கடந்த 26 நாட்களாக காணாமல் போயுள்ள மாணவி! கடத்தப்பட்டாரா என சந்தேகம் வெளியிடும் தந்தை
தனது மகள் கடந்த 26 நாட்களாக காணாமல் போன விடயம் தொடர்பில் பொலிஸ் நிலையத்தில் முறையிட்டும் முறையான விசாரணைகள் முன்னெடுக்கப்படுவதில்லையென மகளைத் தேடிவரும் தந்தையான முன்னாள் போராளியான தெய்வேந்திரா தேவகுமாரன் தெரிவித்தார்.
அத்தோடு, தனது மகள் கடத்தப்பட்டு,அல்லது வலுக்கட்டாயமாக எங்காவது யாராலும் அழைத்துச் செல்லப்பட்டிருக்க வேண்டும் எனவும் அவர் கூறினார்.
மட்டு.ஊடக அமையத்தில் நடைபெற்ற ஊடகவியலாளர் சந்திப்பிலேயே அவர் இதனைக் குறிப்பிட்டார்.
முறைப்பாடு
கடந்த 2026 ஆம் ஆண்டு அக்டோபர் மாதம் 26 ஆம் திகதி காலை சுமார் 9 மணியளவில், அரசடியில் உள்ள தனியார் கல்வி நிறுவனத்திற்கு தனது மகளைக் கொண்டு சேர்த்துவிட்டுச் சென்றதாகவும், பிற்பகல் 1 மணிக்கு வகுப்பு முடிந்த பின்னர் அவர் வீடு திரும்பவில்லை என்றும் அவர் தெரிவித்துள்ளார்.

இதனையடுத்து, அன்றைய தினம் பிற்பகல் 4 மணியளவில் காத்தான்குடி பொலிஸ் நிலையத்திற்குச் சென்றபோது, மட்டக்களப்பு தலைமையகப் பொலிஸ் நிலையத்தில் முறைப்பாடு அளிக்குமாறு அறிவுறுத்தப்பட்டதாகக் குறிப்பிட்டார்.
அதன்படி, மட்டக்களப்பு பொலிஸ் நிலையத்தில் முறைப்பாடு பதிவு செய்யப்பட்டதாகவும், பொலிஸார் விசாரணைகளை முன்னெடுத்து சி.சி.டி.வி காணொளிகளைப் பரிசீலித்ததாகவும் கூறினார்.
கோரிக்கை
எனினும், குறிப்பிட்ட வீதியைத் தாண்டிச் செல்வது வரை மட்டுமே கண்காணிப்புக் கமராவில் பதிவாகியுள்ளதாகவும், அதற்குப் பின்னர் என்ன நடந்தது என்பது குறித்து இதுவரை எவ்விதத் தகவலும் தெரியவில்லை என்றும் அவர் வேதனை தெரிவித்தார்.

மேலும், இது தொடர்பாக ஜனாதிபதி செயலகத்திற்கும் மின்னஞ்சல் மூலம் தெரியப்படுத்தியதாகவும், அங்கிருந்து பொலிஸ் மா அதிபருக்கு கடிதம் அனுப்பப்பட்டதாகவும் குறிப்பிட்டார்.
ஆனாலும், விசாரணையில் எதிர்பார்த்த வேகம் காணப்படாததாலேயே ஊடகங்கள் வாயிலாக இவ்விடயத்தை வெளிப்படுத்த முன்வந்ததாக அவர் தெரிவித்தார்.
தமது மகள் வற்புறுத்தலின் பேரில் எங்காவது கடத்தி வைக்கப்பட்டிருக்கலாம் எனச் சந்தேகம் எழுவதாகவும் அவர் குறிப்பிட்டார்.
மற்றைய பகுதிகளிலும் இளம்பெண்கள் காணாமல் போகும் சம்பவங்கள் பதிவாகி வருவதால் குடும்பத்தினர் பெரும் அச்சத்தில் உள்ளதாகவும், எனவே பொலிஸார் இவ்விவகாரத்தைத் தீவிரமாக ஆராய்ந்து தனது மகளை மீட்டுத் தருமாறும் ஜனாதிபதி மற்றும் சம்பந்தப்பட்ட தரப்பினரிடம் அவர் உருக்கமாகக் கோரிக்கை விடுத்துள்ளார்.