திருகோணமலை கடற்றொழிலாளர்களை சந்தித்த கிழக்கு மாகாண ஆளுநர்

Trincomalee Eastern Province Sri Lanka Fisherman

By H. A. Roshan Nov 07, 2024 07:51 PM GMT

H. A. Roshan

in சமூகம்

Report

Courtesy: H A Roshan

கிழக்கு மாகாண ஆளுநர் ஜயந்த லால் ரத்னசேகர மற்றும் திருகோணமலை மாவட்ட கடற்றொழிலாளர் சங்கப் பிரதிநிதிகளுக்கு இடையில் கலந்துரையாடல் ஒன்று இடம்பெற்றுள்ளது.

குறித்த கலந்துரையாடல், இன்று (07) திருகோணமலை ஆளுநர் அலுவலகத்தில் நடைபெற்றுள்ளது.

திருகோணமலை மாவட்ட செயலகம், இலங்கை பொலிஸ், கடற்றொழில் கூட்டுத்தாபனம், கொட்பே மீன்பிடி துறைமுகம், துறைமுக அதிகாரசபை மற்றும் மத்திய சுற்றாடல் அதிகார சபையை பிரதிநிதித்துவப்படுத்தும் அதிகாரிகள் குழு இதில் கலந்துகொண்டனர்.

பொலிஸ் பாதுகாப்பு

இங்கு திருகோணமலை மாவட்ட கடற்றொழிலாளர்கள் எதிர்நோக்கும் பிரச்சினைகளை ஆளுநரிடமும் உரிய அதிகாரிகளிடமும் கடற்றொழில் பிரதிநிதிகளால் முன்வைக்கப்பட்டுள்ளது.

திருகோணமலை கடற்றொழிலாளர்களை சந்தித்த கிழக்கு மாகாண ஆளுநர் | Fishermen Discussion With Eastern Governor

கடற்றொழிலில் இடைத்தரகர்கள் கட்டாயமாக மீன் வாங்குவது, பறிமுதல் செய்யப்பட்ட மீன்களை ஏலம் விடுவதில் உள்ள சிக்கல்கள், குளறுபடிகள், கடற்றொழில் துறைமுகத்தில் போதைப்பொருள் மிரட்டல், தடை செய்யப்பட்ட வலைகளை பயன்படுத்தி மீன்களை கொல்வது போன்ற பிரச்னைகள் குறித்து கடற்றொழிலாளர் சங்க பிரதிநிதிகள் தெரிவித்துள்ளனர்.

கொட்பே கடற்றொழில் துறைமுகத்தில் போதிய பாதுகாப்பு இல்லை எனவும் அதற்கு போதியளவு பொலிஸ் பாதுகாப்பை வழங்க முடியும் எனவும் திருகோணமலை பொலிஸ் பிரிவை பிரதிநிதித்துவப்படுத்தி வருகை தந்த சிரேஷ்ட பொலிஸ் அத்தியட்சகர் சாமிக்க பிரேமசிறி தெரிவித்துள்ளார்.

ஆளுநர் பணிப்புரை

மேலும், தடைசெய்யப்பட்ட வலை கருவிகள் மூலம் மீன்களை கொல்வதை தடுக்க உரிய நடவடிக்கை எடுக்குமாறு கடலோர பொலிஸார் மற்றும் கடற்படையினருக்கு ஆளுநர் அறிவுறுத்தியுள்ளார்.

எந்தவொரு அரசியல் மற்றும் வெளியாட்களின் செல்வாக்கிற்கும் அஞ்சாமல் கடமைகளை மேற்கொள்ளுமாறு அதிகாரிகளிடம் உரையாற்றிய ஆளுநர், எவ்வித அரசியல் செல்வாக்கும் இன்றி தமது கடமைகளை மேற்கொள்ளக்கூடிய சூழல் ஏற்கனவே உருவாக்கப்பட்டுள்ளதுடன், மக்களின் நலனுக்காக பணியாற்றுமாறும் பணிப்புரை விடுத்துள்ளார்.

கடற்றொழிலாளர் சங்கப் பிரதிநிதிகளிடம் உரையாற்றிய ஆளுநர், சில கடற்றொழிலாளர்கள் செய்யும் தவறுகளினால் ஒட்டுமொத்த கடற்றொழில் சமூகமும் சிரமத்திற்கு உள்ளாகியுள்ளதாகவும், தற்போதுள்ள சட்டத்தின்படி அவர்கள் செயற்பட வேண்டும் எனவும் தெரிவித்துள்ளார்.