார்களின் அந்தஸ்தை அங்கீகரிக்கிறது; ஆனால், அந்த அடிப்படைக் கொள்கையை அலட்சியம் செய்யும் வகையிலேயே இந்த நடவடிக்கை மேற்கொள்ளப்பட்டுள்ளது. இது 'சாசனத்திற்கு' (பௌத்த மதக் கட்டமைப்புக்கு) ஒரு மோசமான முன்னுதாரணமாக அமைகிறது.

அடுத்தகட்ட நடவடிக்கைகள்

மகா சங்கமாகிய நாங்கள் இவ்விடயத்தில் விசேட கவனம் செலுத்தி வருகிறோம்; அடுத்தகட்ட நடவடிக்கைகள் குறித்து ஆலோசிப்போம். அரசியல் கண்ணோட்டங்களால் பாதிக்கப்படாமல் இவ்விடயத்தில் நடவடிக்கைகள் எடுக்கப்பட வேண்டும் என்று நாங்கள் வலியுறுத்துகிறோம்.

சாசனத்தின் கண்ணோட்டத்தில் இது ஒரு பாரதூரமான மீறலாகும். ஏற்பட்டுள்ள நிலைமை குறித்து நாங்கள் கலந்துரையாடுவோம்; தேவைப்பட்டால், அவரை மீண்டும் துறவறத்தில் இணைக்கும் (மீண்டும் உபசம்பதா செய்யும்) செயல்முறைக்கு உதவவும் நாங்கள் தலையிடுவோம்.

குற்றத்திற்குத் தண்டனை வழங்கப்பட வேண்டும் என்று ரோமன்-டச்சுச் சட்டம் கூறினாலும், தவறு செய்தவரை மன்னித்து அவர்களைச் சரியான பாதையில் வழிநடத்த வேண்டும் என்றே பௌத்தம் போதிக்கிறது. மகா சங்கமாகிய நாங்கள் இவ்விடயம் தொடர்பாகத் தேவையான நடவடிக்கைகளை எடுக்கத் திட்டமிட்டுள்ளோம். சாசனத்தின் கண்ணோட்டத்தில் இது ஒரு பாரதூரமான மீறலாகும் என அவர் கூறியுள்ளார்.