எரிபொருள் விலை திருத்தம் தொடர்பில் சற்றுமுன் வெளியான அறிவிப்பு

அக்டோபர் மாதத்திற்கான எரிபொருள் விலை திருத்தம் குறித்த அறிவிப்பு இன்று (30.09.2026) இரவு வெளியிடப்படவுள்ளது.

அத்துடன் எரிபொருள் விலை திருத்தங்கள் வழக்கமாக மாதத்தின் கடைசி நாளிலேயே மேற்கொள்ளப்படுவதாக எரிசக்தி அமைச்சர் அனுர கருணாதிலக அறிவித்துள்ளார். 

இன்று (30) நடைபெற்ற ஊடகவியலாளர் சந்திப்பில் கலந்துகொண்டு அவர் இந்த விடயத்தை கூறியுள்ளார். 

அத்துடன் விலை திருத்தத்தின் ஒரு பகுதியாக, ஒரு லீட்டர் டீசலுக்கு 70 ரூபாய் மானியம் வழங்க அரசாங்கம் திட்டமிட்டுள்ளதாகவும் அமைச்சர் அறிவித்தார்.

நஷ்டத்தை சந்தித்த நிறுவனங்கள்

சர்வதேச சந்தையில் எரிபொருள் விலை உயர்வு காரணமாக உள்ளூர் எரிபொருள் விநியோக நிறுவனங்கள் நஷ்டத்தைச் சந்தித்துள்ளதாகக் குறிப்பிட்ட அவர், ஒரு லீட்டர் டீசலுக்கான விலையில் 120 ரூபாய், 135 ரூபாய், 192 ரூபாய் மற்றும் 247 ரூபாய் போன்ற புள்ளிவிவரங்களையும் சுட்டிக்காட்டினார்.

இந்த டீசல் மானியத்தை வழங்குவதன் மூலம் பெட்ரோலியக் கூட்டுத்தாபனம் பெரும் சுமையை எதிர்கொள்கிறது என்பதை ஒப்புக்கொண்ட அமைச்சர், அதேவேளையில் ஆண்டிறுதிக்குள் கூட்டுத்தாபனத்திற்கு நஷ்டம் ஏற்படாதவாறு நடவடிக்கைகள் எடுக்கப்பட்டு வருவதாகவும் குறிப்பிட்டார்.

மேலும், இந்த மானியம் டீசலுக்கு மட்டுமே பொருந்தும் என்றும், பெட்ரோலுக்குப் பொருந்தாது என்றும் அவர் தெளிவுபடுத்தினார்.

மாதாந்திர விலை மாற்றத்தின் காரணமாக எரிபொருள் விலைகள் உயரக்கூடும் என்ற வதந்திகளுக்கு மத்தியில், பல பகுதிகளில் உள்ள எரிபொருள் நிலையங்களில் டீசலுக்காக நீண்ட வரிசைகள் உருவாகியுள்ளதாக தகவல்கள் தெரிவிக்கின்றன.

விலை மாற்றத்திற்குப் பிறகு அதிக லாபம் ஈட்டும் நோக்கத்துடன், சில எரிபொருள் நிலையங்கள் வேண்டுமென்றே எரிபொருள் விநியோகத்தை மந்தமாக்குவதாக நுகர்வோர் குற்றச்சாட்டு முன்வைத்துள்ளனர்.

இருப்பினும், நாட்டிற்கு எரிபொருள் இறக்குமதி செய்வதில் எந்தப் பிரச்சினையும் இல்லாததால், இத்தகைய வரிசைகள் தேவைப்படாது என்று அமைச்சரவை பேச்சாளரும் சுகாதார மற்றும் வெகுஜன ஊடகத்துறை அமைச்சருமான நலிந்த ஜயதிஸ்ஸ வலியுறுத்தியுள்ளார். 

கொடூரமாக தாக்கப்பட்டு கடத்தப்பட்ட வர்த்தகர் மீட்பு! மருத்துவமனையில் அனுமதி

சுரேஷ் சலே குறித்து இலங்கை அரசிடம் ஐ.நா எழுத்துமூல விசாரணை!